އެއާއޭޝިއާއިން ރާއްޖެއަށް ކުރާ ދަތުރުތައް އިތުރުކުރަން ނިންމައިފި

ބަޖެޓް އެއާލައިނެއްގެ ގޮތުގައި މަޝްހޫރުވެފައިވާ އެއާއޭޝިއާއިން ރާއްޖެއަށް ކުރާ ދަތުރުތަކުގެ ޑިމާންޑް ބޮޑުވެ، ދަތުރުތައް އިތުރުކުރަން ނިންމައިފި އެވެ. އަދި މިހާރު ވަނީ ހާއްސަ ޕްރޮމޯޝަނެއް ވެސް ފަށައިފަ އެވެ.

އެ އެއާލައިނުން ނެރުނު ބަޔާނެއްގައި ބުނެފައިވާ ގޮތުގައި، ރާއްޖޭގެ ސެކްޓާގެ ޑިމާންޑް ބޮޑުވުމާއެކު، އެއާއޭޝިއާ އެކްސްގެ ދަތުރުތައް ފެބްރުއަރީ 6 ގައި ރާއްޖެއަށް ފަށާނެ އެވެ. ރާއްޖެއަށް މިހާރު ދަތުރުކުރަން ބޭނުންކުރަނީ އެއާއޭޝިއާގެ އެއާބަސް އޭ320 މަރުކާގެ 180 ސީޓްގެ މަތިންދާ ބޯޓެވެ. މި ފްލައިޓްގެ އިތުރުން، ފެބްރުއަރީ 6 އިން ފެށިގެން 377 ސީޓްގެ ފްލައިޓެއްގެ ދަތުރުތައް އޮންނާނެ އެވެ. މި ފްލައިޓްގައި އެންމެ ފަހުގެ ޕްރީމިއަމް ފްލެޓް ބެޑްގެ 12 ސީޓް ވެސް ހިމެނެ އެވެ.

އެއާއޭޝިއާގެ ދަތުރު ތާވަލު

މެލޭޝިޔާ އާއި ރާއްޖެއާ ދެމެދު މިހާރު ކޮންމެ ދުވަހަކު އެއާއޭޝިއާގެ ފްލައިޓެއް ބާއްވަމުން އަންނައިރު، އެއާއޭޝިއާ އެކްސްއާއެކު ހަފުތާއެކު ޖުމުލަ 11 ފްލައިޓް އޮންނާނެ އެވެ.

އެއާއޭޝިއާއިން މިހާރު ވަނީ ހާއްސަ ޕްރޮމޯޝަނެއް ވެސް ފަށައިފަ އެވެ. މި މަހުގެ 14 އަށް ނިމޭ މި ޕްރޮމޯޝަންގައި 199 ރިންގިޓަށް ޓިކެޓް ލިބެ އެވެ. މި ޕްރޮމޯޝަންގައި ގަންނަ ޓިކެޓުން މި އަހަރުގެ މެއި މަހުގެ 6 ވަނަ ދުވަހުގެ ނިޔަލަށް ދަތުރުކުރެވޭނެ އެވެ.

އެއާއޭޝިއާގެ ފްލައިޓްތަކުގައި، 2017 ވަނަ އަހަރު ރާއްޖެ އާއި މެލޭޝިއާގެ ކުއާލަލަންޕޫރާ ދެމެދު 106000 މީހުން ދަތުރުކޮށްފައިވެ އެވެ.