ބްރެޒިލް އަދި ޖަރުމަނަކީ ވެސް ހަމަހަމަ ދެ ޓީމު: އަލްވޭސް

ބައިނަލްއަގްވާމީ ރަހުމަތްތެރިކަމުގެ މެޗަށް ޖަރުމަނާއި ދެކޮޅަށް ނުކުންނައިރު ބްރެޒިލް އަދި ޖަރުމަނަކީ ވެސް ހަމަހަމަ ދެ ޓީމު ކަމަށް ބްރެޒިލްގް ޑިފެންޑަރު ޑެނީ އަލްވޭސް ބުނެފިއެވެ.

އަންގާރަ ދުވަހުގެ ރޭ ޖަރުމަނުގެ ބާލިން ނެޝެނަލް ސްޓޭޑިއަމްގައި މި ދެ ޓީމު ރަހުމަތްތެރިކަމުގެ މެޗެއް ކުޅޭނެއެވެ. މިއީ 2014 ވަނަ އަހަރު ބްރެޒިލްގައި ބޭއްވި ވޯލްޑް ކަޕްގެ ސެމީ ފައިނަލުގައި 7-1 ގެ ލަދުވެތި ނަތީޖާއަކުން ބްރެޒިލް ކެޓި މެޗަށް ފަހު މި ދެ ޓީމު ބައިނަލްއަގްވާމީ މެޗެއްގައި ވާދަކުރާ ފުރަތަމަ ފަހަރެވެ. މި ދެ ޓީމަކީ ވެސް މިއަހަރު ރަޝިއާގައި އޮންނަ ވޯލްޑް ކަޕްގެ ފެވަރިޓުންގެ ގޮތުގައި ގިނަ ބަޔަކު ދެކޭ ދެ ޓީމެވެ.

މި މެޗުގައި ބްރެޒިލްގެ ކެޕްޓަން ބޭންޑް ހަވާލުކުރެވިފައިވާ ޑެނީ އަލްވޭސް ބުނެފައިވަނީ އަބަދު ވެސް މި ފެންވަރުގެ ޓީމަކާއި ދެކޮޅަށް ނުކުންނައިރު އުނދަގޫތަކެއް ހުންނާނެ ކަމަށާއި މި މެޗު ސިފަކުރެވެނީ ބާސެލޯނާ އަދި ރެއާލް މެޑްރިޑާ ދެމެދު އޮންނަ ވާދަވެރިކަމާއި އެއް ފެންވަރެއްގެ މެޗެއްގެ ގޮތުގައި ކަމަށެވެ. އަލްވޭސް ވަނީ މި މެޗަކީ "ވޯލްޑް ފްރެންޑްލީ" އެއްގެ ގޮތުގައި ސިފަކޮށްފައެވެ. އަލްވޭސް ބުނީ މީގެކުރިން ވެފައިވާ ކަންކަން ބަދަލު ނުކުރެވޭނެ ކަމަށާއި އެހެން ނަމަވެސް މި މެޗުން ރަނގަޅު ނަތީޖާއެއް ނެރުން އޮތީ އަމިއްލަ އަތްމަތީގައި ކަމަށެވެ.

އަލްވޭސް ބުނީ ޖަރުމަނާއި ދެކޮޅަށް ކުޅެފައިވާ އެކިއެކި މެޗުތަކުގެ ވަރަށް ރަނގަޅު ހަނދާންތައް އެބަހުރި ކަމަށާއި މިހާރު އެ ޓީމަކީ މުޅިން ތަފާތު ޓީމެއް ކަމަށެވެ. އޭނާ ބުނީ މިއީ ބޮޑު ޗެލެންޖެއްގެ ގޮތުގައި ދެކޭ ކަމަށާއި މި މެޗަކީ އެއްވެސް ޓީމަކަށް ފަސޭހަ މެޗަކަށް ވާނެ ކަމަށް ގަބޫލުނުކުރާ ކަމަށެވެ.

ބްރެޒިލްގެ ކޯޗުކަމާއި ހަވާލުވުމަށް ފަހު ޓީޓޭ ނިންމާފައިވަނީ ކެޕްޓަނެއް ނުހޮވުމަށެވެ. އެގޮތުން ކޮންމެ މެޗެއްގައި ވެސް އެ ޓީމުގެ ކެޕްޓަން ބޭންޑް އަޅަމުންދަނީ އޭގެކުރިން ކުޅޭ މެޗުގައި ކެޕްޓަން ބޭންޑް އަޅާފައިނުވާ ކުޅުންތެރިޔެކެވެ. މި މެޗު ވެގެންދާނީ ޓީޓޭގެ ކޯޗުކަމުގެ ދަށުގައި އަލްވޭސް ބްރެޒިލްގެ ކެޕްޓަން ބޭންޑް އަޅައިގެން ނުކުންނަ ހަތަރު ވަނަ މެޗަށެވެ.

އަލްވޭސް ބުނީ އާ ކޯޗާއެކު ޓީމަށް ބޮޑު ބަދަލުތަކެއް އައިސްފައިވާ ކަމަށާއި ޓީމުގެ ކުޅުން ގާތުން ބަލަމުން އަންނަ ކޮންމެ މީހަކަށް ވެސް އެކަން ފާހަގަވާނެ ކަމަށެވެ. އޭނާ ބުނީ ފަރިތަކުރަނީ މިފަދަ ބޮޑު މެޗުތަކަށް ކަމަށާއި އުއްމީދު ކުރަނީ ވާދަވެރި މެޗެއް ކުޅުމަށް ކަމަށެވެ. އޭނާ ބުނީ މި މެޗު ވާނީ ބޮޑު އިމްތިހާނަކަށް ކަމަށާއި ކައިރި މުސްތަގުބަލުގައި މިފަދަ ގިނަ މެޗުތަކެއް ކުޅެން ޖެހޭނެކަން އިނގޭ ކަމަށެވެ. މި ދެ ޓީމު އަނެއްކާ ވެސް ބޮޑު މެޗަކަށް ނުކުންނައިރު ތާރީހު ބުރަވަނީ ބްރެޒިލް ކޮޅަށެވެ. އެގޮތުން ޖުމްލަ 22 ފަހަރެއްގެ މަތިން މި ދެ ޓީމު ބައްދަލުކޮށްފައިވާއިރު އޭގެތެރެއިން 12 މެޗުން މޮޅުވެފައިވަނީ ބްރެޒިލްއެވެ. ފަސް މެޗުން ޖަރުމަނު މޮޅުވެފައިވާއިރު ފަސް މެޗު ވަނީ އެއްވަރުވެގެން ނިމިފައެވެ.