ނެޝަނަލް ބައިކް ޗެންޕިއަންޝިޕްގެ ނަމުގައި ހާއްސަ މުބާރާތެއް ބާއްވަނީ
މި މުބާރާތް ފެށުމަށް ހަމަޖެހިފައިވަނީ މިމަހު 24 ގައި
ބައިކް މޯލްޑިވްސް އިން މާލޭގައި ބައިިސްކަލް ދުއްވަނީ
މިމަހުގެ ތެރޭގައި ނެޝަނަލް ބައިކް ޗެންޕިއަންޝިޕްގެ ނަމުގައި ހާއްސަ މުބާރާތެއް ބޭއްވުމަށް ނިންމާފައިވާ ކަމަށް ބައިކް މޯލްޑިވްސް އިން ބުނެފި އެވެ.
ބައިކް މޯލްޑިވްސް އިން އިންތިޒާމުކޮށްގެން ބާއްވާ މި މުބާރާތާ ގުޅޭ ގޮތުން މައުލޫމާތު ދެއްވަމުން ބައިކް މޯލްޑިވްސްގެ ޖެނެރަލް ސެކްރެޓަރީ އަސްމާ ހަސަން ވިދާޅުވީ، މި މުބާރާތް ކުރިއަށްދަނީ މިމަހުގެ 24 އަދި 25 ވަނަ ދުވަހު ކަމަށެވެ. މުބާރާތުގައި ބައިވެރިވުމަށް ބައިކް މޯލްޑިވްސްގެ މެންބަރުން އެއްވެސް ފީއެއް ދައްކަން ނުޖެހޭ އިރު އަމިއްލަ ފަރާތްތަކުން 200ރ. މުބާރާތުގައި ބައިވެރިވުމަށް ދައްކަންޖެހޭނެ ކަމަށް އޭނާ ވިދާޅުވި އެވެ. އަސްމާ ވިދާޅުވީ، އަމިއްލަ ޖަމިއްޔާ ޖަމާއަތްތަކަށް ވެސް މި މުބާރާތުގައި ބައިވެރިވުމަށް ފުރުސަތު ހުޅުވާލާފައިވާ ކަމަށެވެ.
"އަންހެން ފިރިހެން ވަކިން، ކްލަބު ޖަމިއްޔާތައް ވަކިން ބައިވެރިވެވޭނެ. މުބާރާތުގައި އެކި ކެޓަރީތަކަށް ވަނީ ބެހިފައި. އެއީ 200 މީޓަރާއި 1000 މީޓަރާއި 4000 މީޓަރާއި 30 ކިލޯ މީޓަރާއި 60 ކިލޯ މީޓަރު. ކޮންމެ ބޭފުޅަކަށް ވެސް ގިނަވެގެން ބައިވެރިވެވޭނީ ތިން ކެޓަގަރީގައި. ގްރޫޕް އިވެންޓްތަކުގައި ފަސް ބައިވެރިން ތިބެން ޖެހޭ އިރު ހަތަރު ބައިވެރިންނަށް އެއް ފަހަރާ ދުއްވޭނީ. ފަސް ވަނަ ބައިވެރިޔާއަކީ އަނިޔާއެއް ވާހާލަތުގައި ބަދަލުގައި އެރުވުމަށް ބަހައްޓާ ފަރާތް،" އަސްމާ ވިދާޅުވި އެވެ.
އަސްމާ ވިދާޅުވީ،ހުޅުމާލޭގައި ކުރިއަށްގެންދާ މި މުބާރާތުގައި ބައިވެރިވުމަށް ބޭނުންވާ ފަރާތްތަކަށް މިހާރު ވެސް ފުރުސަތު ހުޅުވާލާފައިވާ ކަމަށެވެ. އެގޮތުން ފޭސްބުކް އާއި ވައިބަރ ގްރޫޕް އަދި ބައިކް މޯލްޑިވްސްގެ އިދާރާއިން ވެސް މުބާރާތުގައި ބައިވެރިވުމަށް ބޭނުންވާ ފޯމް ލިބޭނޭ ކަމަށެވެ.
މިއީ ކުޅިވަރު މުބާރާތެއްގެ ގޮތުގައި ކުރިން ކުރެވުނު ކަމެއް ނަމަވެސް މިހާރު މިފަދަ މުބާރާތެއް ނުބާއްވާތާ ވަރަށް ދުވަސްވެފައިވާ ކަމާށާއި ބައިކް މޯލްޑިވްސްގެ އެންމެ ބޮޑު އަމާޒަކީ ބައިސްކަލް ދުއްވާ ފަރާތްތައް އިތުރުކޮށް، މިކަން ޕްރޮމޯޓް ކުރުން ކަމަށެވެ.
ބައިކް މޯލްޑިވްސްގެ މެންބަރު އަނީސާ އަހުމަދު ވިދާޅުވީ އުންމީދަކީ ބައިސްކަލް ދުއްވުމަކީ ވެސް ރާއްޖޭގެ ސްޕޯޓްސް ކަލަންޑަރުގައި ހިމެނޭ ކުޅިވަރެއްގެ ގޮތުގައި މުސްތަގުބަލުގައި ފެނިގެންދިއުން ކަމަށާއި އެކަން ކުރުމަށް ބައިކް މޯލްޑިވްސް އިން އިސްނަގައިގެން މިހާރު ވެސް ތަފާތު މުބާރާތްތައް ބާއްވަމުންދާ ކަމަށެވެ.
