މިއަހަރު އެންމެ ގިނަ މީހުން ގޫގުލް ކުރި އެއް މަންޒިލަކަށް ދިވެހި ރާއްޖެ!
ރާއްޖެއަކީ 6ވަނަޔަށް އެންމެ ގިނަ މީހުން ސާޗްކުރި މަންޒިލް
ދިވެހި ރާއްޖޭގެ ރަށެއްގެ ގޮނޑުދޮށް
2017ވަނަ އަހަރު ދުނިޔޭގެ އެކި ކަންކޮޅުތަކުން އެންމެ ގިނައިން ގޫގަލްގައި ސާޗްކުރި އެއް މަންޒިލަކީ ދިވެހިރާއްޖެކަމަށް ގޫގަލްއިން ބުނެފިއެވެ.
ގޫގަލްއިން އާއްމުކޮށްފައިވާ މިއަހަރުގެ ސާޗް ޓްރެންޑްތަކުގެ ތެރެއިން، އެންމެ ގިނަ މީހުން ސާޗްކުރި މަންޒިލްތަކުގެ ލިސްޓުގެ 6 ވަނަ ލިބެނީ ދިވެހިރާއްޖެއަށެވެ. އެންމެ ގިނަ މީހުން ގޫގުލް ކޮށްފައިވާ މަންޒިލަކީ އެމެރިކާގެ ލާސް ވެގަސްއެވެ. އަދި ދެވަނަޔަށް ބާސެލޯނާ ދިޔައިރު، ތިން ވަނަޔަށް އެންމެ ގިނަ މީހުން ސާޗްކުރި މަންޒިލަކީ އެމެރިކާގެ ދެކުނު ކެރޮލައިނާގެ މާރޓައިލް ބީޗެވެ. އަދި އެސްޕަންއާއި ޕުންޓަ ކާނާ ދިވެހިރާއްޖެއަށް ވުރެ ކުރި ހޯދާފައިވާއިރު، ރާއްޖެއަށް ވުރެ ފަހަތުން، އެހެން ނަމަވެސް ގަދަ 10ގައި ހިމެނިފައިވަނީ ޓަރކްސް އެންޑް ކެއިކޯސް، އިންޑޮނީޝިއާގެ ބާލީ، މެކްސިކޯގެ ކަންކުން އަދި ބަރމިއުޑާއެވެ.
އެންމެ ގިނަ މީހުން ސާޗް ކުރި މަންޒިލްތަކުގެ ތެރެއިން ލާސްވެގަސް، ބާސެލޯނާ އަދި ދިވެހިރާއްޖެއަކީ ހަމައެކަނި ފަތުރުވެރިކަމުގެ މަންޒިލްތަކުގެ ގޮތުގައި މީހުން ސާޗްކޮށްފައިވާ ތަންތަނެއް ނޫނެވެ. ލާސްވެގަސްގައި ދިން ބޮމުގެ ހަމަލާއާއި، ކެޓަލޯނިއާގެ މިނިވަން ދައުލަތެއް އިއުލާންކުރިއިރު، އެސަރަހއްދުގެ ވެރިރަށެއްގެ ގޮތުގައި ބާސެލޯނާ އޮތުމާއި އަދި ދިވެހިރާއްޖޭގެ ސިޔާސީ މަސްރަހުގެ ސަބަބުން މިތަންތަން ގޫގުލްގައި މީހުން ސާޗްކުރި މިންވަރު އިތުރުވެފައިވެއެވެ.
ގޫގުލްއިން އާއްމުކޮށްފައިވާ މައުލޫމާތަށް ބަލާއިރު، 2017ވަނަ އަހަރު އެންމެ ގިނަ މީހުން ސާޗްކޮށްފައިވަނީ ތޫފާން އިރްމާގެ އިތުރުން އައިފޯން 8 އަދި އައިފޯން ދިހަޔަކަށެވެ. އެންމެ ގިނަ މީހުން ސާޗްކޮށްފައިވާ މީހުންނަކީ ޖިންސީ ފުރައްސާރައިގެ ތުހުމަތު ކުރެވުނު މަޝްހޫރު ޕްރެޒެންޓަރު މެޓް ލައުއަރގެ އިތުރުން އިނގިރޭސި ރާނީގެ މާމާ ދަރިކަލުން ޕްރިންސް ހެރީގެ ލޯބިވެރިޔާ އަދި މަޝްހޫރު ފިލްމީތަރި މޭގަން މާކެލްއެވެ. އެންމެ ގިނަ މީހުން ސާޗްކުރި އިންތިޚާބު ތަކަކީ ފަރަންސޭސީ އިންތިޚާބާއި، ޖަރުމަންވިލާތުގެ ފެޑެރަލް އިންތިޚާބުގެ އިތުރުން އިނގިރޭސި އިންތިޚާބަށެވެ. ކުޅިވަރުގެ ތެރެއިން އެންމެ ގިނަ ބަޔަކު ސާޗްކޮށްފައިވަނީ ވިމްބަލްޑަންއަށެވެ. ލަވަތަކުގެ ތެރެއިން އެންމެ ގިނަ ބަޔަކު ގޫގުލްކޮށްފައިވަނީ ލުއިސް ފޮންސީގެ ޑެސްޕަސީތޯގެ އިތުރުން އެޑް ޝީރަންގެ ޝޭޕް އޮފް ޔޫއެވެ.
