އިނގިރޭސި އެފްއޭ ކަޕްގެ ސެމީ ފައިނަލްއިން މެންޗެސްޓާ ޔުނައިޓެޑް ޖާގަ ހޯދައިފިއެވެ.

ޔުނައިޓެޑް ސެމީއަށް ދަތުރުކުރީ އަމިއްލަ ދަނޑުގައި 2-0 ގެ ނަތީޖާއަކުން ބްރައިޓަން ބަލިކޮށްގެންނެވެ. މި ދެ ޓީމު މި މެޗަށް ނުކުތްއިރު މީގެކުރިން މި ދެ ޓީމުގެ މެދުގައި ކުޅުނު 17 މެޗުގެ ތެރެއިން ބްރައިޓަން މޮޅުވެފައިވަނީ އެންމެ މެޗަކުންނެވެ. މި މެޗުގައި ޔުނައިޓެޑްގެ ކޯޗު ހޯސޭ މޮރީނިއޯ ވަނީ އެ ޓީމަށް ބޮޑު ބަދަލުތަކެއް ގެނެސްފައެވެ. އެގޮތުން އެލެކްސިސް ސަންޗޭޒް އަދި ޕައުލް ޕޮގްބާގެ އިތުރުން ޑޭވިޑް ޑެހޭއާ ފުރަތަމަ އެގާރާގައި ހިމަނާފައިނުވާއިރު ސާޖިއޯ ރޮމޭރޯ އަދި ލޫކް ޝޯގެ އިތުރުން ސްކޮޓް މެކްޓޮމިނޭ ވަނީ ފުރަތަމަ އެގާރާގައި ހިމެނިގެން ކުޅެފައެވެ.

ފުރަތަމަ ހާފު ފެށިގެން ޔުނައިޓެޑްއިން ވަނީ ގިނަ ވަގުތު ބޯޅަ ހިފަހައްޓައިގެން ކުޅެ ބްރައިޓަންގެ ގޯލަށް ނުރައްކާކުރުމަށް މަސައްކަތްކޮށްފައެވެ. ޔުނައިޓެޑްއަށް އެންމެ އެދެވޭ ހަމަލާތައް ފުރަތަމަ 20 މިނެޓުގެ ތެރޭގައި އުފެއްދިފައިނުވާއިރު މެޗުގެ 30 ވަނަ މިނެޓުގައި ކްރިސް ސްމޯލިން ފޮނުވާލި ހަމަލާއެއް ވަނީ ބްރައިޓަންގެ ގޯލުގެ ދަނޑިއަށް އަމާޒުވެފައެވެ. މެޗުގެ ފުރަތަމަ ލަނޑު ފެނިގެންދިޔައީ އޭގެ ހަތް މިނެޓު ފަހުންނެވެ. ނެމެންޔާ މަޓިޗް ތަނަވަސްކޮށްދިން ފުރުސަތަކުން އެ ޓީމަށް ލީޑު ނަގައިދިނީ ރޮމެލޫ ލުކާކޫއެވެ.

އެއް ލަނޑުގެ ލީޑެއްގައި އޮވެ ޔުނައިޓެޑްއިން ފުރަތަމަ ހާފު ނިންމާލިއިރު ދެވަނަ ހާފުގައި ވެސް އެ ޓީމުން ވަނީ ރަނގަޅު ކުޅުމެއް ދައްކައި ލަނޑު ޖެހުމަށް ގިނަ ފުރުސަތުތަކެއް ތަނަވަސްކޮށްފައެވެ. މި ހާފުގައި ބްރައިޓަންއިން ވެސް ވަނީ އެ ޓީމުގެ ކުޅުން ރަނގަޅުކޮށް ޔުނައިޓެޑްގެ ގޯލަށް ނުރައްކާކުރުމަށް މަސައްކަތްކޮށްފައެވެ. ހަމައެހެންމެ ބްރައިޓަންގެ ފޯވާޑުންނަށް މި ހާފުގައި ނަތީޖާ ބަދަލުކުރުމަށް ހުސް ފުރުސަތުތަކެއް ލިބިގެންދިޔައިރު އެ ކުޅުންތެރިންނަށް މި ފުރުސަތުތަކުގެ ބޭނުން ހިފިފައެއްނުވެއެވެ. ޔުނައިޓެޑްގެ ދެވަނަ ލަނޑު މެޗުގެ 83 ވަނަ މިނެޓުގައި އޭޝްލީ ޔަންގް ތަނަވަސްކޮށްދިން ފުރުސަތަކުން އެ ޓީމަށް ޖަހައިދިނީ މި މެޗުގައި މޮޅު ކުޅުމެއް ދެއްކި މަޓިޗްއެވެ.

ޔުނައިޓެޑްގެ އިތުރުން ޓޮޓެންހަމްއިން ވެސް ވަނީ ސެމީގެ ޖާގައެއް ކަށަވަރުކޮށްފައެވެ.