ކޮޅުނބުގައި ސަލާން ޖެހުން މަނާކުރަނީ

ސްރީލަންކާގެ ވެރިރަށް ކޮޅުނބުގެ މަގުތަކާއި އާއްމު ދަތުރުފަތުރުގެ ނިޒާމްގެ ތެރޭގައި ސަލާންޖެހުން މަނާކުރަން ލަންކާ ސަރުކާރުން ނިންމައިފިއެވެ.

ލަންކާގެ މެގަޕޮލިސް އަދި ވެސްޓަރން ޑިވެލޮޕްމަންޓް މިނިސްޓަރ ޗަމްޕިކަ ރަނަވަކަ ވިދާޅުވީ އަންނަ ޖެނުއަރީ މަހުގެ ފުރަތަމަ ދުވަހުން ފެށިގެން ކޮޅުނބުގައި ސަލާން ޖެހުން މަނާވާނެ ކަމަށެވެ. ރަނަވަކަ ވިދާޅުވީ ކޮޅުނބުގެ މުނިސިޕަލް ކައުންސިލާއި ވެލްފެއަރ މިނިސްޓްރީ ގުޅިގެން ހެދި ދިރާސާއިން ދައްކާ ގޮތުގައި ކޮޅުނބުގެ ސަރަހައްދުގައި ސަލާން ޖަހާ 600 އެއްހާ މީހުން އުޅެމުންދާ ކަމަށެވެ. ރަނަވަކަ އިތުރަށް ވިދާޅުވީ މިނިންމުން ނިންމެވީ ސަލާން ޖަހާ މީހުންގެ ސަބަބުން އާއްމުންނަށާއި އާއްމު ދަތުރުފަތުރުގެ ނިޒާމަށް އެކަމުގެ ސަބަބުން އުނދަގޫ ވާތީ ކަމަށެވެ. އަދި ކޮޅުނބު ޒީނަތްތެރިކުރުމަށް ކުރާ މަސައްކަތަށް ވެސް އެކަމުގެ ސަބަބުން ހުރަސް އެޅޭ ކަމަށް އޭނާ ވިދާޅުވިއެވެ.

މިނިސްޓަރ ރަނަވަކަ ވިދާޅުވީ ސަލާން ޖެހުން މަނާކުރި ނަމަވެސް، ސަލާން ޖަހާ މީހުންނަށް ސަރުކާރުން އަޅާލާނެ ކަމަށެވެ. އެގޮތުން ސަލާން ޖަހަން ނިކުމެ އުޅޭ ކުޑަކުދިންނަށް ތައުލީމީ ފުރުސަތު ހޯދައިދީ، ބަލި މީހުންނަށް ބޭސް ފަރުވާ ހަމަޖައްސައިދޭނެ ކަމަށެވެ. އަދި ބަލިޙާލުގެ ސަބަބުންނާއި މަޖުބޫރީ ޙާލަތުގައި ސަލާން ޖަހަން ނިކުމެ އުޅޭ މީހުންނަށްޓަކައި ލަންކާގެ އަމްބަލަންތޯޓާގައި 80 މިލިއަން ރުޕީޒް ޚަރަދު ކޮށްގެން ރީހެބިލިޓޭޝަން މަރުކަޒެއް ޤާއިމްކޮށްފައިވާ ކަމަށް އޭނާ ވިދާޅުވިއެވެ. ސަލާން ޖަހަން އުޅޭ މީހުންގެ ތެރޭގައި ގަދަވެ ސަލާމަތުން ތިބެ ސަލާން ޖަހާ މީހުން ތިބިކަން ފާހަގަކުރައްވާ ރަނަވަކަ ވިދާޅުވީ އެމީހުންނަށް ޖެހޭނީ ވަޒީފާގެ ފުރުސަތު ހޯދަން ކަމަށާއި، މަސައްކަތް ކުރެވޭ ޙާލުގައި ތިބެ ސަލާން ޖަހާ މީހުންނާއި މެދު ފިޔަވަޅު އަޅާނެ ކަމަށެވެ.

ފަޤީރު ހާލުގައި އުޅޭ މީހުންނަށް ވެލްފެއަރ މިނިސްޓްރީގެ ތެރެއިން އެހީ ހަމަޖެހޭނެކަން ފާހަގަ ކުރައްވަމުން ކޮޅުނބުގެ މަގުތަކުގައި ސަލާން ނުޖެހުމަށް މިނިސްޓަރ ރަނަވަކަ އެދިވަޑައިގަތެވެ.