އިނގިރޭސި ޕްރިމިއާ ލީގުގައި ސްޓޯކް ސިޓީއާ ދެކޮޅަށް ކުޅުނު މެޗުން މޮޅުވެ މެންޗެސްޓާ ސިޓީއިން ތާވަލުގެ ކުރީގައި ނަގާފައިވާ ލީޑު މެންޗެސްޓާ ޔުނައިޓެޑުން 12 ޕޮއިންޓްއަށް ކުޑަކޮށްފިއެވެ.

އަމިއްލަ ސަޕޯޓަރުންގެ ކުރިމަތީގައި ސްޓޯކް އަތުން ޔުނައިޓެޑް މޮޅުވީ 3-0 ގެ ނަތީޖާއަކުންނެވެ. މި މެޗުގައި އެ ޓީމުގެ ކުޅުންތެރިންގެ ފަރާތުން ރަނގަޅު ކުޅުމެއް ފެނިގެންދިޔައިރު ފްރާންސްގެ މިޑްފީލްޑަރު ޕައުލް ޕޮގްބާ ވަނީ ވަކިން ހާއްސަކޮށް މޮޅު ކުޅުމެއް ދައްކާފައެވެ. މިއީ ޖެހިޖެހިގެން ތިން މެޗުން ބަލިވުމަށްފަހު ޔުނައިޓެޑް މެޗަކުން މޮޅުވި ފުރަތަމަ ފަހަރެވެ. މި މެޗުގައި ސްޓޯކްގެ ބެންޗުގައި އެ ޓީމަށް އިރުޝާދު ދިނީ ވަގުތީ ގޮތުން ކޯޗުގެ މަގާމާއި ހަވާލުވެހުރި އެޑީ ނިއެޑްޒިކީއެވެ.

ފުރަތަމަ ހާފު ފެށިގެން ޔުނައިޓެޑްއިން ވަނީ ގިނަ ވަގުތު ބޯޅަ ގެންގުޅެ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. މި މެޗުގެ ފުރަތަމަ ލަނޑު ނުވަވަނަ މިނެޓުގައި ޕޮގްބާ ތަނަވަސްކޮށްދިން ފުރުސަތަކުން ޖަހައިދިނީ އެ ޓީމުގެ ކެޕްޓަން އެންޓޯނިއޯ ވެލެންސިއާއެވެ. މި ލަނޑަށް ފަހުވެސް ޔުނައިޓެޑްއިން ވަނީ މެޗުގެ ކޮންޓްރޯލް ދަމަހައްޓައި ސްޓޯކްގެ ގޯލަށް ނުރައްކާކޮށްފައެވެ. ނަތީޖާއެއްގެ ގޮތުން މެޗުގެ 38 ވަނަ މިނެޓުގައި އެންތަނީ މާޝިއާލް ވަނީ ލަނޑެއް ޖަހައިދީ އެ ޓީމުގެ ލީޑު އިތުރަށް ފުޅާކޮށްދީފައެވެ. މި ލަނޑު އޭނާ ޖެހީ ވެސް ޕޮގްބާ ތަނަވަސްކޮށްދިން ފުރުސަތަކުންނެވެ.

ދެ ލަނޑުގެ ލީޑެއްގައި އޮވެ ޔުނައިޓެޑްއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް ފުރަތަމަ ހާފެކޭ އެއްގޮތަށް މޮޅު ކުޅުމެއް ދައްކައި ނުރައްކާތެރި ގިނަ ހަމަލާތަކެއް އުފައްދާފައެވެ. ޔުނައިޓެޑްގެ ތިންވަނަ ލަނޑު މެޗުގެ 72 ވަނަ މިނެޓުގައި ކާމިޔާބުކޮށްދިނީ ފޯމުން ކަޓާފައިވާ ކަމަށް ގިނަ ބަޔަކު ބުނަމުންދާ އެ ޓީމުގެ ފޯވާޑް ރޮމެލޫ ލުކާކޫއެވެ. މި ލަނޑަށް ފަހުވެސް ލީޑު އިތުރަށް ފުޅާކުރުމަށް ޔުނައިޓެޑްއަށް ފުރުސަތު ލިބިގެންދިޔައިރު ހުއާން މަޓާ ފޮނުވާލި ހަމަލާއެއް ގޯލުގެ ދަނޑީގައި ވެސް ޖެހިފައިވެއެވެ.

މި މެޗަށްފަހު ވާހަކަ ދައްކަމުން ޔުނައިޓެޑްގެ ކޯޗު ހޯސޭ މޮރީނިއޯ ބުނީ ސްޓޯކްގެ ފަރާތުން ފެނިގެންދިޔައީ މޮޅު ކުޅުމެއް ކަމަށާއި މޮޅު ޓީމަކާއި ދެކޮޅަށް ކުޅެ ނަތީޖާ ނެރެވުމުން ވަރަށް ހިތްހަމަޖެހިފައި ހުރި ކަމަށެވެ. ހަމައެހެންމެ އޭނާ ބުނީ ސިޓީ ބަލިވި މެޗު ނުބަލާ ކަމަށާއި 12 ޕޮއިންޓްއަށް ފަރަގު ކުޑަވި ނަމަވެސް އެއީ އަދިވެސް އަތުލައިގަންނަން ވަރަށް އުނދަގޫވާނެ އެއްޗެއް ކަމަށެވެ.

ޕްރިމިއާ ލީގުގެ ޕޮއިންޓް ތާވަލުގެ އެއްވަނައިގައި ޔުނައިޓެޑްއަށްވުރެ 12 ޕޮއިންޓް ކުރިން 62 ޕޮއިންޓާއެކު އޮތީ އެ ޓީމުގެ ވާދަވެރި މެންޗެސްޓާ ސިޓީއެވެ. ޔުނައިޓެޑްއަށް 50 ޕޮއިންޓާއެކު ދެވަނަ ލިބޭއިރު ތިންވަނައިގައި 47 ޕޮއިންޓާއެކު އޮތީ ލިވަޕޫލްއެވެ. ހަތަރު ވަނައިގައި އޮތް ޗެލްސީއަށް ވެސް 47 ޕޮއިންޓް ލިބިފައިވާއިރު އެ ޓީމަށް ހަތަރު ވަނަ ލިބެނީ ލަނޑުގެ ތަފާތުންނެވެ.