މާލެއިން ފެށިގެން ދެކުނުގެ އަތޮޅުތަކަށް މޫސުން ގޯސްވާނެކަމަށް ލަފާކުރެވޭތީ ސަމާލުވެ ތިބުމަށް އަންގައި، ވައިޓް އެލަރޓް ނެރެފިއެވެ.

މޫސުމާއި ބެހޭ ޤައުމީ އިދާރާއިން އާދިއްތަ ދުވަހުގެ ފަތިހު ނެރުނު ވައިޓް އެލަރޓްގައިވާ ގޮތުން ފަތިހު 4:00އިން ފެށިގެން އާދިއްތަ ދުވަހުގެ ހެނދުނު 10:00އާއި ދެމެދު މާލެއާއި އައްޑުއާއި ދެމެދުގެ އަތޮޅުތަކަށް ގުގުރުމާއިއެކު ބޯކޮށް ވާރޭ ވެހޭނެއެވެ. އަދި ވިލާގަނޑުގައި ގަޑިއަކު 40 މޭލަށް މިސަރަހައްދަށް ވައިގަދަވާނެކަމަށް ލަފާކުރެވޭކަމަށް މެޓް އޮފީހުން ބުނެއެވެ.

ހޮނިހިރު ދުވަހުގެ ފަތިހުވެސް ރ. އަތޮޅުން ފެށިގެން ދެކުނަށް ވައިޓް އެލަރޓް ނެރުނުއިރު، ހޮނިހިރު ދުވަހުގެ ހަވީރު ލ. އަތޮޅުން ފެށިގެން އުތުރަށް ވައިޓް އެލަރޓް ނެރުނެވެ. މީގެ 2 ހަފްތާކުރިން އިންޑިއާ ކަނޑުގެ ސަރަހައްދަށް އެރި ތޫފާން އޮކިއަށްފަހު އަނެއްކާވެސް މިސަރަހައްދުގެ މޫސުން ވަނީ ކޮންމެވެސް ވަރަކަށް ގޯސްވެފައެވެ.