ނިއުރޯއެންޑޮކްރައިން ޓިއުމާ (ނެޓްސް) ނުވަތަ ބަނޑުގެ ކެންސަރު ޖެހިފައިވާ ބޮލީވުޑްގެ ތަރި އިރްފާން ޚާން އިތުރު ފަރުވާއަށް ލަންޑަނަށް ފުރައިފިއެވެ.
އޭނާ ލަންޑަނަށް ފުރާފައިވަނީ މިދިޔަ އާދީއްތަ ދުވަހުގައި ކަމަށް އިންޑިއާގެ ނޫސްތަކުގައި ވަނީ ރިޕޯޓް ކޮށްފައެވެ.
އިރުފާން އޭނާގެ ބައްޔާމެދު ކޮށްފައިވާ ޓްވީޓެއްގައި ބުނެފައިވަނީ އޭނާ އަށް ނިއުރޯއެންޑޮކްރައިން ޓިއުމާ (ނެޓްސް) ޖެހިފައިވާ ކަމަށާއި އެއީ ބަނޑަށް ޖެހޭ ކެންސަރުގެ ބާވަތެއް ކަމަށެވެ. އަދި އެކަމަށް ފަރުވާ ހޯދުމަށް އިންޑިއާ ނޫން އެހެން ގައުމަކަށް ދާންޖެހިފައިވާ ކަމަށް އިރުފާނު ވަނީ ބުނެފައެވެ. އިރުފާން ބުނީ އޭނާ ބޭނުންވަނީ އެކަމުގައި އޭނާގެ ފޭނުންނާއި އާންމުންގެ ހެޔޮ ދުއާ ކަމަށެވެ.
ޚަބަރުތައް ބުނާގޮތުގައި އިރްފާން އިތުރު ފަރުވާ ހޯދުމަށް ލަންޑަނަށް ފުރިއިރު އޭނާގެ ހާލަތު "ނޯމަލް"އެވެ.
އޭނާއަށް ލަންޑަނުގައި ފަރުވާދެނީ އިންޑިއާ ޑޮކްޓަރެއްކަމަށާއި ޖެހިފައިވާ ބަލި ރަނގަޅު ކުރެވޭނެކަމަށް ޑޮކްޓަރުން ބުނެފައިވާކަމަށް ރިޕޯޓްތައް ބުނެއެވެ. އެހެންކަމުން ލަންޑަނުގައި އޭނާ ބަލި އެއްކޮށް ރަނގަޅުވަންދެން ހުންނާނެއެވެ.
އިރްފާން ބަލިވުމުގެ ސަބަބުން އޭނާކުޅެން ހަމަޖެހިފައިވާ ފިލްމުތަކުގެ ޝޫޓިންތައް ވަނީ މަޑުޖައްސާލަން ޖެހިފައެވެ. އެގޮތުން އޭނާ ބަލިވެފައި ވަނީ ދީޕިކާ ޕަދުކޯން އާ އެކު ވިޝާލް ބަރްދްވާޖްގެ ފިލްމުގެ ޝޫޓިން ފެށުމަށް ތައްޔާރުވެފައި ވަނިކޮށެވެ.އެ ފިލްމުގެ ޝޫޓިން ވަނީ މިހާރު ފަސްކޮށްފައެވެ.
