ޖަޕާނުގެ ހޮކައިޑޫ އަށް 6.4 މެގްނިޓިއުޑްގެ ބިންހެލުމެއް ބުދަ ދުވަހު އަތުވެއްޖެއެވެ.
ބުދަ ދުވަހު ޖަޕާނު ގަނޑިން ރޭގަނޑު 7:51 ގައި އައި ބިންހެލުމުގެ ސަބަބުން އެއްވެސް ތަނަކަށް އަދި އެއްވެސް މީހަކަށް ގެއްލުމެއް ލިބުނުކަމުގެ މައުލޫމާތެއް ލިބިފައެއް ނުވެއެވެ.
ބިންހެލުން އައިސްފައި ހުރީ 30 ސިކުންތައް ކަމަށް އޮފިޝަލުން ބުނެއެވެ.
ޖަޕާނަކީ ބިންހެލުން ގިނައިން އަންނަ ސަރަހައްދެއްގައި އޮންނަ ގައުމެކެވެ.
ޖަޕާނުން އަންނަނީ، 2011 ގައި އެގައުމަށް އައި "ޓޮހްކޫ ބިންހެލުމާ" ބިންހެލުންތަކަށް ހާއްސަ ސަމާލުކަމެއް ދެމުންނެވެ. އެ ބިންހެލުން އައީ 9 މެގްނިޓިއުޑުގައެވެ. އެއީ އެގައުމަށް އައި އެންމެ ބާރުގަދަ ބިންހެލުން ކަމަށްވާއިރު 16000 މީހުން އެބިންހެލުމުގެ ސަބަބުން މަރުވިއެވެ.
