ފްރެންޗް ލީގު: އަލްވޭސްގެ ލަނޑުން ޕީއެސްޖީ ސަލާމަތްވެއްޖެ

ފްރެންޗް ލީގުގައި ނީސްއާ ދެކޮޅަށް ޕީއެސްޖީ ކުޅުނު މެޗުގެ ފަހު ވަގުތުކޮޅުގެ ތެރޭގައި ޑެނީ އަލްވޭސް ޖެހި ލަނޑުން އެ ޓީމު މޮޅުވެއްޖެއެވެ.

ރަށުން ބޭރުގައި ނީސްއާ ދެކޮޅަށް ކުޅުނު މެޗުން ފަހަތުން އަރައި ޕީއެސްޖީ މޮޅުވީ 2-1 ގެ ނަތީޖާއަކުންނެވެ. ސަސްޕެންޝަނުގެ ސަބަބުން ތިއާގޯ މޮޓާ މި މެޗުގައި ކުޅެފައިނުވާއިރު ލޭވިން ކުރުޒަވާ އަދި ކެވިން ޓްރެޕްވެސް މި މެޗުގައި ފެނިގެން ގޮސްފައެއް ނުވެއެވެ. އެ ކުޅުންތެރިންގެ ބަދަލުގައި ޕީއެސްޖީގެ ފުރަތަމަ އެގާރައިން ފެނިގެން ގޮސްފައިވަނީ ޒުވާން ކުޅުންތެރިންނެވެ.

ފުރަތަމަ ހާފު ފެށިގެން ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔައިރު ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން މެޗުގެ ހަތްވަނަ މިނެޓުގައި މާރިއޯ ބަލޮޓެލީގެ ހަމަލާއެއް ޕީއެސްޖީގެ ގޯލުގެ ދަނޑިއަށް އަމާޒުވިއިރު 14 ވަނަ މިނެޓުގައި އެޑިންސަން ކަވާނީ ފޮނުވާލި ހަމަލާއެއް ވެސް ގޯލުގެ ދަނޑީގައި ޖެހިފައިވެއެވެ. މެޗުގެ ފުރަތަމަ ލަނޑު 17 ވަނަ މިނެޓުގައި ނީސްއަށް ޖަހައިދިނީ ސެއިންޓް މެކްސިމިންއެވެ. އެހެން ނަމަވެސް އޭގެ ހަތަރު މިނެޓު ފަހުން އެންހެލް ޑިމަރިއާ ވަނީ ލަނޑެއް ޖަހާ ޕީއެސްޖީއަށް ނަތީޖާ ހަމަހަމަކޮށްދީފައެވެ. މި ހާފުގެ ބާކީ ބައިގައި ދެ ޓީމުން ވެސް ވަނީ ފޯރިގަދަ ކުޅުމެއް ދައްކާފައެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެ ޓީމުން ވެސް ވަނީ ދެވަނަ ހާފުގައި ނަތީޖާ ބަދަލުކުރުމަށް ހުސް ގިނަ ފުރުސަތުތަކެއް ތަނަވަސްކޮށްފައެވެ. މެޗުގެ 57 ވަނަ މިނެޓުގައި ކިލިއަން އެމްބާޕޭ ލަނޑެއް ޖެހި ނަމަވެސް ރެފްރީ ނިންމާފައިވަނީ އެއީ އޮފްސައިޑް ލަނޑެއްގެ ގޮތުގައެވެ. ބަލޮޓެލީގެ ހަމަލާއެއް 77 ވަނަ މިނެޓުގައި ޕީއެސްޖީގެ ހުރަސް ދަނޑިއަށް ދެވަނަ ފަހަރަށް އަމާޒުވިއިރު މެޗުގެ 82 ވަނަ މިނެޓުގައި ޕީއެސްޖީއިން ވަނީ މެޗުގެ ފުރަތަމަ ލަނޑު ޖަހާ ލީޑު ނަގާފައެވެ. މި ލަނޑު އެ ޓީމަށް ޖަހައިދިނީ ބްރެޒިލްގެ ޑިފެންޑަރު ޑެނީ އަލްވޭސްއެވެ.

މި މެޗުން މޮޅުވުމާއެކު ޕީއެސްޖީއިން ވަނީ ޖެހިޖެހިގެން ނުވަ މެޗު ކާމިޔާބުކޮށްފައެވެ. ފްރެންޗް ލީގުގައި ކުޅުނު 31 މެޗުން ލިބުނު 83 ޕޮއިންޓާއެކު ޕީއެސްޖީ އެއްވަނައިގައި އޮތްއިރު އެއް މެޗު މަދުން ކުޅެގެން 66 ޕޮއިންޓާއެކު ދެވަނައިގައި އޮތީ މޮނާކޯއެވެ. ތިންވަނައިގައި 59 ޕޮއިންޓާއެކު މާސޭ އޮތްއިރު 57 ޕޮއިންޓާއެކު ހަތަރު ވަނައިގައި އޮތީ ލިޔޯންއެވެ.