ޕްރިމިއާ ލީގު: ސްވަންސީ ބަލިކޮށް ޔުނައިޓެޑް ދެވަނައިގައި ހަމަޖެހިލައިފި

އިނގިރޭސި ޕްރިމިއާ ލީގުގައި ސްވަންސީ ސިޓީއާ ދެކޮޅަށް ކުޅުނު މެޗު ކާމިޔާބުކޮށް މެންޗެސްޓާ ޔުނައިޓެޑް ހަމަޖެހިލައިފިއެވެ.

އަމިއްލަ ދަނޑުގައި ކުޅުނު މި މެޗު ޔުނައިޓެޑްއިން ކާމިޔާބުކުރީ 2-0 ގެ ނަތީޖާއަކުންނެވެ. މި ސީޒަނުގެ ޕްރިމިއާ ލީގުގެ ތަށި ޔުނައިޓެޑަށް ލިބޭނެ ކަމުގެ ފުރަސަތު އެ ޓީމަށް އެއްކޮށް ގެއްލިފައިވާއިރު އެ ޓީމުން މިހާރު ކުޅެމުން އަންނަނީ ގަދަ ހަތަރެއްގެ ޖާގައެއް ޔަގީން ކުރުމަށެވެ. ޔުނައިޓެޑް އެންމެފަހުން ކުޅުނު މެޗުގައި އެ ޓީމުގެ ފުރަތަމަ އެގާރާގައި ހިމެނިގެން ކުޅުނު ތިން ކުޅުންތެރިޔަކަށް މި މެޗުގައި ފުރުސަތު ދީފައިނުވާއިރު ޕައުލް ޕޮގްބާ ވަނީ ގިނަ މެޗުތަކަކަށް ފަހު އެ ޓީމުގެ ފުރަތަމަ އެގާރާގައި ހިމެނިގެން މި މެޗުގައި ކުޅެފައެވެ.

ފުރަތަމަ ހާފު ފެށިގެން ޔުނައިޓެޑްގެ ފަރާތުން މޮޅު ކުޅުމެއް ފެނިގެންދިޔައިރު އެ ޓީމުން ވަނީ ފަސް މިނެޓު ނުވަނީސް މެޗުގެ ފުރަތަމަ ލަނޑު ޖަހާ ލީޑު ނަގާފައެވެ. މި ލަނޑު އެލެކްސިސް ސަންޗޭޒް ތަނަވަސްކޮށްދިން ފުރުސަތަކުން އެ ޓީމަށް ޖަހައިދިނީ ރޮމެލޫ ލުކާކޫއެވެ. ޔުނައިޓެޑްއިން ވަނީ 20 ވަނަ މިނެޓުގައި ލަނޑެއް ޖަހާ އެ ޓީމުގެ ލީޑު ފުޅާކޮށްފައެވެ. ޖެސޭ ލިންގާޑްގެ އެހީތެރިކަމާއެކު އެ ޓީމަށް މި ލަނޑު ޖަހައިދިނީ ސަންޗޭޒްއެވެ. މި ލަނޑަށް ފަހު ވެސް ޔުނައިޓެޑްއިން ވަނީ ރީތި ކުޅެމެއް ދައްކައި ލަނޑު ޖެހުމަށް ހުސް ގިނަ ފުރުސަތުތަކެއް ތަނަވަސްކޮށްފައެވެ. މެޗުގެ 41 ވަނަ މިނެޓުގައި ވެސް އެ ޓީމުން ލަނޑެއް ޖެހިއިރު އެ ރެފްރީ ނިންމާފައިވަނީ އެއީ އޮފްސައިޑް ލަނޑެއްގެ ގޮތުގައެވެ.

ދެ ލަނޑުގެ ލީޑެއްގައި އޮވެ ޔުނައިޓެޑްއިން ފުރަތަމަ ހާފު ނިންމާލިއިރު އެ ޓީމުން ވަނީ ސްވަންސީއިން ވަނީ ދެވަނަ ހާފުގައި އެ ޓީމުގެ ކުޅުން ރަނގަޅުކޮށް ހަމަލާ އުފައްދާފައެވެ. އެހެން ނަމަވެސް ޔުނައިޓެޑްގެ ކީޕަރު ޑޭވިޑް ޑެހޭއާ ވަނީ މި ހާފުގައި މޮޅު ސޭވްތަކެއްކޮށް ޔުނައިޓެޑްގެ ގޯލަށް ލަނޑެއް ވަނަ ނުދީ ހިފަހައްޓާފައެވެ.

ޕްރިމިއާ ލީގުގައި ކުޅުނު 31 މެޗުން ލިބުނު 68 ޕޮއިންޓާއެކު ތާވަލުގެ ދެވަނައިގައި މެންޗެސްޓާ ޔުނައިޓެޑް އޮތްއިރު ސްވަންސީ އޮތީ 31 ޕޮއިންޓާއެކު ތާވަލުގެ 15 ވަނައިގައެވެ. ކުރިޔަށް އޮތް މެޗުގައި މެންޗެސްޓާ ސިޓީއާ ދެކޮޅަށް ޔުނައިޓެޑް ނުކުންނައިރު ސްވަންސީ ނުކުންނާނީ ވެސްޓް ބްރޮމްއާ ދެކޮޅަށެވެ.