ހީލަތް ހެދުމާއި ވައްކަން އިތުރުވެ، 200 މީހަކަށް މިދިޔަ އަހަރު ދައުވާކޮށްފައިވޭ
25 މާރިޗު 2018 | އާދީއްތަ 13:50އެންމެ ގިނައީ މަސްތުވާތަކެތީގެ ދައުވާ
މީހަކު ބިޑިއަޅުވާފައި: މިދިޔަ އަހަރު 4،004 މީހަކަށް ދައުވާ ކުރި
މަކަރާއި ހީލަތް ހެދުމާއި ވައްކަން ކުރުމުގެ މައްސަލަތައް އިތުރުވެ، އެފަދަ މައްސަލަތަކުގައި މިދިޔަ އަހަރު ދައުވާ އުފުލުނު މީހުންގެ އަދަދު 200 އަށް ވުރެ އިތުރުވެއްޖެ އެވެ.
ޕްރޮސެކިއުޓާ ޖެނަރަލް (ޕީޖީ) އޮފީހުގެ ތަފާސް ހިސާބުތަކުން ދައްކާ ގޮތުން ރާއްޖޭގައި އެންމެ ގިނަ މީހުންގެ މައްޗަށް ދައުވާ އުފުލަނީ މަސްތުވާތަކެތީގެ މައްސަލަތަކުގަ އެވެ. މިދިޔަ އަހަރު ދެ ވަނައަށް އެންމެ ގިނަ މީހުންނަށް ދައުވާ އުފުލާފައި ވަނީ މަކަރާއި ހީލަތް ހެދުމުގެ ކުށުގައެވެ. ތިން ވަނަ އަށް އެންމެ ގިނަ މީހުންގެ މައްޗަށް މިދިޔަ އަހަރު ދައުވާ އުފުލާފައި ވަނީ ވައްކަން ކުރުމުގެ ކުށުގައެވެ. މަކަރާއި ހީލަތް ހެދުމާއި ވައްކަން ކުރުމުގެ ކުށުގައި މިދިޔަ އަހަރު އެކަނިވެސް 235 މީހަކަށް ދައުވާ އުފުލާފައިވެއެވެ. ނަމަވެސް އޭގެ ކުރީ އަހަރު، 2016 ވަނަ އަހަރު އެފަދަ މައްސަލަތަކުގައި ދައުވާ އުފުލުނު މީހުންގެ އަދަދަކީ 128 އެވެ.
ޕީޖީ އޮފީހުގެ މިދިޔަ އަހަރުގެ އަހަރީ ރިޕޯޓުގައި ބުނެފައިވާ ގޮތުން 2017 ވަނަ އަހަރު އެކަނި ވެސް މަކަރާއި ހީލަތް ހެދުމުގެ ތުހުމަތުގައި 120 މީހުންގެ މައްޗަށް ދައުވާ އުފުލާފައިވެ އެވެ. ނަމަވެސް އޭގެ ކުރީ އަހަރު، 2016 ވަނަ އަހަރު މަކަރާއި ހީލަތް ހެދުމުގެ ތުހުމަތުގައި ދައުވާކޮށްފައި ވަނީ 46 މީހެއްގެ މައްޗަށެވެ. ތަފާސް ހިސާބުން ދައްކާ ގޮތުން އެފަދަ މައްސަލަތަކުގައި ދައުވާ އުފުލުނު އަދަދު އެ ވަނީ ދެގުނައަށް ވުރެ އިތުރުވެފައެވެ.
ވައްކަން ކުރުމުގެ ކުށުގައި ދައުވާ އުފުލުނު މީހުންގެ އަދަދު ވެސް މިދިޔަ އަހަރު ވަނީ އިތުރުވެފަ އެވެ. ޕީޖީ އޮފީހުން އާންމުކޮށްފައިވާ ތަފާސް ހިސާބުން ދައްކާ ގޮތުން ވައްކަން ކުރުމަކީ ރާއްޖޭގައި ހަތަރު ވަނައަށް އެންމެ ގިނަ މީހުންގެ މައްޗަށް ދައުވާ އުފުލާ ކުށެވެ. އެގޮތުން މިދިޔަ އަހަރު އެކަނި ވެސް ވައްކަން ކުރުމުގެ ކުށުގައި 115 މީހެއްގެ މައްޗަށް ދައުވާ އުފުލާފައިވެ އެވެ. ނަމަވެސް އޭގެ ކުރީއަހަރު، 2016 ވަނަ އަހަރު ވައްކަން ކުރުމުގެ ކުށުގައި ދައުވާ އުފުލާފައި ވަނީ 82 މީހަކަށެވެ.
މިދިޔަ މަހު އާންމު ކުރި ޕީޖީ އޮފީހުގެ އަހަރީ ރިޕޯޓުން ދައްކާ ގޮތުން، އެންމެ ގިނައިން ދައުވާކޮށްފައި މަސްތުވާތަކެތީގެ މައްސަލަތަކުގައެވެ. މިދިޔަ އަހަރު ކެނަބިސް ބޭނުން ކުރުމުގެ ކުށުގައި 518 މީހުންގެ މައްޗަށް ދައުވާ އުފުލާފައިވާއިރު، ޑައިމޯފިން ބޭނުން ކުރުމުގެ ކުށުގެ ދައުވާ 375 މީހުންގެ މައްޗަށް އުފުލާފައިވެއެވެ.
ޕީޖީ އޮފީހުގެ އަހަރީ ރިޕޯޓުގެ ތަފާސް ހިސާބުން ދައްކާ ގޮތުން، މިދިޔަ އަހަރު 4،004 މީހުންގެ މައްޗަށް ދައުވާ އުފުލާފައިވެއެވެ. ޖިނާއީ ކުށް ކުރުމުގެ ކުށުގައި މިދިޔަ އަހަރު ދައުވާ އުފުލާފައިވާ އަންހެނުންގެ އަދަދަކީ 149 އެވެ. ޖިނާއީ ކުށްކޮށްގެން 93 ކުޑަކުއްޖަކަށް ވެސް މިދިޔަ އަހަރު ދައުވާ އުފުލާފައިވެއެވެ.
މަކަރާއި ހީލަތް ހެދުމާއި ވައްކަން ކުރުމުގެ ކުށަކީ މިދިޔަ އަހަރު އެންމެ ގިނައިން ދައުވާ ކުރި ކުށްތަކުގެ ތެރޭގައި ހިމެނޭއިރު، ކޮރަޕްޝަންގެ މައްސަލަތަކުގައި ރެކޯޑު އަދަދަކަށް ފައިސާ ހޯދުމަށް ޕީޖީ އޮފީހަށް މިދިޔަ އަހަރު ވަނީ ފޮނުވާފައެވެ. އެގޮތުން ކޮރަޕްޝަންގެ މައްސަލަތަކުގައި 1.3 ބިލިއަން ރުފިޔާ ދައުލަތަށް ހޯދުމަށް އޭސީސީން މިދިޔަ އަހަރު ޕީޖީ ވަނީ ފޮނުވާފައެވެ.
