ގައުމީ ޓީމަށް ކުޅެމުން އަންނަ ގްރީން ސްޓްރީޓްސްގެ ތަޖުރިބާކާރު މިޑްފީލްޑަރު އަސްހަދު އަލީ (އަޑުބަރޭ) ގައުމީ ޓީމުން ރިޓަޔާކޮށްފިއެވެ.

ގައުމީ ޓީމުން އަޑުބަރޭ ރިޓަޔާކުރިކަން އޭނާ ވަނީ ޓްވީޓެއް މެދުވެރިކޮށް ކަށަވަރުކޮށްދީފައެވެ. މިރޭ ބޫޓާނާ ދެކޮޅަށް ކުޅޭ މެޗުގައި ވެސް ގައުމީ ޓީމުގެ ކެޕްޓަން ބޭންޑް ހަވާލުކޮށްފައި ވަނީ އަޑުބަރޭއާއެވެ. އޭނާ ވަނީ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ގައުމީ ޓީމުގެ ކޯޗު ޕީޓާރ ސެގެޓްއާ އެކު ބައިވެރި ވެސް ވެފައެވެ. ސެގެޓް ވަނީ ނޫސްވެރިންގެ ބައްދަލުވުމުގައި އަޑުބަރޭއަށް ތައުރީފުކޮށް ވާހަކަ ވެސް ދައްކާފައެވެ.

އަޑުބަރޭއަށް މި މެޗުގެ ކެޕްޓަން ބޭންޑް ހަވާލުކުރީ މެޗުގެ ކުރިން ބޭއްވި ނޫސްވެރިންގެ ބައްދަލުވުމަށް ކެޕްޓަން އަލީ އަޝްފާގު (ދަގަނޑޭ) ހާޒިރުނުވުމާ ގުޅިގެން ސްކޮޑުން އޭނާ ބާކީކުރުމާ ގުޅިގެންނެވެ. ނަމަވެސް އަޑުބަރޭ ރިޓަޔަމަންޓް އިއުލާނުކުރުމުން މިރޭގެ މެޗުގައި އޭނާ ފެނިގެން ނުދާނެއެވެ. ދަގަނޑޭ ބާކީކުރުމާ ގުޅިގެން އަޑުބަރޭ ވެސް ހިތްހަމަނުޖެހުން ފާޅުކުރިއިރު އެ މައްސަލައިގައި އޭނާގެ އަތުން ކެޕްޓަން ބޭންޑް ވެސް އަތުލިކަން ވަނީ އެނގިފައެވެ. މި މެޗުގެ ކުރިން އެފްއޭއެމް ހައުސްގައި ބޭއްވި ޓީމު ބައްދަލުވުމުގައި ވެސް އަޑުބަރޭ ބައިވެރިވެފައެއް ނުވެއެވެ. އެހެންކަމުން މި މެޗުގައި ގައުމީ ޓީމުގެ ކެޕްޓަން ބޭންޑް އަޅާނީ ނިއު ރޭޑިއަންޓްގެ ޑިފެންޑަރު އަކްރަމް އަބްދުލް ޣަނީއެވެ.

ދަގަނޑޭ ފަހަތުން ފަހުގެ ތާރީހުގައި ގައުމީ ޓީމުގެ ކެޕްޓަން ބޭންޑް އެންމެ ގިނަ ފަހަރު އެޅި ކުޅުންތެރިޔަކީ އަޑުބަރޭއެވެ. އޭނާއަކީ ގައުމީ ޓީމުގެ މައި ތަނބަކަށްވާއިރު އޭނާ ވަނީ ގައުމީ ޓީމަށް 50 އަށް ވުރެ ގިނަ މެޗު ކުޅެދީފައެވެ. ހަމައެހެންމެ އޭނާއަކީ ގައުމީ ޓީމާއެކު ދުނިޔޭގެ ސަމާލުކަން ވެސް ހޯދާފައިވާ ކުޅުންތެރިއެކެވެ. އެގޮތުން 2014 ރާއްޖޭގައި ބޭއްވި އޭއެފްސީ ޗެލެންޖް ކަޕްގައި އަފްޣާނިސްތާނު ކޮޅަށް އޭނާ ޖެހި ޕެނަލްޓީއަށް ޔޫޓިއުބްގައި 12 މިލިއަނަށް ވުރެ ގިނަ ވިއުސް ލިބިފައިވެއެވެ. އަދި ދުނިޔެއިން ވެސް އެންމެ ފާހަގަކޮށްލެވޭ ޕެނަލްޓީތަކުގެ ތެރޭގައި އެ ޕެނަލްޓީ ހިމެނެއެވެ.