ޔޫރަޕުގެ ލީގުތަކުގައި ކުޅޭ ކުޅުންތެރިންގެ ތެރެއިން އެންމެ ގިނަ ލަނޑު ޖަހާ ކުޅުންތެރިޔާއަށް ދޭ ރަންބޫޓު ހަތަރުވަނަ ފަހަރަށް ބާސެލޯނާގެ ފޯވާޑް ލިއޮނެލް މެސީ ހޯދައިފިއެވެ.

މެސީގެ ކެރިއަރުގައި ހަތަރުވަނަ ފަހަރަށް އޭނާ ރަންބޫޓު ހޯދީ މިދިޔަ ސީޒަނުގައި ޔޫރަޕުގައި ކުޅުނު ކުޅުންތެރިންގެ ތެރެއިން އެންމެ ގިނަ ލަނޑު ޖަހައިގެންނެވެ. މި އެވޯޑު ދިނުމުގައި ބަލަނީ ހަމައެކަނި ކުޅުންތެރިން ކުޅޭ ގައުމެއްގެ ލީގުގައި ޖަހާ ލަނޑުތަކައް ކަމަށްވާއިރު މެސީ ވަނީ މިދިޔަ ސީޒަނުގެ ސްޕެނިޝް ލަލީގާގައި އޭނާ ކުޅުނު 34 މެޗުގައި 37 ލަނޑު ޖަހާފައެވެ.

މެސީއާއި މި އެވޯޑު ހަވާލުކޮށްދިނީ ހުކުރު ދުވަހު ބާސެލޯނާގައި ބޭއްވި ހަފްލާއެއްގައި މިދިޔަ އަހަރު މި އެވޯޑު ހޯދި އެ ޓީމުގެ ފޯވާޑް ލުއިސް ސުއާރޭޒްއެވެ. މި އެވޯޑާއި ހަވާލުވުމަށްފަހު މެސީ ބުނެފައިވަނީ ކޮންމެ އަހަރުކުވެސް އޭނާ އަމާޒުކުރަނީ ފުޓްބޯޅައިގައި އިތުރު ހަރުފަތްތަކެއް ގިރާކުރަން ކަމަށާއި އެގޮތުން މި ރަންބޫޓަކީ ވެސް އެކަން ހާސިލްވަމުންދާ ކަމުގެ އުއްމީދެއް ކަމަށެވެ.

މެސީގެ ފަހަތުން ދެވަނައަށް އެންމެ ގިނަ ލަނޑު ޖެހީ ޕޯޗުގަލްގެ ސްޕޯޓިން ލިސްބަންއަށް ކުޅެމުން އަންނަ ނެދާލޭންޑްސްގެ ފޯވާޑް ބާސް ދޯސްތްއެވެ. އޭނާ ވަނީ މިދިޔަ ސީޒަނުގެ ޕޯޗުގަލްގެ ލީގުގައި 34 ލަނޑު ޖަހާފައެވެ. ޔޫރަޕުގެ ލީގުގައި ކުޅޭ ކުޅުންތެރިންގެ ތެރެއިން 31 ލަނޑާއެކު ތިންވަނައަށް އެންމެ ގިނަ ލަނޑު ޖެހީ ބޮރޫޝިއާ ޑޯޓްމަންޑަށް ކުޅެމުން އަންނަ ގެބޯންގެ ފޯވާޑް ޕިއާ އެމެރިކް އޮބަމަޔްންގްއެވެ.

މެސީ ވަނީ މީގެކުރިން ތިން ފަހަރެއްގެ މަތިން ރަން ބޫޓު ހޯދާފައެވެ. އެގޮތުން 2010 ވަނަ އަހަރާއި 2012 އަދި 2013 ވަނަ އަހަރު އޭނާ މި އެވޯޑު ހޯދާފައެވެ. މި ފަހަރުގެ ރަންބޫޓާއިއެކު މެސީ ވަނީ ރޮނާލްޑޯއާއި އެއް އަދަދަކަށް މި އެވޯޑު ހޯދާފައެވެ. އެގޮތުން ހަތަރު ރަންބޫޓާއިއެކު މި ދެ ކުޅުންތެރިންނަކީ ތާރީހުގައި ވެސް މި އެވޯޑު އެންމެ ގިނައިން ހޯދާފައިވާ ދެ ކުޅުންތެރިންނެވެ.

 މިދިޔަ އަހަރު 40 ލަނޑު ހަމަކޮށް މި އެވޯޑު ހޯދީ ބާސާގެ ފޯވާޑް ލުއިސް ސުއަރޭޒް ކަމަށްވާއިރު މިދިޔަ ފަހަރު މެސީއަށް ލިބިފައިވަނީ ފަސް ވަނައެވެ.