އިނގިރޭސި އެފްއޭ ކަޕްގެ ކުއާޓާ ފައިނަލުގައި ސްވަންސީ ސިޓީ ބަލިކޮށް ޓޮޓެންހަމްއިން ސެމީގެ ޖާގައެއް ކަށަވަރުކޮށްފިއެވެ.
ރަށުން ބޭރުގައި ކުޅުނު ކުއާޓާގެ މެޗު ޓޮޓެންހަމްއިން ކާމިޔާބުކުރީ 3-0 ގެ ނަތީޖާއަކުންނެވެ. މި މެޗާއި ޓޮޓެންހަމްއިން ކުރިމަތިލިއިރު އެ ޓީމު އެންމެފަހުން ސްވަންސީއާ ދެކޮޅަށް ކުޅުނު 15 މެޗުގެ ތެރެއިން އެއްވެސް މެޗަކުން ބަލިވެފައެއް ނުވެއެވެ. މި މެޗުގައި އަނިޔާގެ ސަބަބުން ޓޮޓެންހަމްގެ ފޯވާޑް ހެރީ ކޭންއަށް ކުޅެވިފައިނުވާއިރު އެ ޓީމުގެ ފުރަތަމަ އެގާރައިން ހަތް ބަދަލެއް ވަނީ ފެނިގެން ގޮސްފައެވެ. ހަމައެހެންމެ މިދިޔަ ހަފްތާގައި ހަޑާސްފީލްޑްއާ ދެކޮޅަށް ކުޅެ އެއްވަރުވި ސްވަންސީގެ ޓީމަށް ހަތަރު ބަދަލެއް ގެނެސްފައިވެއެވެ. މި މެޗު ވެގެން ގޮސްފައިވަނީ 1964 ވަނަ އަހަރުގެ ފަހުން އެފްއޭ ކަޕްގެ ކުއާޓާ ފައިނަލްއިން ސްވަންސީ ޖާގަ ހޯދި ފުރަތަމަ މެޗަށެވެ.
ފުރަތަމަ ހާފު ފެށިގެން ޓޮޓެންހަމްއިން މޮޅު ކުޅުމެއް ދައްކައި ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައިވެ އެވެ. ނަތީޖާއެއްގެ ގޮތުން އެ ޓީމުން ވަނީ މެޗުގެ 11 ވަނަ މިނެޓުގައި ސްވަންސީގެ ގޯލު ހުޅުވާލާފައެވެ. އެރިކް ލަމޭލާ ތަނަވަސްކޮށްދިން ފުރުސަތަކުން ޓޮޓެންހަމްއަށް ލީޑު ނަގައިދިނީ ކްރިސްޓިއަން އެރިކްސެންއެވެ. މެޗުގެ 23 ވަނަ މިނެޓުގައި ޓޮޓެންހަމްއިން ދެވަނަ ލަނޑެއް ޖެހި ނަމަވެސް ވީޑިއޯ ރެފްރީ މެދުވެރިކޮށް ރެފްރީ ނިންމާފައިވަނީ އެއީ ލަނޑެއް ނޫން ކަމަށެވެ. އެ ޓީމުގެ ދެވަނަ ލަނޑު ފެނިގެންގޮސްފައިވަނީ ފުރަތަމަ ހާފުގެ އިތުރު ވަގުތުގެ ތެރޭގައެވެ. ސިސޯކޯ ދިން ޕާހަކުން އެ ޓީމަށް މި ލަނޑު ޖަހައިދިނީ މި މެޗުގައި ރަނގަޅު ކުޅުމެއް ދެއްކި ލަމޭލާއެވެ.
ދެ ލަނޑުގެ ލީޑެއްގައި އޮވެ ޓޮޓެންހަމްއިން ފުރަތަމަ ހާފު ނިންމާލިއިރު ސްވަންސީއިން ވަނީ ދެވަނަ ހާފުގައި ރަނގަޅު ކުޅުމެއް ދައްކާފައެވެ. އެގޮތުން އެ ޓީމުން އުފެއްދި ހަމަލާތައް ހުއްޓުވުމަށް ޓޮޓެންހަމްގެ ކީޕަރު މިޗެލް ވޯމް ވަނީ ރަނގަޅު ސޭވްތަކެއް ކޮށްފައެވެ. ސްވަންސީއިން އެ ޓީމުގެ ކުޅުން ރަނގަޅުކޮށްފައި ވަނިކޮށް ޓޮޓެންހަމްގެ ތިންވަނަ ލަނޑު މެޗުގެ 62 ވަނަ މިނެޓުގައި ޖަހައިދިނީ މި މެޗުގެ މޮޅު ކުޅުންތެރިޔާގެ މަގާމު ހޯދި އެރިކްސެންއެވެ. މި ލަނޑަށް ފަހުވެސް ޓޮޓެންހަމްއަށް ލަނޑު ޖެހުމަށް ރަނގަޅު ފުރުސަތުތަކެއް ލިބިގެންދިޔައިރު އެ ޓީމަށް މި ފުރުސަތުތަކުގެ ބޭނުން ހިފިފައެއްނުވެއެވެ.
މިދިޔަ ސީޒަނުގެ ސެމީގައި ވެސް ޓޮޓެންހަމް ވާދަކުރިއިރު އެ ޓީމުގެ އިތުރުން މެންޗެސްޓާ ޔުނައިޓެޑް ވެސް ވަނީ މި ސީޒަނުގެ ސެމީ ފައިނަލްއިން ޖާގަ ހޯދާފައެވެ.
