ޣިޔާސުއްދީން އިންޓަނޭޝަނަލް ސުކޫލުން ޓޯނަމަންޓް އޮފް ޗެމްޕިއަންސް ގައި ބައިވެރިވެގެން 32 މެޑަލް ކާމިޔާބުކޮށްފި
އެ ސުކޫލް ދެ ޓީމެއް ވަނީ ބައިވެރިވެފައި
ޓޯނަމަންޓުގައި ބައިވެރިވި ކުދިންނާއި ސުކޫލުގެ އިސްވެރިން ފޮޓޯއަކަށް ހުއްޓިގެން
ޣިޔާސުއްދީން އިންޓަނޭޝަނަލް ސުކޫލުން ޓޯނަމަންޓް އޮފް ޗެމްޕިއަންސް ގައި ބައިވެރިވެގެން 32 މެޑަލް ކާމިޔާބު ކޮށްފިއެވެ.
ޓޯނަމަންޓް އޮފް ޗެމްޕިއަންސް ގައި ޣިޔާސުއްދީން އިންޓަނޭޝަނަލް ސުކޫލުގެ ފަރާތުން ހަ ކުދިންގެ ދެ ޓީމެއް ވަނީ ބައިވެރިވެފައެވެ. އެގޮތުން ޖޫނިއަރ ޓީމުން 14 ގޯލްޑް މެޑަލް އާއި 7 ސިލްވަރ މެޑަލް ހޯދާފައިވާއިރު ސީނިއަރ ޓީމުން ވަނީ 2 ގޯލްޑް މެޑަލް އާއި 9 ސިލްވަރ މެޑަލް ހާސިލް ކޮށްފައެވެ.
ޓޯނަމަންޓް އޮފް ޗެމްޕިއަންސް އަކީ އެމެރިކާގެ ޔާލެ ޔުނިވަރސިޓީގެ ފަރާތުން އިންތިޒާމު ކޮށްގެން ބާއްވާ ޓޯނަމަންޓެކެވެ. މި ޓޯނަމަންޓު ކުރިއަށް ގެންގޮސްފައި ވަނީ ނޮވެމްބަރ މަހުގެ 9 ވަނަ ދުވަހުން 14 ވަނަ ދުވަހުގެ ނިޔަލަށް އެ ޔުނިވަރސިޓީގައެވެ.
ޣިޔާސުއްދީން އިންޓަނޭޝަނަލް ސުކޫލުގެ ކުދިން ހޯދި ކާމިޔާބީ އާއި ބޭހޭގޮތުން ވާހަކަ ދައްކަވަމުން ޣިޔާސުއްދީން އިންޓަނޭޝަނަލް ސުކޫލުގެ ޑެޕިއުޓީ ޕްރިންސިޕަލް ޝިރްމީނާ ފަހީމް ވިދާޅުވީ މި ޓޯނަމަންޓުގައި އެ ސުކޫލުން ބައިވެރިވާތާ ދެ އަހަރުވެފައިވާ ކަމަށާއި އެ ސޫކުލަށް ކުދިން ހޯދި ކާމިޔާބީ އަށް އުފާކޮށް ފަހްރުވެރިވާ ކަމަށެވެ.
ކުދިން މި ޓޯނަމަންޓަށް ތައްޔާރުކުރުމުގައި އެހީތެރި ވެދެއްވި އިންގްލިޝް ޑިޕާޓްމަންޓުގެ ހެޑް ސަރޯޖް ވިލްސަން ވިދާޅުވީ މި ޓޯނަމަންޓުގައި ތަފާތު ހަރަކާތްތައް ކުރިއަށް ދިޔަކަމަށެވެ. އެގޮތުން ބަހުސް މުބާރާތްތަކާއި ކުއިޒް ކޮމްޕެޓިޝަންތަކާއި ގާތްގަނޑަކަށް ހުރިހާ މާއްދާތަކުން ކުދިންނާއި ސުވާލު ކުރެވިގެން ދިޔަ ކަމަށް އެނގިފައިވެއެވެ.
ޓޯނަމަންޓުގައި ބައިވެރިވި ކުދިން ބުނެފައިވަނީ މިހާ ބޮޑު ކާމިޔާބީ އަކާއި ހަމައަށް ވާސިލް ވުމަށްޓަކައި މައިންބަފައިންނާއި ސަރޯޖް މިސް އަދި ސުކޫލުގެ ފަރާތުން ވަރަށް ބޮޑު އެހީތެރިކަމެއް ލިބިގެން ދިޔަ ކަމަށެވެ. އަދި އެ ލިބުނު ކާމިޔާބީ އާއި މެދު ވަރަށް ބޮޑަށް ހިތްހަމަޖެހޭ ކަމަށާއި ކުރިއަށް އޮތް ތަނުގައި ރާއްޖެއަށާއި ސުކޫލަށް ރީތި ނަން ހޯދައި ދިނުމަށް މަސައްކަތް ކުރާނެ ކަމަށްވެސް ކުދިން ވަނީ ބުނެފައެވެ.
މި ޓޯނަމަންޓުގައި ދުނިޔޭގެ އެކި ގައުމު ތަކުން 2500 އަށް ވުރެ ގިނަ ކުދިން ބައިވެރިވެފައެވެ.
ޣިޔާސުއްދީން އިންޓަނޭޝަނަލް ސުކޫލުގެ އިސްވެރިންނާއި ބެލެނިވެރިން އަދި ބައެއް ޓީޗަރުން ވަނީ މާފަތިތަކާއި ބޮޑު ބެނަރ އެއް ހިފައިގެން މި ޓޯނަމަންޓުގައި ބައިވެރިވި ކުދިންނަށް މަރުހާބާ ކިޔާފައެވެ.
