ސަޢޫދީ ރައްޔިތުން ލުބްނާނުން ފައިބަން އަންގައިފި!

ލުބްނާނުގައި ތިބި ސަޢޫދީ ރައްޔިތުން އެޤައުމުން ފޭބުމަށް ސަޢޫދީއިން އަންގައިފިއެވެ. ސަޢޫދީގެ ޚާރިޖިއްޔާއިން ނެރުނު ބަޔާނެއްގައި ބުނީ ލުބްނާނުގެ މަސްރަހު އޮތް ގޮތުން ސަޢޫދީގެ ރައްޔިތުން އެޤައުމަށް ދަތުރުކުރުން މަނާކުރާކަމަށާއި، ލުބްނާނުގައި ތިބި ސަޢޫދީ ރައްޔިތުން ވީހާ އަވަހަކަށް އެޤައުން ފޭބުމަށް އަންގާކަމަށެވެ. އަދި އެހެން ޤައުމުތަކުގައި ތިބި ސަޢޫދީ ރައްޔިތުން ވެސް ލުބްނާނަށް ދަތުރުނުކުރުމަށް އަންގާކަމަށް ސަޢޫދީ ޚާރިޖިއްޔާއިން ބުނެއެވެ.

ސަޢޫދީއަށް ކުރެއްވި ދަތުރުފުޅެއްގެ ތެރެއިން ލުބްނާނުގެ ބޮޑުވަޒީރު ސާދު ޙަރީރީ މިދިޔަ ހޮނިހިރު ދުވަހު ކުއްލި ގޮތަކަށް އިސްތިއުފާ ދެއްވިފަހުން ލުބްނާނުގެ މަސްރަހު ވަނީ ވަރަށް ބޮޑަށް ހަލަބޮލިވެފައެވެ. މުޅި ގަލްފުގެ މަސްރަހު ހޫނުވެފައިވާއިރު، ހަރީރީ އިސްތިއުފާ ދެއްވަމުން ވިދާޅުވީ އެމަނިކުފާނު އިސްތިއުފާދެއްވީ ލުބްނާނުގެ ދާޚިލީ ކަންކަމުގެ ތެރެއަށް އީރާނާއި އީރާނުން ވާގިވެރިވާ ލުބްނާނުގެ ހަތިޔާރު އެޅި ޝީޢީ ޖަމާޢަތް ހިޒްބުﷲގެ ނުފޫޒު ގަދަވުމުންނެވެ. ޙަރީރީގެ އިސްތިއުފާގެ ފަހުން އެމަނިކުފާނު ވީ ހިސާބެއް އެނގިފައެއް ނުވެއެވެ. އެހެން ނަމަވެސް އިސްތިއުފާއަށް ފަހު ހަރީރީ، ސަޢޫދީ ރަސްގެފާނު ސަލްމާން ބިން އަބްދުލްޢަޒީޒާއި ބައްދަލުކުރައްވާ ފޮޓޯތައް އާއްމުވެފައިވެއެވެ. އެބައްދަލުވުމަށް ފަހު ޙަރީރީ ހުންނެވީ ސަޢޫދީ ސިއްރު ފުލުހުންގެ ބަންދުގައި ކަމަށް މެދުއިރުމަތީގެ ބައެއް ނޫސްތައް ރިޕޯޓްކުރިއެވެ. އެހެން ނަމަވެސް އެކަން ކަށަވަރު ކުރެވޭ ގޮތެއް ނުވެއެވެ.

ރޮއިޓަރސް އިން ރިޕޯޓްކުރާ ގޮތުގައި ހަރީރީގެ އިސްތިއުފާގެ ލިޔެކިޔުންތައް އަދިވެސް ލުބްނާނުގެ ސަރުކާރަކަށް ނުލިބެއެވެ. އެހެންކަމުން ލުބްނާނު ސަރުކާރުން އަދިވެސް ބަލަނީ ހަރީރިއަކީ ބޮޑުވަޒީރުގެ ގޮތުގައި ކަމަށާއި، ހަރީރީ 'ހިފަހައްޓައިގެން' ސަޢޫދީއިން އުޅޭ އުޅުން ލުބްނާނުން ކުށްވެރިކުރާކަމަށް އެޤައުމުގެ އޮފިޝަލުންނާއި ހަވާލާދީ މީޑިއާ ރިޕޯޓްތައް ބުނެއެވެ. ހަރީރީ އިސްތިއުފާ ދެއްވި ސީދާ ސަބަބު ހޯދުމަށް ބައިނަލްއަޤްވާމީ އެހީތެރިކަމަށް ލުބްނާނުގެ ރައީސް މިޝޭލް އައޯން ވަރަށް އަވަހަށް ގޮވާލައްވާނެ ކަމަށްވެއެވެ.

ޙަރީރީގެ އިސްތިއުފާއާއި ގުޅިގެން އީރާނުން ބުނީ ލުބްނާނުގެ ދާޚިލީ ކަންކަމުގެ ތެރެއަށް އެޤައުމުން ނުވަންނަ ކަމަށާއި، ޢަރަބި-ފާރިސީ މައްސަލައިގެ ތެރެއަށް ލުބްނާނު ވެއްދީ ސައޫދީއިން ނުބައި ރޭވުމެއްގެ ދަށުން ކަމަށެވެ. ފާޑުކިޔާ ފަރާތްތަކުން ބުނާ ގޮތުގައި ޙަރީރީގެ އިސްތިއުފާއަކީ ވެސް އަރަބި ދުނިޔޭގެ މައްޗަށް ނުފޫޒު ފޯރުވަން ސަޢޫދީ ވަލީޢަޙުދު މުޙައްމަދު ބިން ސަލްމާން ކުރައްވަމުންގެންދަވާ މަސައްކަތުގެ ބައެއް ކަމަށެވެ.