މެދުއިރުމައްޗާއި ގަލްފް ސަރަހައްދުގައި ހަމަނުޖެހުން އުފެއްދުމަށް އީރާނުން މަސައްކަތްކުރަމުންދާކަމަށް ބުނެ ސަޢޫދީ ޢަރަބިއްޔާއާއި ބަޙްރައިންއިން ފާޑުކިޔައިފިއެވެ.

ސަޢޫދީގެ އިސްނެގުމަކަށް މިސްރުގެ ވެރިރަށް ޤާހިރާގައި އާދިއްތަ ދުވަހު ބޭއްވި އަރަބި ލީގުގެ ކުއްލި ބައްދަލުވުމެއްގައި ވާހަކަ ދައްކަވަމުން ސަޢޫދީ ޚާރިޖީ ވަޒީރު ޢާދިލް އަލްޖުބައިރު ވިދާޅުވީ އީރާނުން މަސައްކަތްކުރަނީ ގަލްފް ސަރަހައްދު ބައިބައިކޮށް، އެސަރަހައްދުގައި މަޒްހަބީ ހަމަނުޖެހުން އުފެއްދުމަށްކަމަށެވެ.

ޢަރަބި ލީގުގެ ކުއްލި ބައްދަލުވުމެއް ބާއްވާފައިމިވަނީ އެ ސަރަހައްދުގެ މަސްރަހު ވަރަށް ހޫނުވެފައިވާ ދުވަސްވަރެއްގައެވެ. ޤަތަރުގެ މައްސަލައަށް ހައްލެއް ނުލިބި ދިގުލައިގެން ދާއިރު، އީރާނުން މަދަދުވެރިވާ ލުބްނާނުގެ ހިޒްބުﷲ ޖަމާޢަތުގެ ސަބަބުން ކަމަށް ވިދާޅުވެ ލުބްނާނުގެ ބޮޑުވަޒީރު ސާދު ޙަރީރީ އިސްތިއުފާ ދެއްވި މައްސަލަވެސް މިހާރު ވަނީ ބޮޑުވެފައެވެ. ގަލްފްގައި ހިނގަމުންދާ މިފަދަ ހުރިހާ މައްސަލައެއްގެ އެއްކޮޅުގައި ސަޢޫދީ ޢަރަބިއްޔާ އޮތް އިރު، ހުރިހާ މައްސަލައެއްގައި އަރަބިން ކުށްވެރިކުރަނީ ފާރިސީ ދައުލަތް އީރާނެވެ.

އީރާނުގެ މައްސަލައިގައި ސަޢޫދީއަށް އެންމެ ވާގިވެރިވާ އެއް ޤައުމަކީ ބަޙްރައިންއެވެ. އާދިއްތަ ދުވަހު ޢަރަބި ލީގުގެ ކުއްލި ބައްދަލުވުމުގައިވެސް ސަޢޫދީއާއި ބައިވެގެން އީރާނަށް އެންމެ ބޮޑަށް ފާޑުކީ ބަޙްރައިންއެވެ. ބަޙްރައިންއަކީ ޝީޢީންގެ ބައިގިނަ ޤައުމެއްނަމަވެސް، އެޤައުމުގައި ވެރިކަންކުރާ ޝާހީ އާއިލާއަކީ ބައިމަދު ސުންނީ މުސްލިމު އާއިލާއެކެވެ. އަދި 2011ވަނަ އަހަރުން ފެށިގެން މެދުއިރުމަތީގައި ހިނގަން ފެށި ހަމަނުޖެހުންތަކުގައި ބަހްރައިންގެ ޝާހީ އާއިލާއާއި ދެކޮޅަށް އެޤައުމުގެ މަގުތަކަށްވެސް ގިނަ ބަޔަކު ނިކުތެވެ.

އާދިއްތަ ދުވަހު ބޭއްވި ޢަރަބި ލީގު ސަމިޓްގައި އެންމެ ބޮޑަށް ދެކެވުނު އެއް ވާހަކަޔަކީ ޔަމަނުގެ ހޫޠީން ދާދިފަހުން ސަޢޫދީގެ ވެރިރަށް ރިޔާޒްގެ މައި އެއަރޕޯޓަށް އަމާޒުކޮށް ދިން މިސައިލް ޙަމަލާގެ ވާހަކައެވެ. ސަޢޫދީއިން ތުހުމަތުކުރާ ގޮތުގައި މިމިސައިލަކީ އީރާނުގެ އުފެއްދުމެކެވެ.