ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކު މަގާމުން ދުރުކުރުމުގެ އިހުތިސާސް ސުޕްރީމް ކޯޓަށް ލިބިގެން ނުވާ ކަމަށް ރައީސް އޮފީހުގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރު ވިދާޅުވުމުން، ޖުމްހޫރީ ޕާޓީގެ ނައިބު ލީޑަރު ކިނބިދޫ ދާއިރާގެ މެމްބަރު އަބްދުﷲ ރިޔާޒު އޭނާއަށް ފާޑުވިދާޅުވެއްޖެ އެވެ.

ދައުލަތުގެ މީޑިއާ، ޕީއެސްއެމް ނިއުސްގައި ވާހަކަފުޅު ދައްކަވަމުން އާޒިމާ ވިދާޅުވެފައި ވަނީ ރައީސުލްޖުމްހޫރިއްޔާ މަގާމުން ދުރުކުރުމުގެ މައްސަލައަކީ ސުޕްރީމް ކޯޓަށް ހުށަހެޅޭނެ މައްސަލައެއް ނޫން ކަމަށެވެ. ރައީސެއް މަގާމުން ދުރުކުރެވޭނެ ގޮތް ގާނޫނުއަސާސީގައި ބަޔާން ކޮށްފައިވާކަން ފާހަގަ ކުރައްވައި އާޒިމާ ވިދާޅުވެފައި ވަނީ ރައީސްއެއް މަގާމުން ދުރު ކުރުމުގެ ބާރު އޮތީ ރައްޔިތުންގެ މަޖިލީހަށެވެ. އޭނާ ވިދާޅުވީ ގާނޫނުއަސާސީގައި އޮތް ގޮތާ ހިލާފަށް އެ މައްސަލަ ސުޕްރީމް ކޯޓަށް ވެއްދުމުގައި އިސްކޮށް އުޅުއްވަނީ ގާނޫނުއަސާސީގައި އޮތް އެއްޗެއް ރަނގަޅަށް އެނގިވަޑައި ގަންނަވާ ބޭފުޅުން ކަމަށާއި އެ ބޭފުޅުން އެފަދަ ކަންކަން ކުރެއްވުމަކީ ގަބޫލު ކުރަން އުނދަގޫ ކަމެއް ކަމަށެވެ.

ރައީސް ޔާމީން މަގާމުން އަޒުލު ކުރުމުގެ އިހްތިސާސް ސުޕްރީމް ކޯޓަށް ލިބިގެން ނުވާ ކަމަށް ވިދާޅުވެ އާޒިމާ ސުވާލު އުފެއްދުމުން  އެކަމަށް ފާޑުވިދާޅުވެ ރިޔާޒު ކުރެއްވި ޓްވީޓެއްގައި ވިދާޅުވީ ސުޕްރީމް ކޯޓު ވަރެއް ނެތިގެން މި ވީހާ ދުވަހު އުޅުނީ ސަރުކާރުން ކަމަށެވެ. އެ ކޯޓަށް އިހްތިސާސް ލިބިގެން ނުވާ ކަމަށް އާޒިމާ ވިދާޅުވުމުން، "މި ވާން އުޅެނީ" ކިހިނެއްތޯ އޭ ވިދާޅުވެ ރިޔާޒު ވަނީ ސުވާލު އުފައްދަވާފައެވެ.

ބަންޑާރަ ނައިބުގެ އޮފީހުން ސުޕްރީމް ކޯޓަށް ހުށަހެޅި ދެ މައްސަލައެއްގައި ސަރުކާރާ އެއްކޮޅަށް ވަނީ ނިޔާ ކަނޑައަޅާފައެވެ. އެގޮތުން ޕާޓީ ބަދަލު ކުރާ މަޖިލިސް މެމްބަރުންނާއި ޕާޓީތަކުން ވަކިކުރާ މެމްބަރުންގެ ގޮނޑި ގެއްލޭނެ ކަމަށް ސުޕްރީމް ކޯޓުން ވަނީ ކަނޑައަޅާފައެވެ. ވަޒީރުންގެ މަޖިލީހާއި ރައީސުލްޖުމްހޫރިއްޔާގެ މައްޗަށް އިތުބާރު ނެތް ކަމަށް މަޖިލީހުން ފާސްކުރިޔަސް ފަހު ނިންމުން ނިންމާނީ ސުޕްރީމް ކޯޓުން ކަމަށް ވެސް ވަނީ ކަނޑައަޅާފައެވެ. 

އެ މައްސަލަތަކަކީ ސަރުކާރާ އެއްކޮޅަށް ސުޕްރީމް ކޯޓުން ނިންމާފައިވާ މައްސަލަތަކަކަށް ވުމުން، ސަރުކާރުން ގެންދިޔައީ އެ ކޯޓުގެ ފަނޑިޔާރުންނަށް ތައުރީފުކޮށް ވާހަކަދައްކަމުންނެވެ. ނަމަވެސް އެ ކޯޓުގެ އިހްތިސާސާ މެދު ސަރުކާރުގެ އިސް ބޭފުޅުން ސުވާލު އުފެއްދުމުން އިދިކޮޅު ފާޑުކިޔުން ސަރުކާރަށް ވަނީ އަމާޒުވެފައެވެ.

ސުޕްރީމް ކޯޓުގެ އިހްތިސާސާމެދު ސުވާލު އުފެއްދެވި އާޒިމާ ވަނީ ކުރީގެ ރައީސް ޑރ. މުހައްމަދު ވަހީދުގެ ވެރިކަމުގައި ބަންޑާރަ ނައިބުގެ މަގާމު ދެ ފަހަރަށް އަދާކުރައްވާފައެވެ. އޭނާ ވަނީ ވަހީދުގެ ވެރިކަމުގައި ޖެންޑާ މިނިސްޓަރުގެ މަގާމު ވެސް އަދާ ކުރައްވާފައެވެ. ޖެންޑާ މިނިސްޓަރުގެ މަގާމަށް ވަޑައިގެންނެވުމަށްފަހު މަޖިލީހުގެ ރުހުން ހޯދަން ހުށަހެޅުމުން އެކަމަނާއަށް އޭރު ރުހުމެއް ނުލިބުނެވެ. ނަމަވެސް ބަންޑާރަނައިބުގެ މަގާމަށް މަޖިލީހުގެ ރުހުމާއެކު، އެ މަގާމުގައި ދެމިހުންނެވުނީ އެންމެ ހަތަރު މަހު އެވެ.

އާޒިމާއާ ދެކޮޅަށް ހުޅުހެންވޭރު ދާއިރާގެ މެންބަރު ރީކޯ މޫސާ މަނިކު ހުށަހެޅުއްވި އިތުބާރު ނެތް ކަމުގެ މައްސަލަ މަޖިލީހުގެ 41 މެމްބަރުންގެ އަގުލަބިއްޔަތާއެކު ފާސްވިއެވެ. ނަތީޖާއެއްގެ ގޮތުން އާޒިމާއަށް ކެބިނެޓުގެ ގޮނޑި ގެއްލުނެވެ.