ހުސައިންއަށް އަނިޔާކުރި މައްސަލަ ތިން އިދާރާއަކަށް ހުށަހަޅައިފި

ރާއްޖެ ޓީވީގެ ނޫސްވެރިޔާ ހުސައިން ހަސަނަށް ފުލުހުން އަނިޔާ ކުރި މައްސަލަ ޕޮލިހަށާއި ނޭޝަނަލް އިންޓަގްރިޓީ ކޮމިޝަން އަދި މޯލްޑިވްސް ހިއުމަން ރައިޓްސް ކޮމިޝަނަށް ހުށަހަޅައިފި އެވެ.

ރާއްޖެ ޓީވީގެ ގާނޫނީ ވަކީލް މުހައްމަދު ނިޝާން ވިދާޅުވީ ހޮސްޕިޓަލުގައި އެޑްމިޓް ކުރި ފަހުން ވެސް ފުލުހުންގެ ހައްޔަރުގައި ކަމަށް ފުލުހުން ބުނަމުންދިޔަ ކަމަށާއި އެންމެ ފުރަތަމަ ދޫކޮށްލި ކަމަށްވެސް ފުލުހުން ހުކުރު ދުވަހުގެ ރޭ ބުނެފައިވާ ކަމަށެވެ. މިކަން ފުލުހުންގެ ސަލާމުކަމަށް ގެނައުމުން އަނެއްކާވެސް ހުސައިން ހައްޔަރުކޮށްފައިނުވާ ކަމަށް ފުލުހުން ބުނެފައިވާ ކަމަށް ނިޝާން ވިދާޅުވި އެވެ.

"އެހެން ކަމުން ހުސައިން ހައްޔަރު ކުރީތޯ. އާންމު ރައްޔިތުންތޯ، ނުވަތަ ފުލުހުންތޯ ހުސައިންއަށް އަނިޔާކުރީ އެކަން ކަށަވަރު ކުރުމަށްވެސް ފުލުހުންނަށް އެދިފައިވާނެ،" ނިޝާން ވިދާޅުވި އެވެ.

ރާއްޖެޓީވީގެ ޗީޕް އޮޕަރޭޓިންގ އޮފިސަރ ހުސައިން ފިޔާޒް މޫސާ ވިދާޅުވީ، ކުއްލި ނުރައްކަލުގެ ހާލަތު ކަމުގައި ނަމަވެސް ނޫސްވެރިކަމަށް އެއްވެސް ހުރަހެއް ނެތް ކަމަށާއި އެކަން ފުލުހުންނަށް ނުވަތަ ދައުލަތުގެ އެއްވެސް މުއައްސަސާއަކަށްވެސް ނުހުއްޓުވޭނެ ކަމަށެވެ.

"ހުކުރު ދުވަހުގެ ރޭ ފެނިގެންދިޔައީ ގަސްތުގައި ނޫސްވެރިންނަށް ހުރަސް އަޅާ، ނޫސްވެރިކަމުގެ މިނިވަން ކަމަށް ހުރަސް އަޅާއި ނޫސްވެރިކަމުގެ ވާޖިބަށް ހުރަސް އެޅުން. ފުލުހުންގެ ވާޖިބަށް ނޫސްވެރިން ހުރަސްއަޅާފައެއް ނުވާނެ. އެހެން ކަމުން އެފަދަ އަމަލުތައް ތަކުރާރު ނުކުރުމަށް ވަނީ ގޮވާލާފަ." ފިޔާޒު ވިދާޅުވި އެވެ.

ހުސެއިން ހަސަންގެ އެތެރެ ހައްޓަށް އަނިޔާވެފައިވާ އިރު ފުލުހުން އަނިޔާކޮށްފައިވާ ކަމުގެ ނިޝާންތައް ހަށިގަނޑު އެތައް މިތަނުގައި ހުއްޓެވެ. ހުސައިންއަށް އަނިޔާކޮށްފައިވަނީ އިދިކޮޅު ފަރާތްތަކުން މިދިޔަ ހުކުރު ދުވަހު ބޭއްވި ވޯމްއަޕް މުޒާހަރާ ކަވަރުކުރަމުން ދަނިކޮށެވެ.

މުޒާހަރާ ކަވަރު ކުރުމަށް ހަރަކާތްތެރިވި ނޫސްވެރިންނަށް އަމާޒުކޮށް ގަސްތުގައި އަނިޔާކޮށްފަ ކަމަށް އެ ސަރަހައްދުގައި ހަރަކާތްތެރިވި ނޫސްވެރިން ވަނީ ބުނެފައެވެ.