އިނގިރޭސި އެފްއޭ ކަޕްގެ ހަތަރު ވަނަ ބުރުން ލިވަޕޫލްއާއި މެންޗެސްޓާ ޔުނައިޓެޑް ޖާގަ ހޯދައިފިއެވެ.

ލިވަޕޫލްއިން ހަތަރު ވަނަ ބުރުގެ ޖާގައެއް ކަށަވަރު ކުރީ އަމިއްލަ ދަނޑުގައި 2-1 ގެ ނަތީޖާއަކުން އެވަޓަން ބަލިކޮށްގެންނެވެ. މި މެޗުގައި ލިވަޕޫލްއާ އަލަށް ގުޅުނު ނެދަލޭންޑްސްގެ ޑިފެންޑަރު ވާޖިލް ވެންޑައިކް ވަނީ އެ ޓީމުގެ ފުރަތަމަ އެގާރައިގައި ހިމެނިގެން ކުޅެފައެވެ. ލިވަޕޫލްއިން ވަނީ މި މެޗުގައި ރަނގަޅު ކުޅުމެއް ދައްކައި އެވަޓަންގެ ގޯލަށް ނުރައްކާ ކޮށްފައެވެ.

މި މެޗުގެ ފުރަތަމަ ލަނޑު މެޗުގެ 35 ވަނަ މިނެޓުގައި ލިބުނު ޕެނަލްޓީއަކުން ލިވަޕޫލްއަށް ޖަހައިދިނީ ޖޭމްސް މިލްނާއެވެ. މި ލަނޑަށް ފަހު ވެސް ލިވަޕޫލްއަށް ވަނީ ފުރަތަމަ ހާފުގައި ލަނޑު ޖެހުމަށް ރަނގަޅު ފުރުސަތުތަކެއް ލިބި ބޭކާރުވެފައެވެ.

އެއް ލަނޑުގެ ލީޑެއްގައި އޮވެ ލިވަޕޫލްއިން ފުރަތަމަ ހާފު ނިންމާލިއިރު އެވަޓަންއިން ވަނީ ދެވަނަ ހާފުގައި އެ ޓީމުގެ ކުޅުން ވަރުގަދަ ކޮށްފައެވެ. ނަތީޖާއެއްގެ ގޮތުގެ މެޗުގެ 67 ވަނަ މިނެޓުގައި އައިސްލޭންޑުގެ މިޑްފީލްޑަރު ގިލްފީ ސިގަޑްސަން ވަނީ ލަނޑެއް ޖަހައިދީ އެ ޓީމަށް ނަތީޖާ ހަމަހަމަ ކޮށްދީފައެވެ. އެހެން ނަމަވެސް މެޗު އެއްވަރުވާން ދަނިކޮށް ވެންޑައިކް ވަނީ އޭނާ ލިވަޕޫލްއަށް ޖަހައިދިން ފުރަތަމަ ލަނޑު އެ ޓީމަށް ޖަހައިދީ މި މެޗުން އެ ޓީމު މޮޅު ކޮށްދީފައެވެ.

މި މުބާރާތުގެ ހަތަރު ވަނަ ބުރުން ޔުނައިޓެޑް ޖާގަ ހޯދީ އަމިއްލަ ދަނޑުގައި 2-0 ގެ ނަތީޖާއަކުން ޑަރބީ ކައުންޓީ ބަލިކޮށްގެންނެވެ. މި މެޗުގައި ޔުނައިޓެޑުން ނެރެފައިވަނީ ވަރުގަދަ ފުރަތަމަ އެގާރައެކެވެ. މި މެޗުގައި ގިނަ ވަގުތު ބޯޅަ ހިފަހައްޓައިގެން މޮޅަށް ކުޅެފައިވަނީ ޔުނައިޓެޑުންނެވެ. ކައުންޓާ އެޓޭކުގައި ޑަރބީއިން ޔުނައިޓެޑްގެ ގޯލަށް ނުރައްކާކުރުމަށް މަސައްކަތްކުރި އިރު ޔުނައިޓެޑުން ވަނީ ޑަރބީގެ ގޯލާއި އަމާޒުކޮށް 10 ހަމަލާއެއް ފޮނުވާލާފައެވެ.

މި މެޗުގެ ފުރަތަމަ ހާފުގައި ޔުނައިޓެޑުން ފޮނުވާލި ގިނަ ހަމަލާތަކުގެ ހުރަހަކަށް ވެގެންދިޔައީ ޑަރބީގެ ގޯލު ބެލެހެއްޓި ސްކޮޓް ކާސަންއެވެ. ޕޮގްބާއާ ރަޝްފޯޑު ގިނަ ހަމަލާތަކެއް ފޮނުވާލިއިރު ރަޝްފޯޑު ފޮނުވާލި ހަމަލާއެއް ޑަރބީގެ ގޯލުގެ ދަނޑީގައި ވެސް ޖެހިފައިވެއެވެ.  

ދެ ޓީމު އެއްވަރުވެ އޮވެ ފުރަތަމަ ހާފު ނިމިގެންދިޔައިރު ޔުނައިޓެޑުން ވަނީ ފުރަތަމަ ހާފެކޭ އެއްގޮތަށް ދެވަނަ ހާފުގައި ވެސް މެޗުގެ ކޮންޓްރޯލް ދަމަހައްޓާފައެވެ. ދެވަނަ ހާފުގައި ވެސް ރަޝްފޯޑު ފޮނުވާލި ހަމަލާއެއް ޑަރބީގެ ގޯލުގެ ދަނޑިއަށް އަމާޒުވިއެވެ. އެހެން ނަމަވެސް ތަކުރާރުކޮށް ޔުނައިޓެޑުން އުފައްދަމުންދިޔަ ހަމަލާތަކުގެ ނަތީޖާއަކަށް ވެގެންދިޔައީ މެޗުގެ 80 ވަނަ މިނެޓުގައި އެ ޓީމަށް ލީޑު ލިބިގެން ދިޔުމެވެ. ހިތްގައިމު ލަނޑަކާއެކު އެ ޓީމަށް ލީޑު ނަގައިދިނީ ޖެސޭ ލިންގާޑްއެވެ. ޔުނައިޓެޑްއިން މެޗުގައި ޖެހި ދެވަނަ ލަނޑު މެޗުގެ 90 ވަނަ މިނެޓުގައި އެ ޓީމަށް ޖަހައިދިނީ ބެލްޖިއަމްގެ ފޯވާޑް ރޮމެލޫ ލުކާކޫއެވެ.

މި މުބާރާތުގެ މިދިޔަ އަހަރުގެ ޗެމްޕިއަނުންނަކީ 13 ވަނަ ފަހަރަށް މި މުބާރާތުގެ ތަށި މިދިޔަ އަހަރު އުފުލާލި އާސެނަލްއެވެ.