ސޮނާކްޝީ ސިންހާއާ އެކު ކަރަން ޖޯހަރު އާ ފިލްމެއް ފަށަނީ

އެކްޓްރެސް ސޮނާކްޝީ ސިންހާއާއި އެކު އާ ފިލްމެއް ފެށުމަށް ނިންމާފައިވާ ކަމަށް ބޮލީވުޑުގެ ކާމިޔާބް ޑައިރެކްޓަރު ކަރަން ޖޯހަރު ބުނެފިއެވެ.

ކަރަން ބުނީ ސޮނާކްޝީއާއި އެކު ފެށުމަށް ހަމަޖެހިފައިވާ ފިލްމް ކުރިއަށް އޮތް ދެ ހަފުތާ ތެރޭގައި އިއުލާން ކުރާނެ ކަމަށެވެ. އެންމެ ފަހުން ކަރަން ޖޯހަރު އަދި ސޮނާކްޝީ އެކުގައި މަސައްކަތް ކޮށްފައި ވަނީ ފިލްމް "އިއްތިފާގް" ގައެވެ. އެ ފިލްމް ވަނީ ބޮކްސް އޮފީހުގައި ރަނގަޅު ކާމިޔާބީއެއް ހޯދާފައެވެ.

ކަރަން ބުނީ ސޮނާކްޝީއާއިއެކު މަސައްކަތް ކުރުމުގެ ފުރުސަތު ލިބުނީތީ އުފާ ކުރާ ކަމަށެވެ. އަދި ސޮނާކްޝީއާއިއެކު މަސައްކަތް ކުރުމުގެ ފުރުސަތު ލިބުމަކީ އިއްތިފާގެއް ނޫން ކަމަށް ކަރަން ޖޯހަރު ބުންޏެވެ.

ކަރަން ބުނީ އެންމެ ފަހުން އޭނާ ސޮނާކްޝީއާއިއެކު އުފެއްދި ފިލްމް "އިއްތިފާގް" އަށް ވެސް ވަަރަށް ބޮޑު ކާމިޔާބީއެއް ލިބިފައިވާ ކަމަށެވެ.

ކަރަން ބުނީ އޭނާ ސޮނާކްޝީއާއިއެކު އުފެއްދުމަށް ނިންމާފައިވާ ފިލްމުގެ ނަމާއި ފިލްމުގެ މައުލޫމާތު ކުރިއަށް އޮތް ދެ ހަފުތާ ތެރޭގައި އިއުލާން ކުރާނެ ކަމަށެވެ.

މިހާރު ވެސް ކަރަން އަންނަނީ ގިނަ ފިލްމުތަކެއް ޕްރޮޑިއުސް ކުރަމުންނެވެ. އޭގެ ތެރޭގައި ޑައިރެކްޓަރު އަޔާން މުކަރުޖީގެ "ބްރަހްމަސްޓްރާ" ހިމެނެ އެވެ. މި ފިލްމުގެ ތަރިންނަކީ ރަންބީރު ކަޕޫރާއި އަމީތާބް ބައްޗަން އަދި އާލިއާ ބަޓް އެވެ. މި ފިލްމު ފަށަން ހަމަޖެހިފައި ވަނީ އަންނަ އަހަރުގެ ފެބްރުއަރީ ނުވަތަ މާޗު ހިސާބުގައެވެ. އަދި އަންނަ އަހަރު އެ ފިލްމު ރިލީޒްކުރަން ވެސް ކަރަން އުންމީދު ކުރެ އެވެ.

ކަރަން ދެން އިއުލާން ކޮށްފައިވަނީ ޝްރީދޭވީގެ ދަރިފުޅު ޖާންވީ ކަޕޫރާއި އިޝާން ޚައްތަރުގެ "ދަޅަކް" އެވެ. މި ފިލްމު ވެސް އަންނަ އަަހަރުގެ ތެރޭގައި ރިލީޒްކުރާނެ އެވެ.