އިނގިރޭސި ޕްރިމިއާ ލީގުގައި މެންޗެސްޓާ ސިޓީއާއި އާސެނަލް ކުޅުނު މެޗުތަކުން އެ ދެ ޓީމު ވެސް އެއްވަރުވެއްޖެއެވެ.
ޖެހިޖެހިގެން 19 ވަނަ މެޗުން މޮޅުވުމުގެ އަޒުމުގައި ނުކުތް ސިޓީ އެއްވަރުވެފައި ވަނީ ރަށުން ބޭރުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުންނެވެ. މި މެޗު އެއްވަރުވެފައި ވަނީ އެއްވެސް ޓީމަކަށް ލަނޑެއް ނުޖެހި 0-0 ގެ ނަތީޖާއަކުންނެވެ. މި މެޗުގައި ގިނަ ވަގުތު ބޯޅަ ހިފަހައްޓައިގެން ކުޅެ ސިޓީއިން ވަނީ ލަނޑު ޖެހުމަށް ވެސް ރަނގަޅު ފުރުސަތުތަކެއް ތަނަވަސް ކޮށްފައެވެ. ޕެލަސްއިން ވެސް ވަނީ ކައުންޓާ އެޓޭކުގައި ސިޓީގެ ގޯލަށް ނުރައްކާ ކުރުމަށް މަސައްކަތް ކޮށްފައެވެ.
މި މެޗުގެ ފުރަތަމަ ހާފުގައި ސިޓީގެ ފޯވާޑް ގެބްރިއެލް ޖީސަސްއަށް އަނިޔާވެގެން ބޭލިއިރު އޭނާގެ ބަދަލުގައި ކުޅެން ނުކުމެފައިވަނީ އަގުއޭރޯއެވެ. މެޗުގެ 28 ވަނަ މިނެޓުގައި އޭނާ ފޮނުވާލި ހަމަލާއެއް ޕެލަސްގެ ގޯލުގެ ދަނޑީގައި ޖެހުމަށްފަހު ބޭރަށްދިޔައިރު އޭނާއަށް ވަނީ ފުރަތަމަ ހާފު ނިމެން ދަނިކޮށް ވެސް ރަނގަޅު ފުރުސަތެއް ލިބި ބޭކާރުވެފައެވެ.
ފުރަތަމަ ހާފެކޭ އެއްގޮތަށް ސިޓީއިން ވަނީ ދެވަނަ ހާފުގައި ވެސް ލަނޑު ޖެހުމަށް ރަނގަޅު ފުރުސަތުތަކެއް ހޯދާފައެވެ. އެ ޓީމުން ފޮނުވާލި ހަމަލާތަކުގެ ހުރަހަކަށްވީ ޕެލަސްގެ ތަޖުރިބާކާރު ކީޕަރު ހެނެސީއެވެ. މި ހާފުގައި ޕެލަސްއިން އެ ޓީމުގެ ކުޅުން ރަނގަޅުކުރިއިރު އެ ޓީމަށް ވަނީ ލީޑު ނެގުމަށް ރަނުގެ ފުރުސަތެއް ލިބި ބޭކާރުވެފައެވެ. އެގޮތުން މެޗުގެ ފުރިހަމަ ވަގުތު ހަމަވެގެން ރެފްރީ ކުޅެން ދެއްކި އިތުރު ވަގުތުގެ ތެރޭގައި އެ ޓީމަށް ލިބުނު ޕެނަލްޓީ ސިޓީގެ ކީޕަރު އެޑާސަން މޮއާރޭސް ދިފާއުކުރިއެވެ.
ވެސްޓް ބްރޮމްއާއި އާސެނަލް ކުޅުނު މެޗު ނިމިފައިވަނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ. މި މެޗުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނިގެންދިޔައިރު ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސް ކޮށްފައެވެ. މި މެޗުގެ ފުރަތަމަ ހާފުގައި އެއްވެސް ލަނޑެއް ފެނިގެން ގޮސްފައެއް ނުވެއެވެ.
It ends in a draw after that late penalty#WBAvAFC pic.twitter.com/1gkIAFg4or
— Arsenal FC (@Arsenal) December 31, 2017
މި މެޗުގެ ފުރަތަމަ ލަނޑު ޖަހާ ލީޑު ނަގާފައިވަނީ އާސެނަލްއިންނެވެ. މެޗުގެ 83 ވަނަ މިނެޓުގައި އެ ޓީމަށް ލީޑު ލިބިގެން ދިޔައީ ވެސްޓް ބްރޮމްގެ ޖޭމްސް މެކްލީން އަތުން ބައިކޮޅަށް ވަން ލަނޑުންނެވެ. އެހެން ނަމަވެސް އޭގެ ހަ މިނެޓު ފަހުން ވެސްޓް ބްރޮމްއިން ނަތީޖާ އެއްވަރުކުރިއެވެ. މި ލަނޑު ލިބުނު ޕެނަލްޓީއަކުން އެ ޓީމަށް ޖަހައިދިނީ ފޯވާޑް ޖޭ ރޮޑްރިގޭޒްއެވެ.
ޕްރިމިއާ ލީގުގެ ޕޮއިންޓް ތާވަލުގެ އެއްވަނައިގައި 59 ޕޮއިންޓާއެކު މެންޗެސްޓާ ސިޓީ އޮތްއިރު ދެވަނައިގައި 45 ޕޮއިންޓާއެކު އޮތީ ޗެލްސީއެވެ. މެންޗެސްޓާ ޔުނައިޓެޑަށް 44 ޕޮއިންޓާއެކު ތިންވަނަ ލިބޭއިރު 41 ޕޮއިންޓާއެކު ހަތަރު ވަނަ ލިބެނީ ލިވަޕޫލްއަށެވެ. ހަމައެހެންމެ 38 ޕޮއިންޓާއެކު ފަސްވަނަ ލިބެނީ އާސެނަލްއަށެވެ.
