ޕްރިމިއާ ލީގު: ސްޓޯކް އަތުން އާސެނަލް މޮޅުވެއްޖެ

އިނގިރޭސި ޕްރިމިއާ ލީގުގައި ސްޓޯކް ސިޓީއާ ދެކޮޅަށް ކުޅުނު މެޗުން އާސެނަލް މޮޅުވެއްޖެއެވެ.

އަމިއްލަ ދަނޑުގައި ކުޅުނު މި މެޗުން އާސެނަލް މޮޅުވެފައިވަނީ 3-0 ގެ ނަތީޖާއަކުންނެވެ. އޭސީ މިލާން ބަލިކޮށް ޔުއެފާ ޔުރޮޕާ ލީގުގެ ކުއާޓާ ފައިނަލުން ޖާގަ ހޯދި އާސެނަލްގެ ޓީމަށް ތިން ބަދަލެއް ގެނައިއިރު އެ ޓީމާއި އަލަށް ގުޅުނު ގެބޯންގެ ފޯވާޑް ޕިއޭ އެމެރިކް އޮބަމަޔަންގ ވަނީ މި މެޗުގައި އެ ޓީމުގެ ފުރަތަމަ އެގާރާގައި ހިމެނިގެން ކުޅެފައެވެ. މިދިޔަ ހަފްތާގައި އެވަޓަން އަތުން ބަލިވި ސްޓޯކްގެ ޓީމުން މި މެޗުގައި ވަނީ ތިން ބަދަލެއް ފެނިގެން ގޮސްފައެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ވާދަވެރި ކުޅުމެއް ފެނިގެންދިޔައިރު ދެ ޓީމަށް ވެސް ވަނީ ލަނޑު ޖެހުމަށް ރަނގަޅު ފުރުސަތުތައް ލިބި ބޭކާރުވެފައެވެ. އާސެނަލްއިން ގިނަ ވަގުތު ބޯޅަ ހިފަހައްޓައިގެން ކުޅުނުއިރު ސްޓޯކްއިން ވަނީ ކައުންޓާ އެޓޭކުގައި އާސެނަލްގެ ގޯލަށް ނުރައްކާކޮށްފައެވެ. އެގޮތުން މެޗުގެ 27 ވަނަ މިނެޓުގައި އާރޮން ރެމްސީގެ ހަމަލާއެއް ސްޓޯކްގެ ގޯލުގެ ހުރަސް ދަނޑިއަށް އަމާޒުވެފައިވެއެވެ. އެހެން ނަމަވެސް މި ހާފުގައި ނަތީޖާއަށް އެއްވެސް ބަދަލެއް ދެ ޓީމުންކުރެ ޓީމަކަށް ގެނެވިފައެއް ނުވެއެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި އާސެނަލްއިން ވަނީ އެ ޓީމުގެ ކުޅުން އިތުރަށް ވަރުގަދަ ކޮށްފައެވެ. މެޗުގެ ފުރަތަމަ ލަނޑު ފެނިގެން ގޮސްފައިވަނީ 75 ވަނަ މިނެޓުގައެވެ. މެސުޓް އޮޒިލްއަށް ސްޓޯކްގެ އޭރިއާ ތެރެއިން ފައުލްކުރުމާއި ވިދިގެން ރެފްރީ ދިން ޕެނަލްޓީ ކާމިޔާބުކޮށް އާސެނަލްއަށް ލީޑު ނަގައިދިނީ އޮބަމަޔަންގއެވެ. އެ ޓީމުގެ ދެވަނަ ލަނޑު 86 ވަނަ މިނެޓުގައި އަނެއްކާ ވެސް އޮބަމަޔަންގ ޖަހައިދިންއިރު އާސެނަލްގެ ތިންވަނަ ލަނޑު އޭގެ ތިން މިނެޓުފަހުން ލިބުނު ޕެނަލްޓީއަކުން ކާމިޔާބު ކޮށްދިނީ އެލެކްޒެންޑްރާ ލަކަޒެޓްއެވެ.

ޕްރިމިއާ ލީގުގައި ކުޅުނު 31 މެޗުން ލިބުނު 51 ޕޮއިންޓާއެކު ތާވަލުގެ ހަވަނައިގައި އާސެނަލް އޮތްއިރު 32 މެޗުން ލިބުނު 27 ޕޮއިންޓާއެކު ސްޓޯކް އޮތީ ތާވަލުގެ 19 ވަނައިގައެވެ. ޕްރިމިއާ ލީގުގައި އާސެނަލް ދެން ކުޅޭ މެޗުގައި ސައުތުހެމްޕްޓަންއާ ދެކޮޅަށް ނުކުންނައިރު ސްޓޯކް ނުކުންނާނީ ޓޮޓެންހަމްއާ ދެކޮޅަށެވެ.