ޕްރިމިއާ ލީގު: އުތުރު ލަންޑަންގެ ދެ ޓީމު ވެސް މޮޅުވެއްޖެ

އިނގިރޭސި ޕްރިމިއާ ލީގުގައި އުތުރު ލަންޑަނަށް ނިސްބަތްވާ ދެ ޓީމު ކަމަށްވާ އާސެނަލް އަދި ޓޮޓެންހަމް ކުޅުނު މެޗުތަކުން އެ ދެ ޓީމު ވެސް މޮޅުވެއްޖެއެވެ.

އަމިއްލަ ދަނޑުގައި ވޮޓްފޯޑާއި ދެކޮޅަށް ކުޅުނު މެޗުން އާސެނަލް މޮޅުވީ 3-0 ގެ ނަތީޖާއަކުންނެވެ. މި މެޗުން އާސެނަލް ބަލިވިނަމަ އެ ޓީމު ޕްރިމިއާ ލީގުގައި ޖެހިޖެހިގެން ހަތަރު މެޗުން ބަލިވާނެއެވެ. އާސެނަލްގެ ކޯޗު އާސެން ވެންގާއަށް ބޮޑެތި ފާޑުކިޔުންތަކެއް އަމާޒުވަމުން އަންނައިރު އޭނާ ވަނީ މިދިޔަ ހަފްތާގައި އަލަށް ޕްރޮމޯޓްވި ބްރައިޓަން އަތުން ބަލިވި އާސެނަލްގެ ޓީމަށް ތިން ބަދަލެއް ގެނެސްފައެވެ. މި މެޗުގައި ވެންގާ ވަނީ ޒުވާން ކުޅުންތެރިންނަށް ފުރުސަތު ދިނުމަށް އިސްކަން ދީފައެވެ.

ފުރަތަމަ ހާފު ފެށިގެން އާސެނަލްއިން ވަނީ ބޯޅަ ކޮންޓްރޯލްކޮށްގެން ރަނގަޅަށް ކުޅެފައެވެ. މި މެޗުގެ ފުރަތަމަ ލަނޑުގެ މެޗުގެ އަށްވަނަ މިނެޓުގައި މެސުޓް އޮޒިލް ތަނަވަސްކޮށްދިން ފުރުސަތަކުން އާސެނަލްއަށް ޖަހައިދިނީ ޖަރުމަނުގެ ޑިފެންޑަރު މުސްޓާފީއެވެ. މި ލަނޑަށް ފަހު ވެސް އާސެނަލްއިން ވަނީ ވޮޓްފޯޑްގެ ގޯލަށް ނުރައްކާކުރުމަށް ފުލުފުލުގައި ހަމަލާތައް ފޮނުވާލާފައެވެ. ވޮޓްފޯޑްއިން ވެސް ވަނީ ކައުންޓާގައި އާސެނަލްގެ ގޯލަށް ނުރައްކާކުރުމަށް މަސައްކަތްކޮށްފައެވެ. އެހެން ނަމަވެސް ފުރަތަމަ ހާފުގައި އިތުރު ލަނޑެއް ފެނިގެން ގޮސްފައެއް ނުވެއެވެ.

ދެވަނަ ހާފު ފެށިގެން ވެސް އާސެނަލްއިން ވަނީ ފުރަތަމަ ހާފެކޭ އެއްގޮތަށް އެ ޓީމުގެ ކޮންޓްރޯލް ދަމަހައްޓާފައެވެ. އާސެނަލްގެ ދެވަނަ ލަނޑު ފެނިގެންދިޔައީ މެޗުގެ 59 މިނެޓުގައެވެ. ހެންރިކް މިޙްތަރިޔާން ތަނަވަސްކޮށްދިން ފުރުސަތަކުން އެ ޓީމަށް މި ލަނޑު ޖަހައިދިނީ ޕިއޭ އެމެރިކް އޮބަމަޔަންގ އެވެ. އޭގެ ތިން މިނެޓު ފަހުން ވޮޓްފޯޑަށް ޕެނަލްޓީއެއް ލިބުނު ނަމަވެސް ޕީޓާ ޗެކް ވަނީ އެ ޕެނަލްޓީ ދިފާއުކޮށްފައެވެ. އާސެނަލްގެ ތިންވަނަ ލަނޑު މެޗުގެ 77 ވަނަ މިނެޓުގައި އެ ޓީމަށް ޖަހައިދިނީ ހެންރިކް މިޙްތަރިޔާންއެވެ. މެޗުގެ ފަހު ވަގުތުކޮޅުގައި ވެސް ވޮޓްފޯޑްއިން ވަނީ ނުރައްކާތެރި ހަމަލާތަކެއް އުފައްދާފައެވެ.

