އިލްހާމް ހައްޔަރު ކުރި މައްސަލައިގެ ހެއްކެއް ނެތުމުން، ހޫނު ފެނުގެ ތަހުގީގު ފަށައިފި
އިލްހާމާ ސުވާލުކޮށް ބަޔާން ނަގާފައިވޭ
މެމްބަރު އިލްހާމް، އޭނާގެ އަނބިކަނބަލުން މާޝާ (ވ) އާއެކު
ދަނގެތީ ދާއިރާގެ މެމްބަރު އިލްހާމް އަހުމަދު ހައްޔަރު ކުރި މައްސަލައިގެ ހެކި ނުލިބުމުން، މަޖިލީހުގެ މެމްބަރުންނަށް އިންޒާރު ދިނުމުގެ ގޮތުން މީގެ އަހަރެއްހާ ދުވަސް ކުރިން އޭނާ ވިދާޅުވެފައިވާ "ހޫނު ފެނު"ގެ މައްސަލައިގެ ތަހުގީގު ފުލުހުން ފަށައިފިއެވެ.
މިދިޔަ އަހަރުގެ މާޗު މަހުގެ 22 ވަނަ ދުވަހު ޕީޕީއެމުން ދަރުބާރުގޭގައި ބޭއްވި ރަސްމިއްޔާތެއްގައި އިލްހާމް ވިދާޅުވެފައި ވަނީ މަޖިލީހުގެ ރައީސް އަބްދުﷲ މަސީހު މަގާމުން ދުރުކުރުމަށް މެމްބަރުން ވޯޓު ދެއްވާނީ "ހޫނު ފެނަށް އެރެން ބޭނުންވާ ނަމަ" ކަމަށެވެ.
"ރާއްޖެއެމްވީ"އަށް އެނގިފައިވާ ގޮތުގައި މަޖިލީހުގެ މެމްބަރުންތަކަކަށް ރިޝްވަތު ދެއްވިކަމުގެ ތުހުމަތުގައި ދޫނިދޫގައި ބަންދުކޮށްފައިވާ މެންބަރު އިލްހާމާ ފުލުހުން ވަނީ އެ މައްސަލާގައި ސުވާލުކޮށް ބަޔާން ވެސް ނަގައިފައެވެ.
އިލްހާމްގެ ޤާނޫނީ ވަކީލު ނޫރުއްސަލާމް "ރާއްޖެއެމްވީ"އަށް ވިދާޅުވީ އިލްހާމް ޕީޕީއެމްގައި ހުންނެވިއިރު، މިދިޔަ އަހަރުގެ މާޗު މަހުގެ ތެރޭގައި އިލްހާމް ދެއްކެވި ވާހަކަފުޅަކާ ގުޅިގެން، މިދިޔަ އަހަރުގެ މެއި މަހު ވެސް އިލްހާމާ ސުވާލު ކުރި ކަމަށެވެ. އެ މައްސަލައިގެ ތަހުގީގު ނިމުނުކަން ފުލުހުން އޭރު ބުނި ކަމަށާއި އެ މައްސަލައިގެ ކުރިއަށް ނުދާނެ ކަމަށް ރައީސް އަބްދުﷲ ޔާމީން، އިލްހާމްގެ އަރިހުގައި ވިދާޅުވެފައިވާ ކަމަށް ވެސް ނޫރުއްސަލާމް ވިދާޅުވިއެވެ.
ނަމަވެސް އަނެއްކާވެސް އިލްހާމްގެ "ހޫނު ފެނުގެ" ވާހަކައިގެ ތަހުގީގު ފެށުމުން، ސުވާލު އުފެދޭ ކަމަށް ވަކީލު ވިދާޅުވިއެވެ. އަދި ވިދާޅުވީ އިލްހާމް އިންޒާރު ދެއްވި ކަމަށް ބުނާ އެ މައްސަލާގައި ހިމެނޭ ވީޑިއޯއާމެދު އޭނާ އިންކާރު ކުރައްވާފައި ނުވަނީސް ހައްޔަރުގައި ބަހައްޓައިގެން އިލްހާމްގެ ފޮޓޯ ނަގައި ފޮރެންސިކް ތަހުލީލުތަކެއް ކޮށްފައިވާ ކަމަށް ނޫރުއްސަލާމް ވިދާޅުވިއެވެ.
