އާއްމު ކޮށް ފިލްމު ދެއްކުން 30 އަހަރަށް ވުރެ ދިގު މުއްދަތަކަށް އޮތް އޮތުން ނިމުމަކަށް ގެނެސް ސައުދީ އަރަބިއްޔާގައި ބައިސްކޯފުގޭގެ ޚިދުމަތް ދޭން ފަށައިފިއެވެ.
އަލުން ބައިސްކޯފް ދައްކަން ފެށި އިރު ފުރަތަމަ އެޅުވި ފިލްމަކަށް ވީ 2017 ވަނަ އަހަރު ނުކުތް އެންމެ އެއް ވަނދު ފިލްމެވެ.
ޓެންޓެއްގައި ހަދާފައިވާ ވަގުތީ ބައިސްކޯފްގޭގައި އެޅުވި ފިލްމަކީ "ދި އިމޯޖީ މޫވީ" އެވެ. މި ފިލްމަށް ރޮޓްން ޓޮމާޓޯސް އިން ދީފައިވާ ރޭޓިން އަކީ އެންމެ 9 އިން ސައްތަ އެވެ.
ވަނދު ފިލްމަކުން ބައިސްކޯފުގެ ޚިދުމަތް ފެށި ނަމަވެސް ގިނަ ބަޔަކު ދެކެނީ ފިލްމު ދައްކަން ފެށުމަކީ ސައުދީ އަރަބިއްޔާގެ ސިޔާސަތައް އައި ތާރީޚީ ބަދަލެއްގެ ގޮތުގައެވެ.
ސައުދީ އަރަބިއްޔާގައި ބައިސްކޯފު ދެއްކުން މަނާކުރީ 1980 ގެ އަހަރު ތަކުގައެވެ.
އަލުން އާއްމުކޮށް ފިލްމް ދެއްކުން ހުއްދަ ކުރެވުނީ، ވަލީ އަހުދު މުހައްމަދު ބިން ސަލްމާންގެ ވިޝަން 2030 ގެ ދަށުން ސައުދީ އަރަބިއްޔާ އަށް ގެންނަމުންދާ ބަދަލު ތަކުގެ ދަށުންނެވެ.
ވިޝަން 2030 ދަށުން ސައުދީ އަރަބިއްޔާގައި އެތައް ސަތޭކަ ސިނަމާ ބިނާކުރަން ވަނީ ނިންމާ ފައެވެ. މިގޮތުން ހުޅުވޭ ފުރަތަމަ ސިނަމާ މި އަހަރުގެ މާޗު މަހުގެ ތެރޭގައި ހުޅުވޭނެ ކަމަށް ޚަބަރުތައް ބުނެއެވެ.
ރޮއިޓާސް އިން ބުނެފައިވާ ގޮތުގައި 2030 އާ ހަމައަށް ދެ ހާސް ސްކްރީން އާއެކު ތިން ސަތޭކަ ސިނަމާ ބިނާ ކުރަން ސައުދީ ސަރުކާރުން ވަނީ ނިންމާފައެވެ.
ސައުދީ ސަރުކާރުން އުއްމީދު ކުރަނީ ބައިސްކޯފު ގޭގެ ޚިދުމަތުގެ ތެރެއިން ސައުދީ އިގްތިސާދަށް 24 ބިލިއަން ޑޮލަރު ލިބޭނެ ކަމަށެވެ. އަދި ތިރީސް ހާސް ވަޒިފާ އުފެދިގެން ދާނެ ކަމަށެވެ.
