އިނގިރޭސި ޕްރިމިއާ ލީގުގައި އާސެނަލް އަދި ލިވަޕޫލް ކުޅުނު މެޗުތަކުން އެ ޓީމުތައް ޕޮއިންޓަކާއެކު ފުއްދާލަން ޖެހިއްޖެއެވެ.
ޕްރިމިއާ ލީގުގައި 'މާސީސައިޑް ޑާބީ'ގެ ގޮތުގައި މަޝްހޫރު ވެފައިވާ މެޗުގައި އެވަޓަންއާ ދެކޮޅަށް އަމިއްލަ ދަނޑުގައި ކުޅެ ލިވަޕޫލް އެއްވަރުވީ 1-1 ގެ ނަތީޖާއަކުންނެވެ. މި މެޗުގައި ލިވަޕޫލްގެ ފަރާތުން މޮޅު އެޓޭކިން ފުޓްބޯޅައެއް ފެނިގެންދިޔައިރު އެ ޓީމަށް ވަނީ ލަނޑު ޖެހުމަށް ހުސް ގިނަ ފުރުސަތުތަކެއް ލިބިގެން ގޮސްފައެވެ. އެވަޓަންއިން ވެސް ވަނީ ކައުންޓާގައި ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ.
މި މެޗުގެ ފުރަތަމަ ލަނޑު ޖަހާ ލީޑު ނެގީ ލިވަޕޫލްއިންނެވެ. އެގޮތުން މެޗުގެ 42 ވަނަ މިނެޓުގައި ޒުވާން ޑިފެންޑަރު ޖޯސެފް ގޯމޭޒް ތަނަވަސްކޮށްދިން ފުރުސަތަކުން އެ ޓީމަށް މި ލަނޑު ޖަހައިދިނީ މިސްރުގެ ވިންގަރ މުހައްމަދު ސަލާހުއެވެ. އޭނާ މި ލަނޑު ޖެހީ އެވަޓަންގެ ދެ ޑިފެންޑަރުން ކައިރިން ނައްޓާލުމަށް ފަހު އޭރިއާ ބޭރުން ފޮނުވާލި ބާރު ހަމަލާއަކުންނެވެ.
އެއް ލަނޑުގެ ލީޑެއްގައި އޮވެ ލިވަޕޫލްއިން ފުރަތަމަ ހާފު ނިންމާލިއިރު އެ ޓީމަށް ވަނީ ދެވަނަ ހާފުގައި ވެސް ލަނޑު ޖެހުމަށް ރަނގަޅު ފުރުސަތުތަކެއް ލިބިގެން ގޮސްފައެވެ. އެހެން ނަމަވެސް ލިވަޕޫލްއަށް މި ފުރުސަތުތަކުގެ ބޭނުން ނުހިފުމުގެ ނަތީޖާއަކަށް ވެގެން ދިޔައީ އެވަޓަންއިން މެޗުގެ ނަތީޖާ ހަމަހަމަކުރުމެވެ. އެގޮތުން މެޗުގެ 77 ވަނަ މިނެޓުގައި ލިބުނު ޕެނަލްޓީއަކުން ވޭން ރޫނީ ވަނީ ލަނޑެއް ޖަހައިދީ އެވަޓަންއަށް މެޗުގެ ނަތީޖާ ހަމަހަމަކޮށްދީފައެވެ.
ޕްރިމިއާ ލީގުގައި އާސެނަލް އާއި ސައުތްހެމްޕްޓަން ކުޅުނު މެޗު ވެސް ނިމިފައިވަނީ 1-1 ގެ ނަތީޖާއަކުން އެއްވަރު ވެގެންނެވެ. ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެން ދިޔަ މި މެޗުގައި ދެ ޓީމަށް ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ލިބިގެން ގޮސްފައެވެ.
10 - No team has gained more points from losing positions in the Premier League this season than Arsenal (10 - level with Man City). Character. pic.twitter.com/EPbgrIoSvO
— OptaJoe (@OptaJoe) December 10, 2017
މި މެޗުގެ ފުރަތަމަ ލަނޑު ޖަހާ ލީޑު ނެގީ ސައުތްހެމްޕްޓަން އިންނެވެ. މެޗު ފެށިގެން ތިން މިނެޓު ނުވަނީސް ޑޫސާން ޓަޑިޗް ތަނަވަސްކޮށްދިން ފުރުސަތަކުން އެ ޓީމަށް މި ލަނޑު ޖަހައިދިނީ ޗާލީ އޮސްޓިންއެވެ. މި ލަނޑަށްފަހު އާސެނަލްއިން އެ ޓީމުގެ ކުޅުން ރަނގަޅުކުރިއިރު ފުރަތަމަ ހާފުގައި އެ ޓީމަށް ނަތީޖާ ހަމަހަމަ ކުރެވިފައެއް ނުވެއެވެ.
އެއް ލަނޑުގެ ލީޑެއްގައި އޮވެ ސައުތްހެމްޕްޓަންއިން ފުރަތަމަ ހާފު ނިންމާލިއިރު އެ ޓީމުގެ ފަރާތުން ދެވަނަ ހާފުގައި ފެނިގެން ގޮސްފައިވަނީ ޑިފެންސިވް ކުޅުމެކެވެ. ސައުތްހެމްޕްޓަންގެ ޑިފެންސްއަށް ބާރުބޮޑުކޮށް ތަކުރާރުކޮށް އާސެނަލްއިން އުފައްދަމުން ދިޔަ ހަމަލާތަކުގެ ނަތީޖާއެއްގެ ގޮތުން އެ ޓީމުން ވަނީ މެޗު ނިމެން ދެ މިނެޓަށް ވެފައިވަނިކޮށް ނަތީޖާ ހަމަހަމަކޮށްފައެވެ. އެލެކްސިސް ސަންޗޭޒް ތަނަވަސްކޮށްދިން ފުރުސަތަކުން މި ލަނޑު އާސެނަލްއަށް ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެން ނުކުތް އޮލިވިއާ ޖިރޫއެވެ.
މި މެޗުތަކާއިއެކު ޕްރިމިއާ ލީގުގެ ތާވަލަށް މާ ބޮޑެތި ބަދަލުތަކެއް އައިސްފައެއް ނުވެއެވެ. އެގޮތުން 46 ޕޮއިންޓާއެކު މެންޗެސްޓާ ސިޓީ އެއްވަނައިގައި އޮތްއިރު ދެވަނައިގައި 35 ޕޮއިންޓާއެކު އޮތީ މެންޗެސްޓާ ޔުނައިޓެޑްއެވެ. ޗެލްސީއަށް ތިންވަނަ ލިބެނީ 32 ޕޮއިންޓާއެކު އެވެ. ހަތަރު ވަނައިގައި 30 ޕޮއިންޓާއެކު ލިވަޕޫލް އޮތްއިރު ފަސްވަނައިގައި 29 ޕޮއިންޓާއެކު އޮތީ އާސެނަލްއެވެ.
