ބިޑަކަށް ނުލައި، އެންމެ 1.4 މިލިއަން ރުފިޔާއަށް ވެސްޓްޕާކް ހުރި ބިން ވިއްކާލަނީ!
11 ޖެނުއަރީ 2018 | ބުރާސްފަތި 08:54ބިން ވިއްކާލާ ޖުމްލަ އަގަކީ 1،450،730ރ
ވެސްޓްޕާކް ސަރަހައްދު، އެސަރަހައްދުވަނީ ވަރަށް ބޮޑަށް ވީރާނާވެފައި
މާލޭ ހުޅަނގު އުތުރު ފަރާތު ކަންމަތީގައި ކުރިން ވެސްޓްޕާކް ރެސްޓޯރަންޓް ހިންގި ބިން އެންމެ 1.4 މިލިއަން ރުފިޔާއަށް، ބިޑަކަށް ނުލައި ވިއްކާލަން ޓޫރިޒަމް މިނިސްޓްރީއިން އިއުލާންކޮށްފިއެވެ.
19343 (ނަވާރަ ހާސް ތިން ސަތޭކަ ސާޅީސް ތިން) އަކަފޫޓުގެ މި ބިން ވިއްކާލާ ޖުމްލަ އަގަކީ 1،450،730ރ (އެއް މިލިއަން ހަތަރު ލައްކަ ފަންސާސް ހާސް ހަތްސަތޭކަ ތިރީސް ރުފިޔާ)އެވެ. މިއީ އަކަފޫޓަކަށް 75ރ ގެ ރޭޓުންނެވެ. މި ރޭޓަކީ މީހުން ދިރިއުޅޭ ރަށްރަށުން ފަތުރުވެރިކަމުގެ ބޭނުމަށް ބިން ވިއްކުމަށް ކަނޑައަޅާފައިވާ ރޭޓުތަކުގެ ތެރެއިން ވެރިރަށް މާލެ އާއި މާލެ އަތޮޅަށް ކަނޑައަޅާފައިވާ ރޭޓެވެ.
އެބިމުގައި ކުރިން ވެސްޓްޕާކް ހިންގި ޔޮޓް ޓުއަރސްއިން އެތަން ސަރުކާރުން އަތުލުމާއި ގުޅިގެން އެމައްސަލަ ކޯޓަށް ހުށަހެޅިއެވެ. އެހެން ނަމަވެސް ސިވިލް ކޯޓާއި، ހައިކޯޓުން ވެސް އެމައްސަލަ ނިންމީ ދައުލަތާއި އެއްކޮޅަށެވެ.
ކުރިންވެެސް ވެސްޓްޕާކް ހުންނަ ބިން ވިއްކާލަން އިއުލާންކުރިއެވެ. އެހެން ނަމަވެސް ބުރާސްފަތި ދުވަހު ޓޫރިޒަމް މިނިސްޓްރީއިން އަލުން އެތަން ވިއްކާލުމަށް އިއުލާން ކުރީ މާލޭގެ ހުޅަނގު ދެކުނު ބިމުގެ ގޮތުގައެވެ. އެހެންނަމަވެސް މިހާރުވަނީ އެކަން އިސްލާހުކޮށް، އަލުން ގެޒެޓް ކޮށްފައެވެ.
ޤާނޫނަށް ގެނައި ބަދަލެއްގެ ތެރެއިން ފަތުރުވެރިކަމަށް ދޫކުރާ ބިންތަކާއި ރަށްތައް މިހާރު ދޫކުރަނީ ބިޑްކުރުމެއް ނެތިއެވެ.
ވެސްޓްޕާކާއި ޖެހިގެން އިރަށް އޮންނަ ބިމުގައި ޕީޕީއެމްއިން ވަނީ އެޕާޓީގެ ކެމްޕޭން އޮފީހެއް ވެސް ހުޅުވާފައެވެ.
