ވޯލްޑް ކަޕް ޓްރޮފީ ރާއްޖެ ގެނެސްފި
24 ޖެނުއަރީ 2018 | ބުދަ 13:25މާލޭގައި ޓްރޮފީއާ އެކު ތަފާތު އެކި ހަރަކާތްތައް ކުރިޔަށް ގެންދާނެ
ވޯލްޑް ކަޕް ޓްރޮފީ ރާއްޖެ ގެނެސްފި
ވޯލްޑް ކަޕް ޓްރޮފީ ބުދަ ދުވަހު ރާއްޖެ ގެނެސްފިއެވެ.
ވޯލްޑް ކަޕް ޓްރޮފީ ޓުއަރއާ ގުޅިގެން މާލޭގެ ބައެއް މަގުތައް ބަންދުކުރުމަށް މޯލްޑިވްސް ޕޮލިސް ސާވިސް އިން ވަނީ ނިންމާފައެވެ.
ފުލުހުންގެ އިދާރާ އިން ބުނީ މަގުތައް ބަންދުކުރަން ނިންމީ ޓުއަރގެ ދަށުން ކުރިޔަށް ގެންދާ ހަރަކާތްތައް ބާއްވާ ސަރަހައްދުތަކުގެ ޓްރެފިކް ބެލެހެއްޓުމުގެ ގޮތުން ކަމަށެވެ. އެގޮތުން މިއަދާއި މާދަމާ ހަރަކާތްތައް ކުރިޔަށް ގެންދާ ސަރަހައްދުތަކުގެ ބައެއް މަގުތައް އާންމު ޓްރެފިކްއަށް ބަންދު ކުރެވޭނެ ކަމަށް ފުލުހުންގެ އިދާރާ އިން ބުނެއެވެ.
ވޯލްޑް ކަޕް ޓްރޮފީ ޓުއަރގެ ތެރެއިން މިރޭ ގަލޮޅު ދަނޑުގައި ހާއްސަ ހަރަކާތްތަކެއް ކުރިއަށް ގެންދިޔުމަށް ނިންމާފައިވާއިރު މާދަމާ މާފަންނު ޓާފް ސްޓޭޑިއަމްގައި ވެސް ހާއްސަ ހަރަކާތްތަކެއް ކުރިޔަށް ގެންދާނެއެވެ. ފުލުހުން ހާމަކޮށްފައިވާ ގޮތުގައި ރަސްމީ ފާލަމާއި ހޮޓެލް ޖެން ހިމެނޭ ސަރަހައްދު ވެސް ބަންދުކުރުމަށް ވަނީ ނިންމާފައެވެ.
ވޯލްޑް ކަޕްގެ ޓްރޮފީ ޓުއަރ ފެށީ މި މަހުގެ 22 ވަނަ ދުވަހު އިނގިރޭސިވިލާތުގެ ލަންޑަނުންނެވެ.
މިއީ މި ޓުއަރ ކުރިޔަށް ގެންދާ ހަތަރުވަނަ އަހަރަށް ވާއިރު މިއަހަރުގެ ޓުއަރގައި ދުނިޔޭގެ ހަ ބައްރުން 51 ގައުމެއްގެ 91 ސިޓީގައި މި ޓްރޮފީ ދައްކާލާނެއެވެ.
