400އަށް ވުރެ ގިނަ މަސްވެރިން އަދިވެސް ނުފެނޭ
12 ޑިސެމްބަރު 2017 | އަންގާރަ 05:33އިންޑިއާ އާއި ލަންކާގެ މަސްވެރިން ހޯދުމަށް އެދެޤައުމުން ގެންދަނީ މަސައްކަތްކުރަމުން
ތޫފާން އޮކިގައި ހާލުގައި ޖެހުނު ލަންކާ ބޯޓަކަށް ރާއްޖޭގެ ކޯސްޓްގާޑުން އެހީތެރިކަން ފޯރުކޮށްދެނީ
ޑިސެމްބަރު މަހުގެ ކުރީކޮޅު އިންޑިއާ ކަނޑުގެ ސަރަހައްދަށް އެރި ތޫފާން 'އޮކި'ގައި ގެއްލުނު 433 މަސްވެރިޔަކު އަދިވެސް ނުފެންނަކަމަށް އިންޑިއާގެ ކަންޏަކުމާރީގެ އޮފިޝަލުން ބުނެފިއެވެ. ތޫފާން އެރި ވަގުތު މަހަށް ނިކުމެ އުޅެނިކޮށް ގެއްލިފައިވާ މަސްވެރިން ހޯދުމުގެ މަސައްކަތް ލަންކާއާއި އިންޑިއާގެ ކަމާއި ބެހޭ ފަރާތްތަކުން ދަނީ ހުއްޓުމެއް ނެތި ކުރަމުންނެވެ.
އިންޑިއާގެ ކަންޏަކުމާރީގެ އޮފިޝަލުން ބުނާ ގޮތުގައި ގެއްލިފައިވާ މަސްވެރިންގެ ތެރޭގައި ކައިރި ހިސާބުތަކަށް މަހަށް ނިކުތް މަސްވެރިންނާއި، ދުރު ހިސާބުތަކަށް މަހަށް ނިކުމެ އުޅޭ މަސްވެރިން ހިމެނެއެވެ. އަދި މީގެ ތެރެއިން ސަތޭކައެއްހާ މަސްވެރިން މިހާރު މަރުވެފައިވާ ކަމަށް ބެލެވޭކަމަށް އޮފިޝަލުން ބުނެއެވެ.
އިންޑިއާގެ އޮފިޝަލުން ހޯދުމުގެ މަސައްކަތް ކުރަމުންދާ މަސްވެރިންގެ ތެރޭގައި ޙާލުގައި ނުޖެހުނުނަމަވެސް، މަސްވެރިކަމަށްފަހު އަނބުރާ ނާންނަ މަސްވެރިން ހިމެނޭތީ، ދިގު މުއްދަތަކަށް މަހަށް ނިކުމެ އުޅޭ މަސްވެރިން ކަމާއި ބެހޭ ފަރާތްތަކަށާއި، އާއިލާތަކަށް ގުޅުމަށް އޮފިޝަލުން ގެންދަނީ މެސެޖް ފޮނުވަމުންނެވެ.
ގެއްލިފައިވާ މަސްވެރިންގެ ތެރެއިން މަރުވެގެން މިހާތަނަށް 2 މަސްވެރިޔަކު ވަނީ ލައްގާފައެވެ.
ތޫފާން އޮކިއަށް ފަހު ގެއްލިފައިވާ މަސްވެރިން ހޯދުމަށް ލަންކާއާއި އިންޑިއާގެ ކޯސްޓްގާޑާއި، ކަނޑުގެ ސިފައިންގެ އިތުރުން ވައިގެ ސިފައިން މަސައްކަތްކުރަމުން އަންނައިރު، ރާއްޖޭގެ ކޯސްޓްގާޑުން ވެސް ދަނީ އެމަސައްކަތުގައި އެހީތެރިވަމުންނެވެ. އެގޮތުން އަންގާރަ ދުވަހުވެސް ލަންކާގެ މަސްބޯޓެއް ރާއްޖޭގެ ސަރަހައްދުން ފެނިގެން އެހީތެރިކަން ފޯރުކޮށްދީފައިވެއެވެ. މަސްވެރިން ހޯދުމަށް ރާއްޖޭގެ ކަނޑުގެ ސަރަހައްދު ބެލުމަށް އިންޑިއާގެ ކަނޑުގެ ސިފައިންގެ މަތިންދާބޯޓުތައް ރާއްޖެ މަތިން ދަތުރުކޮށްފައިވެއެވެ.