އުތުރު ލަންޑަނުގެ ދެވަނަ ޓީމު ކަމަށްވާ ޓޮޓެންހަމް ވެސް ވަނީ ރަށުން ބޭރުގައި 4-1 ގެ ނަތީޖާއަކުން ބޯންމައުތު ބަލިކޮށް ތާވަލުގެ ތިންވަނަ މަގާމަށް ޖެހިލާފައެވެ. ޗެމްޕިއަންސް ލީގުގައި ޔުވެންޓަސް އަތުން ބަލިވި ޓޮޓެންހަމްގެ ޓީމުގައި ހިމެނުނު ތިން ކުޅުންތެރިޔަކު މި މެޗުގައި ކުޅެފައެއް ނުވެއެވެ. އެ ކުޅުންތެރިންގެ ބަދަލުގައި ފުރަތަމަ އެގާރައިން ފުރުސަތު ދީފައިވަނީ ސާޖް އައުރިޔާ އާއި ވިކްޓަރ ވަންޔާމާގެ އިތުރުން ޑެނީ ރޯސްއަށެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔައިރު މެޗުގެ ފުރަތަމަ ލަނޑު ޖަހާ ލީޑު ނެގީ ބޯންމައުތުއެވެ. އެ ޓީމަށް މި ލަނޑު ޖަހައިދިނީ ޖޫނިއަރ ސްޓަނިސްލާސްއެވެ. މެޗުގެ 29 ވަނަ މިނެޓުގައި ކޭން ލަނޑެއް ޖަހައިދިން ނަމަވެސް ރެފްރީ ނިންމާފައިވަނީ އެއީ އޮފްސައިޑް ލަނޑެއްގެ ގޮތުގައެވެ. އޭގެ ތިން މިނެޓު ފަހުން ޓޮޓެންހަމްއަށް އިތުރު ގޮންޖެހުންތަކާއި ކުރިމަތިވީ އަނިޔާގެ ސަބަބުން ކޭން ދަނޑުން ބާލަން ޖެހުމާއި ގުޅިގެންނެވެ. އެހެން ނަމަވެސް އެ ޓީމުން ވަނީ 35 ވަނަ މިނެޓުގައި ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ޖަހައިދިނީ ޑެލޭ އަލީއެވެ.

ދެ ޓީމު އެއްވަރުވެ އޮވެ ފުރަތަމަ ހާފު ނިމިގެންދިޔައިރު ޓޮޓެންހަމްއިން ވަނީ ދެވަނަ ހާފުގައި މޮޅު ކުޅުމެއް ދައްކާފައެވެ. މެޗުގެ 62 ވަނަ މިނެޓުގައި އުތުރު ކޮރެއާގެ ފޯވާޑް ހެއުން މިން ސޮން އެ ޓީމަށް ލީޑު ނަގައިދިންއިރު އެ ޓީމުގެ ތިންވަނަ ލަނޑު ވެސް ޖަހައިދިނީ ސޮންއެވެ. އެ ޓީމުގެ ހަތަރު ވަނަ ލަނޑު މެޗުގެ އިތުރު ވަގުތުގެ ތެރޭގައި ޖަހައިދިނީ ޑިފެންޑަރު އައުރިޔާއެވެ.

ޕްރިމިއާ ލީގުގެ ޕޮއިންޓް ތާވަލުގެ އެއްވަނައިގައި 78 ޕޮއިންޓާއެކު މެންޗެސްޓާ ސިޓީ އޮތްއިރު ދެވަނައިގައި 65 ޕޮއިންޓާއެކު އޮތީ މެންޗެސްޓާ ޔުނައިޓެޑްއެވެ. ތިންވަނައިގައި 61 ޕޮއިންޓާއެކު ޓޮޓެންހަމް އޮތްއިރު ހަތަރު ވަނައިގައި 60 ޕޮއިންޓާއެކު އޮތީ ލިވަޕޫލްއެވެ. ފަސްވަނަ ޗެލްސީއަށް ލިބޭއިރު އާސެނަލްއަށް ލިބެނީ ހަވަނައެވެ.