ގައުމު ތަމްސީލު ނުކުރާ ގޮތަށް ރަޝިއާގެ އެތްލީޓުންނަށް ވާދަކުރެވޭނެ: ރަޝިއާގެ އޮލިމްޕިކް ކޮމިޓީ

އަންނަ އަހަރު އޮންނަ ފިނި މޫސުމުގެ އޮލިމްޕިކް ގޭމްސްގައި ގައުމު ތަމްސީލު ނުކުރާ ގޮތަށް ރަޝިއާގެ އެތްލީޓުންނަށް ވާދަކުރެވޭނެ ކަމަށް އެ ގައުމުގެ އޮލިމްޕިކް ކޮމިޓީގެ އޮނަރަރީ ޕްރެޒިޑެންޓް ވިޓާލީ ސްމިރްނޯވް ވިދާޅުވެއްޖެއެވެ.

ރަޝިއާ ވަނީ ފިނި މޫސުމުގެ އޮލިމްޕިކްސްގައި ވާދަނުކުރެވޭ ގޮތަށް ސަސްޕެންޑް ކޮށްފައެވެ.17 މަސް ދުވަހުގެ ދިގު ތަހުގީގަކަށް ފަހު ރަޝިޔާ އޮލިމްޕިކްސްއިން ސަސްޕެންޑް ކުރީ 2014ވަނަ އަހަރު އެ ގައުމުގެ ސޯޗީގައި ބޭއްވި އޮލިމްޕިކްސްގައި އެޤައުމުގެ ސަރުކާރުގެ އެހީގައި އެތްލީޓުން މަނާ ބޭސް ބޭނުންކުރިކަން ސާބިތުވުމާ ގުޅިގެންނެވެ. މަނާ ބޭސް ބޭނުންކުރި މައްސަލައިގައި ރަޝިޔާގެ 25 އެތުލީޓަކާ ދެކޮޅަށް ފިޔަވަޅު އަޅައި، މެޑަލް އަތުލާފައިވެއެވެ.

ރަޝިއާގެ ސިޔާސީ މައިދާނުގައި ހަރަކާތްތެރިވާ މީހުން އޮލިމްޕިކްސް ބޮއިކޮޓް ކުރުމަށް ގޮވާލަމުން ދަނިކޮށް އެ ގައުމުގެ އޮލިމްޕިކް ކޮމިޓީގެ އޮނަރަރީ ޕްރެޒިޑެންޓް ވިޓާލީ ވިދާޅުވެފައިވަނީ ގައުމު ތަމްސީލު ނުކުރާ ގޮތަށް އެ ގައުމަށް ނިސްބަތްވާ އެތްލީޓުންނަށް މުބާރާތުގައި ވާދަކުރެވޭނެ ކަމަށާއި އެގޮތަށް ނިންމީ އެތްލީޓުންގެ މަންފާއަށް ކަމަށެވެ. އެގޮތުން މިއީ އެތްލީޓުންގެ ނަން ރީތި ކޮށްލުމަށް ދެވޭ ފުރުސަތެއް ކަމަށް ވިޓާލީ ވިދާޅުވިއެވެ.

އޭނާ ވިދާޅުވީ މިކަމުގެ ސަބަބުން ވާދަކުރާނެ އެތްލީޓުންގެ އަދަދެއް ނޭނގޭ ކަމަށާއި އެހެން ނަމަވެސް ވާދަކުރުމުގެ ޝަރުތުތައް ހަމަވާ 200 އަށް ވުރެ ގިނަ އެތްލީޓުން ހަމަވާ ކަމަށެވެ. އެހެން ނަމަވެސް ފިނި މޫސުމުގެ އޮލިމްޕިކްސްގައި ވާދަކުރާނެ އެތްލީޓުން ކަނޑައަޅާނީ ބައިނަލްލަގްވާމީ އޮލިމްޕިކް ކޮމިޓީއިން ކަމަށާއި އެ ގައުމަށް އެކަމުގެ އެއްވެސް ބާރެއް ނެތްކަމަށް ވިޓާލީ ވިދާޅުވިއެވެ.

މީގެކުރިން މިކަމާއި ގުޅޭގޮތުން ރަޝިއާގެ ރައީސް ވްލަޑްމިއާ ޕޫޓިން ވިދާޅުވީ މިއީ ސިޔާސީ މަންފާއެއް ހޯދަން ބަޔަކު ރާވައިގެން ގަސްތުގައި ކޮށްފައިވާ ކަމެއް ކަމަށެވެ. މި ނިންމުމާއި ގުޅޭގޮތުން އިތުރަށް ވާހަކަ ދައްކަވަމުން ޕޫޓިން ވިދާޅުވީ އެ ގައުމުގެ އެތްލީޓުންނަށް އޮލިމްޕިކްސްގައި ވާދަކުރުން މަނާ ނުކުރާނެ ކަމަށާއި އެ އެތްލީޓެއްގެ އަމިއްލަ ގާބިލްކަން ތަންދޭނަމަ އޮލިމްޕިކްސްގައި ވާދަކުރުމުގެ ދޮރު ހުޅުވިފައިވާ ކަމަށެވެ. މިގޮތަށް ވިޓާލީ ވިދާޅުވެފައިވާއިރު މިއީ ޕޫޓިންގެ އަމުރަށް ކުރެއްވި ކަމަށް ބެލެވެއެވެ.

މި މައްސަލައިގައި ކްރެމްލިންގެ ސްޕޯކްސްޕާސަން ޑިމިޓްރީ ޕެސްކޯވް ވިދާޅުވީ މިކަން ވަރަށް ސީރިޔަސް މައްސަލައެއްގެ ގޮތުގައި ތަހުގީގު ކުރެވެމުންދާ ކަމަށެވެ. އަދި ރަޝިއާގެ އެއްވެސް އެތްލީޓަކު މިކަމާއި ގުޅޭގޮތުން އެއްވެސް ވަރަކަށް މާޔޫސް ނުވުމަށްވެސް އޭނާ ގޮވާލެއްވިއެވެ.

މި މައްސަލައިގައި ޝާމިލްވާ ރަޝިއާގެ ކުރީގެ ކުޅިވަރާއި ބެހޭ ވަޒީރު ވިޓާލީ މުޓްކޯއާއި ދެކޮޅަށް މި މައްސަލަ ފޮރުވަން އުޅުނު ކަމުގެ ތުހުމަތުގައި، އެ ގައުމުގެ ގާނޫން ހަދާ މަޖިލީހުގެ މެމްބަރެއް ކަމަށްވާ ވެލެރީ ރަޝްކިން ވަނީ ކޯޓަށް މައްސަލައެއް ހުށަހަޅުއްވާފައެވެ. މުޓްކޯއާއި ދެކޮޅަށް ބައިނަލްލަގްވާމީ އޮލިމްޕިކް ކޮމިޓީއިން ވަނީ ފިޔަވަޅު އަޅާފައެވެ. އެގޮތުން ކުރިއަށް އޮތް އެއްވެސް އޮލިމްޕިކް މުބާރާތެއްގައި އޭނާގެ ބައިވެރިވުމެއް އޮތުން ވަނީ މަނާކޮށްފައެވެ.

އަންނަ އަހަރު ބާއްވާ އޮލިމްޕިކްސް ވެގެންދާނީ 1984 ވަނަ އަހަރުގެ ފަހުން އޮލިމްޕިކްސްގެ މުބާރާތެއްގައި ރަޝިއާގެ އެތްލީޓުން ފެނިގެން ނުދާނެ ފުރަތަމަ މުބާރާތަށެވެ.