ޔުއެފާ ޗެމްޕިއަންސް ލީގުގެ ގަދަ 16 އިން ތުރުކީގެ ބެސިކްޓަސް ޖާގަ ހޯދިއިރު ޖަރުމަނުގެ އާރްބީ ލީޕްޒީގް ބޮޑު ތަފާތަކުން މޮޅުވެއްޖެއެވެ.

ޗެމްޕިއަންސް ލީގުގެ ގްރޫޕް 'ޖީ'ގައި ޕޯޗުގަލްގެ އެފްސީ ޕޯޓޯއާއި ދެކޮޅަށް އަމިއްލަ ދަނޑުގައި ކުޅުނު މެޗު އެއްވަރުކޮށް ބެސިކްޓަސްއިން ވަނީ މިއަހަރުގެ މުބާރާތުގެ ގަދަ 16 އިން ޖާގަ ހޯދާފައެވެ. ގަދަ 16 އިގެ ޖާގައެއް ހޯދުމަށް ބެސިކްޓަސް ބޭނުންވީ އެންމެ ޕޮއިންޓަކަށްވާއިރު އަންގާރަ ދުވަހުގެ ރޭ ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

ދެ ޓީމުގެ ފަރާތުން ވެސް ވާދަވެރި ބަލާހިތްވާ ޒާތުގެ ކުޅުމެއް ފެނިގެންދިޔަ މި މެޗުގެ  ފުރަތަމަ ލަނޑު ޖަހާ ލީޑު ނެގީ ޕޯޓޯއިންނެވެ. ރިކާޑޯ ޕެރެއިރާ މެޗުގެ 29 ވަނަ މިނެޓުގައި ތަނަވަސްކޮށްދިން ފުރުސަތަކުން މި ލަނޑު ޕޯޓޯއަށް ޖަހައިދިނީ ފެލީޕޭއެވެ. އެހެނަސް ބެސިކްޓަސްއިން ވަނީ ފުރަތަމަ ހާފު ނިމުމުގެ ކުރިން މެޗުގެ ނަތީޖާ ހަމަހަމަ ކޮށްފައެވެ. އެގޮތުން މެޗުގެ 41 ވަނަ މިނެޓުގައި މި ލަނޑު އެ ޓީމަށް ޖަހައިދިނީ އެންޑަސަން ޓަލިސްކާއެވެ.

މި ގްރޫޕުގެ ދެވަނަ މެޗުގައި އާރްބީ ލީޕްޒީގް ވަނީ މިދިޔަ ސީޒަނުގެ ފްރާންސްގެ ޗެމްޕިއަން މޯނާކޯ 4-1 ގެ ތަފާތު ބޮޑު ނަތީޖާއަކުން ބަލިކޮށްފައެވެ. މި ސީޒަނުގައި އެ ކްލަބުގެ ތާރީހުގައި ވެސް އަލަށް ޗެމްޕިއަންސް ލީގުގައި ވާދަކުރަމުން އަންނަ ލީޕްޒީގްއިން ވަނީ މި މެޗުގައި މޮޅު އެޓޭކިން ފުޓްބޯޅައެއް ކުޅެ މޮނާކޯގެ ގިނަ ހަމަލާތައް ހުއްޓުވާފައެވެ. މި މެޗުގައި ފެނިގެންދިޔަ ހުރިހާ ލަނޑެއް ވެސް ފެނިގެން ގޮސްފައިވަނީ ފުރަތަމަ ހާފުގެ ތެރޭގައެވެ.

ލީޕްޒީގްގެ ފުރަތަމަ ލަނޑަކީ މެޗުގެ 6 ވަނަ މިނެޓުގައި މޮނާކޯގެ ޖެމާސަން އަތުން ބައިކޮޅަށް ވަން ލަނޑެކެވެ. ލީޕްޒީގްގެ ދެވަނަ ލަނޑު މެޗުގެ 9 ވަނަ މިނެޓުގައި ޓީމޯ ވާނާ ޖަހައިދިންއިރު މެޗުގެ 31 ވަނަ މިނެޓުގައި ލިބުނު ޕެނަލްޓީއެއް ކާމިޔާބުކޮށް ވާނާ ވަނީ އެ ޓީމުގެ ލީޑު އިތުރަށް ފުޅާ ކޮށްދީފައެވެ.

ފުރަތަމަ ހާފު ނިމެން ދެމިނެޓަށް ވެފައިވަނިކޮށް ރަޑަމެއަލް ފަލްކާއޯ ވަނީ ލަނޑެއް ޖަހައިދީ މޮނާކޯއަށް ނަތީޖާގެ ފަރަގު ކުޑަކޮށްދީފައެވެ. ފަލްކާއޯ މި ލަނޑު ޖެހިތާ މިނެޓެއް ނުވަނީސް ނަބީ ކެއިޓާވަނީ ލަނޑެއް ޖަހައި އަލުން އަނބުރާ ތިން ލަނޑުގެ ލީޑެއް ލީޕްޒީގްއަށް ހޯދައިދީފައެވެ.

މޮނާކޯއިން ދެވަނަ ހާފުގައި ކުޅުން ރަނގަޅު ކުރި ކަމުގައި ވިޔަސް އެ ޓީމަށް ލިބުނު ފުރުސަތުތަކުގެ ބޭނުން ހިފިފައެއް ނުވެއެވެ.

ބެސިކްޓަސްވަނީ މި ގްރޫޕުގެ އެއްވަނަ ޓީމުގެ ގޮތުގައި ގަދަ 16އިން ޖާގަ ހޯދާފައެވެ. އެގޮތުން ކުޅުނު ފަސް މެޗުން ލިބުނު 11 ޕޮއިންޓާއެކު އެ ޓީމު އެއްވަނައިގައި އޮތްއިރު ދެވަނައިގައި ހަތް ޕޮއިންޓާއެކު ލަނޑުގެ ތަފާތުން އޮތީ ޕޯޓޯއެވެ. ތިންވަނައިގައި ޕޯޓޯއާއި އެއް އަދަދަކަށް ޕޮއިންޓް ހޯދައިގެން އެހެނަސް ލަނޑުގެ ތަފާތުން އޮތީ ލީޕްޒީގްއެވެ. މި ގްރޫޕުގެ ފުލުގައި ދެ ޕޮއިންޓާއެކު އޮތީ މޮނާކޯއެވެ.