އިނގިރޭސި ޕްރިމިއާ ލީގުގައި ކުޅެން ބޭނުންވާ ކަމަށް ފްރާންސްގެ ބޯޑޯއަށް ކުޅެމުން އަންނަ ބްރެޒިލްގެ ޒުވާން ތަރި މެލްކޮމް ބުނެފިއެވެ.

އޭނާ މިހެން ބުނެފައިވާއިރު އުތުރު ލަންޑަނަށް ނިސްބަތްވާ ދެ ޓީމު ކަމަށްވާ އާސެނަލް އަދި ޓޮޓެންހަމް ހޮޓްސްޕާސްއިން އޭނާ ހޯދުމަށް މަސައްކަތްކުރަމުން އަންނަ ކަމަށް ރިޕޯޓުތައް ބުނެއެވެ. ވަކިން ހާއްސަކޮށް އެލެކްސިސް ސަންޗޭޒް އާސެނަލް ދޫކޮށްލަން ނިންމުމާއި ގުޅިގެން އޭނާ ނެތްތަން ފޫބެއްދުމަށް އާސެނަލްއިން މެލްކޮމް މި  ފިނި މޫސުމުގެ ޓްރާންސްފާގައި ގެންނަން ބޭނުންވާ ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ. އެހެން ނަމަވެސް ބޯޑޯގެ މެނޭޖްމަންޓުން ބުނެފައިވަނީ މިހާތަނަށް އޭނާ ހޯދުމަށް އެއްވެސް ހުށަހެޅުމެއް އައިސްފައި ނުވާ ކަމަށެވެ.

މިދިޔަ ހޮނިހިރު ދުވަހު 1-0 ގެ ނަތީޖާއަކުން ނަންޓޭސް އަތުން ބޯޑޯ ބަލިވި މެޗަށް ފަހު ނޫސްވެރިންނާއި ވާހަކަ ދެއްކުމަށް ފަހު މެލްކޮމް ބުނީ އޭނާ އެ ޓީމު ދޫކޮށްލާނެކަން ގެރެންޓީކޮށް ބުނަން ނޭނގޭ ކަމަށާއި އެހެން ކްލަބަކަށް ބަދަލުވިޔަސް އެކަން އެއްވެސް މައްސަލައަކަށް ނުވާނެ ކަމަށެވެ. އޭނާ ބުނީ ބޯޑޯގައި މަޑުކުރަން ޖެހިއްޖެނަމަ އެ ކްލަބްގައި މަޑުވެސް ކުރާނެ ކަމަށެވެ. ހަމައެހެންމެ އޭނާ ބުނީ އިނގިރޭސި ޕްރިމިއާ ލީގުގައި ކުޅުމަކީ ކޮންމެ ކުޅުންތެރިޔެއްގެ ވެސް ހުވަފެނެއް ކަމަށާއި ކެރިއަރުގެ ކޮންމެވެސް ހިސާބަކުން އެކަން ހަގީގަތަކަށް ހަދަން ބޭނުންވާ ކަމަށެވެ.

ބޯޑޯގެ ޑިރެކްޓަރު ނިކޮލަސް ޓެވަނޮސްޓް ބުނެފައިވަނީ ސީޒަނުގެ އެންމެ މުހިންމު ބައިގައި އޭނާ އެ ކްލަބް ދޫކޮށް ނުދާނެ ކަމަށާއި އޭނާ އެ ކްލަބްގައި މަޑުކުރާނެ ކަމަށެވެ. އޭނާ ބުނީ އަންނަ ހޫނު މޫސުމުގެ ޓްރާންސްފާގައި ރަނގަޅު ހުށަހެޅުމެއް ލިބިއްޖެނަމަ އޭނާ ވިއްކާލުމަށް ފަސް ނުޖެހޭނެ ކަމަށާއި އެހެން ނަމަވެސް މިވަގުތު އޭނާއަކީ ކްލަބަށް ވަރަށް މުހިންމު ކުޅުންތެރިޔަކަށްވުމާއެކު އޭނާ ނުވިއްކާނެ ކަމަށެވެ.

ބެލެވޭ ގޮތުގައި އާސެނަލްއިން މި ފިނި މޫސުމުގެ ޓްރާންސްފާގައި އޭނާ ނުގެންނާނެއެވެ. ބޯޑޯއިން މެލްކޮމް ވިއްކުމަށް ކަނޑައަޅާފައިވާ 44 މިލިއަން ޕައުންޑްއަކީ އާސެނަލްގެ ކޯޗު އާސެން ވެންގާއަށް ކަމުދާ އަގެއް ނޫން ކަމަށާއި އެ ކްލަބްއިން މިވަގުތު ބޭނުން ވަނީ ޕިއާ އެމެރިކް އޮބަމެޔަންގް އަދި ހެންރިކް މިޚްތަރިޔާން ގެނައުމަށް ކަމަށް މީޑިއާތަކުން ވަނީ ބުނެފައެވެ. އެހެން ނަމަވެސް އަނެއްކާ ވެސް ހޫނު މޫސުމުގެ ޓްރާންސްފާގައި އާސެނަލްއިން އޭނާ ހޯދަން ދާނެ ކަމަށް ބެލެވެއެވެ.  

މެލްކޮމްގެ ޓީމު ކަމަށްވާ ބޯޑޯ އޮތީ ކުޅުނު 22 މެޗުން ލިބުނު 26 ޕޮއިންޓާއެކު ފްރެންޗް ލީގު ތާވަލުގެ 12 ވަނައިގައެވެ. ބްރެޒިލްގެ ކޮރިންތިއަންސްއިން ކެރިއަރު ފެށި މެލްކޮމް ބޯޑޯއަށް ބަދަލުވީ 2016 ވަނަ އަހަރުއެވެ. އެ ޓީމަށް 68 މެޗު ކުޅެދީފައިވާ މެލްކޮމް ވަނީ 15 ލަނޑު އެ ޓީމަށް ޖަހައިދީފައެވެ.