އައިޝްވަރިޔާ ރާއީ އާއި އަނިލް ކަޕޫރުގެ ފިލްމު"ފެނީ ޚާން" އަންނަ އަހަރުގެ އީދުގައި ރިލީޒްކުރާނެކަން އިއުލާން ކޮށްފިއެވެ.
އެ ފިލްމު އުފައްދާ ކިރާޖީ އެންޓަޓެއިންމަންޓުން ބުނިގޮތުގައި "ފެނީ ޚާން" ރިލީޒްކުރާނީ އަންނަ މަހުގެ ޖޫން މަހުގެ 15 ވަނަ ދުވަހުގައެވެ. އެދުވަސް ދިމާވަނީ އީދު ދުވަހާއެވެ.
"ފެނީ ޚާން"ގެ ޝޫޓިން އައިޝްވަރިޔާ ފަށާފައިވަނީ މިމަހުގެ ފުރަތަމަ ހަފްތާގެ ތެރޭގައެވެ.
"ފެނީ ޚާން" ޝޫޓްކުރަމުން ދަނިކޮށް އެ ފިލްމުގައި ހަރަކާތްތެރިވާ ރާޖް ކުމާރު އެކްސިޑެންޓްވެ އޭނާގެ ފަޔަށް ވަނީ އަނިޔާވެފައެވެ. އަދި ހޮސްޕިޓަލަށް ގެންގޮސް އޭނާގެ ފަޔަށް ބޭސްކޮށްފައިވާ ކަމަށް "ފެނީ ޚާން" ގެ ޓީމުން ނެރުނު ބަޔާނުގައި ވަނީ ބުނެފައެވެ. އޭނާގެ ހާލު ރަނގަޅު ކަމަށާއި ވަރަށް އަވަހަށް ފިލްމުގެ ޝޫޓިންގައި ބައިވެރިވާނެ ކަމަށްވެސް ވަނީ ބުނެފައެވެ. މި ފިލްމަކީ ޑަޗް ފިލްމެއް ކަމަށްވާ "އެވްރި ބޮޑީ އިޒް ފޭމަސް"ގެ އަސްލަކަށް ބަލައިގެން އުފައްދާ ފިލްމެކެވެ. މި ފިލްމުން އައިޝްވަރިޔާ ފެނިގެންދާނީ ވަރަށް ޒަމާނީ އަންހެން ކުއްޖެއްގެ ރޯލުންނެވެ.
މި ފިލްމުގެ ޑައިރެކްޓަރަކީ އަތުލް މަންހްރެކަރް އެވެ. ޕްރޮޑިއުސަރަކީ ރާކޭޝް އޯމްޕްރަކާޝް މެހެރާއާއި ޕްރޭނާ އަރޯރާއެވެ.
"ފެނީ ޚާން" ޖޫން މަހުގެ 15 ގައި ރިލީޒް ކުރާއިރު ސަލްމާން ޚާން ގެ "ރޭސް3" ވެސް ރިލީޒްކުރާނީ ޖޫން މަހުގެ 15 ގައެވެ.
ޚަބަރުތައް ބުނާ ގޮތުގައި "ރޭސް3" ގައި އަނިލް ކަޕޫރު ވެސް ފެނިގެންދާނެއެވެ. އެހެން ކަމަށްވާނަމަ އަނިލް ކަޕޫރުގެ ދެ ފިލްމު އެއްދުވަހެއްގައި ރިލީޒްވެގެންދާނެއެވެ.
