ގައުމީ ބާސްކެޓްބޯލް ލީގު: އަންހެން ޑިވިޝަންގެ ޗެމްޕިއަންކަން ސައިކްލޯން ހޯދައިފި

ގައުމީ ބާސްކެޓްބޯލް ލީގުގައި ޖިބިލީ އެސްސީ ބަލިކުރުމަށް ފަހު، އަންހެން ޑިވިޝަންގެ ޗެމްޕިއަންކަން ސައިކްލޯން ބީސީން ހޯދައިފިއެވެ.

ޒުވާނުންގެ މަރުކަޒު އެތެރޭ ކޯޓުގައި ކުރިޔަށްދިޔަ ފޯރިގަދަ ފައިނަލް މެޗު ޖިބިލީއާ ވާދަކޮށް ސައިކްލޯން އިން މެޗު ކާމިޔާބު ކުރީ 70 ޕޮއިންޓް 38 ޕޮއިންޓުންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ސައިކްލޯން އަށް އެންމެ ގިނަ ޕޮއިންޓް ހޯދައިދިން ނަތާޝާ މިޖަޓޮވިޗްއެވެ. އޭނާ ވަނީ އެޓީމަށް 26 ޕޮއިންޓް ހޯދައިދީފައެވެ.

އަންހެން ޑިވިޝަންގެ އެންމެ މޮޅު ފަސް ކުޅުންތެރިންނަކީ ޖިބިލީގެ އާމިނަތު ޝިއުރާ، މަރިޖާ ރަޑޮވިޗް، ސައިކްލޯންގެ ފާތިމަތު ރިޝްމާ، ނަތާޝާ މިޖަޓޮވިޗް އަދި ރާއިފާ އިބްރާހިމްއެވެ. އަންހެން ޑިވިޝަންގެ އެންމެ މޮޅު ކުޅުންތެރިޔަކަށް ހޮވުނީ ރެޑްވިންގްސް ބީސީގެ ޖެލޭނާ ބުޑްމިއާއެވެ.

ގައުމީ ލީގުގެ ފިރިހެން ޑިވިޝަންގެ ޗެމްޕިއަންކަން ހޯދީ ކިންގް ބީސީންނެވެ. މުބާރާތުގެ ފިރިހެން ޑިވިޝަންގެ ޗެމްޕިއަންކަން މުޅިން އަލަށް ކިންގް ބީސީ ހޯދާފައިވާއިރު، އެޓީމު ފައިނަލުގައި ބަލިކުރީ ޓީރެކްސްއެވެ.