ވަކީލު ވިދާޅުވީ އެ މައްސަލައިގެ ތަހުގީގު ފުލުހުން ފެށުމުން، އެނގިގެން ދަނީ މަސީހާ އެއްކޮޅަށް މެމްބަރުން ވޯޓު ދިނީ ބިރު ދައްކައިގެން ކަމަށް ކަމެވެ. އަދި އިލްހާމް ހައްޔަރު ކުރި މައްސަލާގައި އެއްވެސް ހެއްކެއް ލިބިފައި ނުވާތީ، ފުލުހުން މިހާރު މަސައްކަތް އެ ކުރަނީ އެހެން މައްސަލައެއް އިލްހާމްގެ މައްޗަށް ސާބިތު ކުރުމަށް ކަމަށް ނޫރުއްސަލާމް ވިދާޅުވިއެވެ.
ސަރުކާރު ހިންގާ ޕާޓީ، ޕީޕީއެމްގައި އިލްހާމް ހުންނެވިއިރު، ތަހުގީގު ހުއްޓިފައި އޮތް މައްސަލައެއް، އަލުން ބަލަން ފެށުމުން ފުލުހުންގެ އިހްލާސްތެރިކަމާ މެދު ސުވާލު އުފައްދައި، ގުޅިފައިވާ ޕާޓީތަކުން ދަނީ ކަންބޮޑުވުން ފާޅު ކުރަމުންނެވެ. އިލްހާމް އިންޒާރު ދެއްވި ކަމަށް ބުނެ، އިދިކޮޅު ފަރާތްތަކުން އޭރު އެ މައްސަލަ ފުލުހުންނަށް ހުށަހެޅުމުން ތަހުގީގު ކުރިއަށް ނުގެންދާތީ އިދިކޮޅު ފަރާތްތަކުން އޭރު ވަނީ ކަންބޮޑުވުންފާޅުކޮށްފައެވެ.
މިދިޔަ އަހަރުގެ މާޗު މަހުގެ 22 ވަނަ ދުވަހު ޕީޕީއެމުން ދަރުބާރުގޭގައި ބޭއްވި ރަސްމިއްޔާތެއްގައި އިލްހާމް ވިދާޅުވެފައި ވަނީ ޕީޕީއެމްގެ ތެރެއިން މަސީހާ ދެކޮޅަށް ވޯޓުލާނީ "ހޫނު ފެނުގައި އަތްލާން" ބޭނުންވާ މީހުން ކަމަށާއި ހޫނުފެން އެޅުމުން ތަދުވެގެން މެސެޖެއްކޮށް، "ސޮރީއޭ" ބުންޏަސް ގަބޫލެއް ނުކުރެވޭނެ ކަމަށެވެ.
އެ ޖަލްސާގައި އިލްހާމް އެހެން ވިދާޅުވުމުން، ޖަލްސާގައި ތިބި ޕީޕީއެމްގެ އިސް ފަރާތްތަކާއި، ސަރުކާރުގެ ވެރިންނާއި، ޖަލްސާގައި ބައިވެރިވެވަޑައިގެން އިންނެވި ރައީސް ޢަބްދުﷲ ޔާމީން ވެސް ވަނީ އަތްތިލަބަޑި ޖައްސަވާފައެވެ.
މި މައްސަލަ ތަހްގީގުކުރަން ފެށުމުގެ ކުރިން އިލްހާމްގެ ކޮރަޕްޝަން މައްސަލައެއް އޮތްތޯ ބެލުމަށްޓަކައި، އެންޓި ކޮރަޕްޝަން ކޮމިޝަން މެދުވެރިކޮށް ތަހްގީގުތަކެއް ހިންގާފައިވާކަން ރާއްޖެ އެމްވީއަށް ވަނީ އެނގިފަ އެވެ. ނަމަވެސް އެ މައްސަލަތަކުގައި ވެސް އެކަށީގެންވާ ހެއްކެއް ފެނިފައި ނެތް ކަމަށް ރާއްޖެއެމްވީއަށް ވަނީ އެނގިފަ އެވެ.
