ރާއްޖޭ ކްލަބަކުން ތައްޔާރުކުރި އެންމެ "ކޮލެޓީ" ޖޯޒީ ނިއު އިން ވިއްކަން ފަށައިފި

ރާއްޖޭގެ ކްލަބަކުން ތައްޔާރުކުރި އެންމެ "ކޮލެޓީ" ޖޯޒީ ނިއުރޭޑިއަންޓް ސްޕޯޓްސް ކްލަބުން ސަޕޯޓަރުންނަށް ވިއްކަން ފަށައިފިއެވެ.

ނިއުގެ ޖެނެރަލް ސެކެޓްރީ އަހުމަދު ނިޔާޒް މޫސާ (ޓެޑް) ވިދާޅުވީ، ނިއުގެ އާ ޖޯޒީ ބައި ތައްޔާރުކޮށްފައި ވަނީ ތައިލޭންޑްގެ މަޝްހޫރު ކުންފުންޏެއް ކަމަށްވާ ޔުނިވާސަލް އެޕަރެލް އިން ކަމަށާއި، މިއީ މިހާތަނަށް ރާއްޖޭގެ ކްލަބަކުން ތައްޔާރުކުރި އެންމެ "ކޮލެޓީ" ޖޯޒީއަށް ވެގެންދާނެ ކަމަށެވެ.

ޓެޑް ވިދާޅުވީ، ނިއުގެ ޖޯޒީތައް ސަޕޯޓަރުންނަށް ހުކުރު ދުވަހު ވަރަށް ހެޔޮ އަގެއްގައި ވިއްކަން ފަށާފައިވާ ކަމަށާއި، ޖޯޒީ ލިބެން ހުންނާނީ އޯލް ސްޕޯޓްސް އަދި އެފްއޭއެމް އިދާރާގައި ހުންނަ ނިއުގެ އޮފީހުން ކަމަށެވެ.

ތިން ކުލަބެއްގެ ޖޯޒީ ވިއްކަން ހުންނާނެކަން ފާހަގަކުރަމުން ޓެޑް ވިދާޅުވީ، ބޮޑެތި މީހުންގެ ޖޯޒީ ވިއްކަނީ 350ރ. އަށް ކަމަށާއި، ސޯޓާއެކު އެ ޖޯޒީތައް ވިއްކާނީ 500ރ. އަށް ކަމަށެވެ. މީގެ އިތުރުން ކުޑަކުދިންގެ ޖޯޒީ 300ރ. އަށް ލިބެން ހުންނައިރު، ސޯޓާއެކު އެ ޖޯޒީ ވިއްކާނީ 450ރ. އަށް ކަމަށް ވެސް ޓެޑް ވަނީ ވިދާޅުވެފައެވެ.

ޓެޑް ވިދާޅުވީ، ޖޯޒީތައް ވިއްކުމުގެ އިންތިޒާމު އަތޮޅު ތެރޭގައި ވެސް ވިއްކުމުގެ ކަންކަން ހަމަޖެއްސުމުގެ މަސައްކަތްކުރަމުން އަންނަ ކަމަށާއި، މި ސީޒަނުގައި ނިއު ކުޅޭ މެޗުތަކުގައި ދަނޑު ބޭރުން ވެސް ޖޯޒީ ވިއްކަމުންދާނެ ކަމަށެވެ.

އުރީދޫ ދިވެހި ޕްރިމިއާ ލީގުގައި ނިއު އަދި ޓީސީ ބައްދަލުކުރާ މެޗަށް ދެޓީމުގެ ސަޕޯޓަރުން ވެސް އަންނަނީ ވަރުގަދައަށް ތައްޔާރުވަމުންނެވެ. މި މެޗުން ނިއު އަށް ޕޮއިންޓެއް ލިބުނަސް ލީގު ކަށަވަރުވެގެންދާނެ އެވެ.