އެއްވެސް ޕައިލެޓަކަށް ފިޔަވަޅެއް އަޅާފައެއް އަދި ނުވޭ: އައިލެންޑް އޭވިއޭޝަން
150 ޕައިލެޓުން މަސައްކަތް ކުރޭ
އައިލެންޑް އޭވިއޭޝަންގެ އޮފީސް ތެރެ
ލީކުވެގެން އުޅޭ އޯޑިޔޯއާއި ގުޅިގެން ނުވަތަ މައްސަލައަކާއި ގުޅިގެން އެއްވެސް ޕައިލެޓަކަށް ފިޔަވަޅެއް އަޅާފަ ނުވާ ކަމަށް އައިލެންޑް އޭވިއޭޝަނުން ބުނެފި އެވެ.
ނޫސްވެރިންނާއި ބައްދަލުކުރައްވާ، އޭވިއޭޝަންގެ ހިދުމަތްތަކާއި ގުޅޭ ގޮތުން މައުލޫމާތު އޮޅުންފިލުވާދެއްވަމުން، އައިލެންޑް އޭވިއޭޝަނުން ބުނީ، މޯލްޑިވިއަން އަކީ އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އާއި މޯލްޑިވްސް ސިވިލް އޭވިއޭޝަން އޮތޯރިޓީގެ އުސޫލުތަކަށް ވަރަށް ފުރިހަމައަށް ތަބާވަމުން އަންނަ އެއަރލައިނެއް ކަމަށާއި އެއްވެސް ޕައިލެޓެއް ވަރުބަލިވެ، ނުވަތަ ފިޓްނެސްއަށް އަސަރުކުރާ މިންވަރަށް ޕައިލެޓުންގެ ޝެޑިއުލް ހަމަޖެހިފައިނުވާ ކަމަށެވެ. މަތިންދާ ބޯޓް ހިދުމަތަކީ ވަކި އުސޫލުތަކެއް ކަނޑައެޅި، އަބަދުވެސް ގަވައިދުތަކަށް އަމަލު ކުރޭތޯ މޮނީޓަރ ކޮށް އޮޑިޓް ކުރެވޭ ހިދުމަތްތަކަށްވާ އިރު، މި އުސޫލުތަކަކީ އެއްވެސް ހާލަތެއްގައި ދޫކޮށްލެވޭނެ އުސޫލުތަކެއް ނޫން ކަމަށެވެ. އައިލެންޑް އޭވިއޭޝަނުން ބުނީ، އެ އޮތޯރިޓީގެ ގާތްގަނޑަކަށް 150 ވަރަކަށް ޕައިލެޓުން ވަޒީފާ އަދާކުރަމުންދާ އިރު ހުރިހާ ޕައިލެޓުންވެސް މަސައްކަތް ކުރަނީ ވަރަށް ހިތްހަމަޖެހިގެން ކަމަށެވެ.
ޕައިލެޓުންގެ ޝަކުވާތައް ހުށަހެޅޭނެ އުސޫލުތައް ކަނޑައަޅާފައިވާ އިރު، އެ އުސޫލުތަކުގެ ތެރެއިން ޝަކުވާތަކަށް އަބަދުވެސް އެ އިދާރާއިން މަރުހަބާ ކިޔާ ކަމަށް އައިލެންޑް އޭވިއޭޝަނުން ބުނެ އެވެ. އެހެން ނަމަވެސް ޕައިލެޓުންގެ ޑިއުޓީއާ މެދު ހިތްހަމަނުޖެހިގެން އެއްވެސް ޕައިލެޓެއް ނުވަތަ މުވައްޒަފެއްވެސް ޝަކުވާ ހުށަހަޅާފައިނުވާ ކަމަށް އެއިދާރާއިން ބުނެ އެވެ. އެފަދަ ކަމެއް އެނގިގެން އުޅޭ ކަމުގެ މައުލޫމާތު ލިބިފައިވަނީ ހަމައެކަނި މީޑިޔާތަކުން ކަމަށް އެއިދާރާއިން ބުނެ އެވެ.
އައިލެންޑް އޭވިއޭޝަނުން ބުނީ އަހަރެއްގެ ތެރޭގައި ޕައިލެޓުންގެ ފްލައިން ޑިއުޓީ އަކީ 192 ދުވަސް ކަމަށެވެ. ކުރިން މޯލްޑިވްސް ސިވިލް އޭވިއޭޝަން ރެޖިއުލޭޝަނުން ކަނޑައަޅާފައިވާ އުސޫލުގައިވާގޮތުން 5.5 ދުވަހު މަސައްކަތް ކުރުމަށް ފަހު 36 ގަޑިއިރު ރެސްޓް ކުރުމަށް ލިބޭ އިރު މިދިޔަ ޖުލައި މަހުގައި ގެނައި އިސްލާހުގެ ސަބަބުން 7 ދުވަހު މަސައްކަތް ކުރުމަށް ފަހު 48 ގަޑިއިރު ރެސްޓް ކުރަންޖެހޭ ގޮތަށް ޕައިލެޓުންގެ ޑިއުޓީ ޝެޑިއުލަށް ބަދަލު ގެނެސްފައިވާ ކަމަށް އެ އިދާރާއިން ބުނެ އެވެ.
އެހެން ނަމަވެސް އެ އުސޫލަށް މިހާރު ބަދަލު ގެނެސްފައިވާ ކަމަށް އައިލެންޑް އޭވިއޭޝަނުން ބުންޏެވެ. އެގޮތުން ޕައިލެޓުން 6 ދުވަހު މަސައްކަތް ކުރުމަށް ފަހު 48 ގަޑިއިރު ރެސްޓް ކުރެވޭނެ ގޮތަށް ޑިއުޓީ ޝެޑިއުލަށް ބަދަލު ގެނެސްފައިވާ ކަމަށް އައިލެންޑް އޭވިއޭޝަނުން ބުނެ އެވެ.
އައިލެންޑް އޭވިއޭޝަނުން މިގޮތަށް ހާމަކޮށްފައިވާ އިރު ސޯޝަލް މީޑިއާގައި އާއްމުވެފައިވާ އޯޑިއޯ ކްލިޕެއްގައި މޯލްޑިވިއަންގެ ޕައިލެޓަކުވަނީ ޕައިލެޓުން ވަރަށް ބޮޑަށް ވަރުބަލިވާ ކަމަށް ބުނެފައެވެ. އަދި އެވާހަކަ ހުރިހާ ޕައިލެޓުންގެ ތެރޭގައި ދެއްކުމުން ފްލައިޓް އޮޕަރޭޝަންސްގެ އިސް ވެރިޔަކު ވަނީއެކަމާއި ހިތްހަމަނުޖެހުން ފާޅުކޮށްފަ ކަމަށް ވެސް އޯޑިއޯގައި ބުނެ އެވެ. އެހެން ނަމަވެސް މިއީ ރައްކާތެރިކަމުގެ އިޝޫއެއް ކަމުން، އެންމެންގެ ތެރޭގައި އެވާހަކަ ދެއްކީ ކަމަށް ޕައިލެޓް ބުނެއެވެ. އެހެން ނަމަވެސް މި މައުލޫމާތުތައް އައިލެންޑް އޭވިއޭޝަނުން ވަނީ ދޮގުކޮށްފަ އެވެ.
