ބައިނަލްއަގްވާމީ ރަހުމަތްތެރިކަމުގެ މެޗެއްގައި ނެދަލޭންޑްސްއާ ދެކޮޅަށް ކުޅުނު މެޗުން ޕޯޗުގަލް ބަލިވެއްޖެއެވެ.

އަމިއްލަ ގައުމުގައި ކުޅުނު މި މެޗުން ޕޯޗުގަލް ބަލިވެފައިވަނީ 3-0 ގެ ނަތީޖާއަކުންނެވެ. މި މެޗާއި ޕޯޗުގަލްއިން ކުރިމަތިލީ އެ ޓީމު އެންމެފަހުން ކުޅުނު ބައިނަލްއަގްވާމީ އަށް މެޗުން ވެސް ބަލިނުވުމުގެ ރެކޯޑަކާއެކުއެވެ. އެ އަށް މެޗުގެ ތެރެއިން އެ ޓީމު ހަތް މެޗު ކާމިޔާބުކުރިއިރު އެއް މެޗު ނިމިފައިވަނީ އެއްވަރުވެގެންނެވެ. ހަމައެހެންމެ ނެދަލޭންޑްސް އެންމެފަހުން ކުޅުނު ހަ މެޗުގެ ތެރެއިން ފަސް މެޗުން އެ ޓީމު މޮޅުވިއިރު މިދިޔަ ހަފްތާގައި އިނގިރޭސިވިލާތް އަތުން އެ ޓީމު ވަނީ އަމިއްލަ ދަނޑުގައި ބަލިވެފައެވެ. މިސްރު އަތުން މޮޅުވި ޕޯޗުގަލްގެ ޓީމަށް އެ ޓީމުގެ ކޯޗު ފެނާންޑޯ ސަންޓޯސް ވަނީ ނުވަ ބަދަލެއް ގެނެސްފައެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ރަނގަޅު ކުޅުމެއް ފެނިގެންދިޔައިރު ދެ ޓީމުން ވަނީ ހަމަލާ އުފެއްދުމަށް މަސައްކަތް ކޮށްފައެވެ. މި މެޗުގެ ފުރަތަމަ ލަނޑު ޖަހާ ލީޑު ނެގީ ނެދަލޭންޑްސްއިންނެވެ. އެގޮތުން މެޗުގެ 11 ވަނަ މިނެޓުގައި އެ ޓީމުގެ ފުރަތަމަ ލަނޑު ޖަހައިދިނީ މެމްފިސް ޑިޕޭއެވެ. މި ލަނޑަށް ފަހު ނެދަލޭންޑްސްއިން މެޗުގެ ކޮންޓްރޯލް ނެގިއިރު އެ ޓީމުން ވަނީ 32 ވަނަ މިނެޓުގައި ލީޑު ފުޅާކޮށްފައެވެ. މި ލަނޑު އެ ޓީމަށް ޖަހައިދިނީ ރަޔާން ބަބެލްއެވެ. ނެދަލޭންޑްސްއިން ތަކުރާރުކޮށް އުފައްދަމުން ދިޔަ ހަމަލާތަކުގެ ނަތީޖާއެއްގެ ގޮތުން މެޗުގެ ފުރަތަމަ ހާފުގެ އިތުރު ވަގުތުގެ ތެރޭގައި ވާޖިލް ވެންޑައިކް ވަނީ އެ ޓީމުގެ ތިންވަނަ ލަނޑު ޖަހައިދީފައެވެ. މިއީ ނެދަލޭންޑްސްގެ ގައުމީ ޓީމަށް އޭނާ ޖަހައިދިން ފުރަތަމަ ލަނޑެވެ.

ތިން ލަނޑުގެ ލީޑެއްގައި އޮވެ ނެދަލޭންޑްސްއިން ފުރަތަމަ ހާފު ނިންމާލިއިރު ދެވަނަ ހާފުގައި ދެ ޓީމުން ވެސް ވަނީ ގިނަ ބަދަލުތަކެއް ފެނިގެންގޮސްފައެވެ. މި ހާފުގައި ޕޯޗުގަލްއިން އެ ޓީމުގެ ކުޅުން ރަނގަޅުކުރިއިރު އެ ޓީމަށް ވަނީ ނަތީޖާގެ ފަރަގު ކުޑަކުރުމަށް ރަނގަޅު ފުރުސަތުތަކެއް ލިބި ބޭކާރުވެފައެވެ. ޕޯޗުގަލްއަށް ނަތީޖާ ބަދަލުކޮށްލުމަށް އިތުރު ހުރަސްތަކަކާއި ކުރިމަތިވެގެންދިޔައީ މެޗުގެ 61 ވަނަ މިނެޓުގައި އެ ޓީމިގެ ޑިފެންޑަރު ޖޯ ކެންސީލޯއަށް ރަތް ކާޑު ދައްކައި ދަނޑުން ފޮނުވާލުމާއެކުއެވެ. ދެވަނަ ހާފުގައި ނެދަލޭންޑްސްގެ އުއްމީދީ ފޯވާޑް ޖަސްޓިން ކުލިވާޓް ވަނީ ކުޅެން ނުކުމެފައެވެ. މިއީ އުމުރުން 18 އަހަރުގެ ފޯވާޑް ގައުމީ ޓީމަށް ކުޅުނު ފުރަތަމަ މެޗެވެ.

މި މެޗާއެކު ޖެހިޖެހިގެން ނުވަ މެޗުގައި ކްރިސްޓިއާނޯ ރޮނާލްޑޯ ލަނޑު ޖެހުމުގެ ސިލްސިލާއަށް ވަނީ ނިމުމެއް އައިސްފައެވެ. ހަމައެހެންމެ މި މެޗަކީ މި ސީޒަނުގެ މިހާތަނަށް އެއްވެސް ހަމާލައެއް ގޯލާއި އަމާޒުނުވެ ރޮނާލްޑޯ ނިންމާލަން ޖެހުނު ފުރަތަމަ މެޗެވެ.

ޔޫރަޕުގެ ޗެމްޕިއަނުންގެ ގޮތުގައި ޕޯޗުގަލް މި މެޗާއި ކުރިމަތިލިއިރު މިއަހަރު ރަޝިއާގައި އޮންނަ ވޯލްޑް ކަޕަށް ތައްޔާރުވުމަށް އެ ޓީމު އަންނަނީ ގިނަ މަސައްކަތްތަކެއް ކުރަމުންނެވެ. މިއަހަރުގެ ވޯލްޑް ކަޕަށް ނެދަލޭންޑްސް ކޮލިފައިވެފައިނުވާއިރު އެ ޓީމުން އަންނަނީ ޒުވާން ގިނަ ކުޅުންތެރިންތަކަކަށް ފުރަތަމަ އެގާރައިން ފުރުސަތު ދެމުންނެވެ.