އިސްލާމް ދީނުގެ ވާހަކަތަކަކީ ހަމައެކަނި ނަމާދާއި ރޯދައިގެ ވާހަކައެއް ނޫން: ޑރ. މަޖީދު

އިސްލާމް ދީނުގެ ވާހަކަތަކަކީ ހަމައެކަނި ނަމާދާއި ރޯދައިގެ ވާހަކަ ނޫންކަމަށާއި، އަދުލު އިންސާފަކީ އިސްލާމް ދީނުގެ އެންމެ މުހިއްމު އެއް އަސާސްކަމަށް ކުރީގެ އިސްލާމިކް އެފެއަރޒް މިނިސްޓަރ ޑރ އަބްދުލް މަޖީދު އަބްދުލްބާރީ ވިދާޅުވެއްޖެއެވެ.

ރާއްޖެ އިސްލާމްވި ދުވަސް ފާހަގަކުރުމަށް ގުޅިފައިވާ އިދިކޮޅު ކޯލިޝަންގެ ފަރާތުން ބޭއްވި ޕެނަލް ޑިސްކަޝަންގައި ވާހަކަ ދައްކަވަމުން ޑރ މަޖީދު ވިދާޅުވީ އަދުލު އިންސާފު ޤާއިމްވާން ޖެހޭކަމަށާއި، އަދުލު އިންސާފު ޤާއިމް ނުކުރެވޭނަމަ އެވާހަކަ ދައްކަން ޖެހޭކަމަށެވެ. އަދި ވައްކަމާއި ކޮރަޕްޝަންގެ ވާހަކަ ދައްކަން ޖެހޭކަމަށް ޑރ މަޖީދު ވިދާޅުވިއެވެ.

އެހެން ނަމަވެސް ސަރުކާރުގެ ތެރޭގައި ހުރި ވައްކަމާއި ކޮރަޕްޝަންގެ ވާހަކަ ދެއްކުމަށް ދީނީ އިލްމުވެރިން ބިރުގަނެ، ފަސްޖެހޭކަމަށް ޑރ. މަޖީދު ވިދާޅުވިއެވެ. އަދާލަތު ޕާޓީގެ ރައީސް އައްޝައިޚް ޢިމްރާން އަބްދުﷲގެ މިސާލު ނަންގަވަމުން ޑރ މަޖީދު ވިދާޅުވީ ދީނީ އިލްމުވެރިން ކޮރަޕްޝަނާއި ވައްކަމުގެ މައްސަލަތަކުގެ ވާހަކަ ދެއްކުމުން އެބޭފުޅުންނަށް ސަރުކާރުން ފިޔަވަޅު އަޅަމުންދާކަމަށެވެ. އަދި ޝަރުޢީ ދާއިރާގައި ހުރި މައްސަލަތަކުގެ ވާހަކަ ދެއްކުމުން، އަބުރު ގެއްލެނީއޭ، ނުވަތަ ކޯޓުގެ ޙުރުމަތް ކެނޑެނީއޭ ބުނެ، އެވާހަކަ ދައްކާ ފަރާތްތަކާއި ދޭތެރޭ ފިޔަވަޅު އަޅަމުންދާކަމަށާއި، އެކަންކަން އިސްލާހުކުރުމަށް ފުރުސަތު ނުދޭކަމަށް ޑރ. މަޖީދު ވިދާޅުވިއެވެ. އަދި އެކަންތައްތައް އިސްލާހުކުރަން އޮތް ރައްޔިތުންގެ މަޖިލީހުގެ ތެރެއިން، އިތުބާރު ނެތް ރައީސަކު ހުންނަވައިގެން އިލެކްޝަންސް ކޮމިޝަން މެދުވެރިކޮށް އެމަޖިލީހުގެ އިސްލާހަށް މަސައްކަތްކުރާ މެމްބަރުންގެ ގޮނޑި ގެއްލިއްޖެކަމަށް ނިންމާފައިވާތީ ޑރ. މަޖީދުވަނީ ކަންބޮޑުވުން ފާޅުކުރައްވާފައެވެ.

ދީނީ ކަންކަމަށް ސަރުކާރުން ނުފޫޒު ފޯރުވާކަމަށް ވިދާޅުވެ، ޑރ މަޖީދު ވިދާޅުވީ ފަތުވާ ކޮމިޓީއިން ފަތުވާނެރެ، ހުކުރު ޚުޠުބާވެސް ކިޔަމުންދަނީ ސަރުކާރުން ބޭނުންވާ ގޮތަށްކަމަށެވެ. އަދި ދުނިޔޭގައި މިހާރަކަށް އައިސް ދިމާވާ ދީނީ އެންމެ ބޮޑެތި މައްސަލަތައް ދިމާވަނީ ސަރުކާރުތަކުން ބޭނުންވާ ގޮތަށް ދީނީ އިލްމުވެރިން ދީނީ ފަތުވާ ނެރެމުންދާތީކަމަށް ވިދާޅުވެ، އެކަމާއިވެސް ޑރ މަޖީދު ކަންބޮޑުވުން ފާޅުކުރެއްވިއެވެ.

އިދިކޮޅު ކޯލިޝަންގައި ހިމެނޭ އެހެން ޕާޓީތަކާއިއެކު ބޭއްވި މި ޕެނަލް ޑިސްކަޝަންގައި ވާހަކަ ދައްކަވަމުން ޑރ. މަޖީދު އިތުރަށް ވިދާޅުވީ އިސްލާމް ދީނަކީ ދިރިއުޅުމުގެ ފުރިހަމަ ނިޒާމްކަމަށާއި، ދީނީ ވާހަކަތަކުގެ ތެރޭގައި ވެރިކަން ހިންގުމުގެ ވާހަކަތައް ހިމެނޭކަމަށެވެ. އަދި ވެރިކަމުގައި ހުރި މައްސަލަތަކުގެ ވާހަކަވެސް ދެކެވޭނެކަމަށް ޑރ. މަޖީދު ވިދާޅުވިއެވެ.