އެމެރިކާގެ މަނަވަރުތަކެއް ލަންކާއަށް ޒިޔާރަތްކުރަނީ
28 އޮކްޓޯބަރު 2017 | ހޮނިހިރު 05:23މި ޒިޔާރަތުގެ ސަބަބުން ލަންކާގެ އިޤްތިޞާދަށް 10 މިލިއަން ޑޮލަރު ވަންނާނެ
ލަންކައަށް ޒިޔާރަތްކުރާ އެމެރިކާގެ ލަޝްކަރުގައި ހިމެނޭ ޔޫއެސްއެސް ނިމިޓްޒް އެއަރކްރާފްޓް ކެރިއަރ
އެމެރިކާގެ އެއަރކްރާފްޓް ކެރިއަރއެއް މިއަދު އަވަށްޓެރި ސްރީލަންކާއަށް ބަނދަރުކުރާނެއެވެ.
ޗައިނާގެ ނުފޫޒު އިންޑިއާ ކަނޑާއި ޕެސިފިކް ކަނޑުގައި ގަދަވަމުންދާ މިދަނޑިވަޅުގައި ޗައިނާ އާއި ގާތްގުޅުމެއް އޮންނަ ސްރީލަންކާއަށް ޒިޔާރަތްކުރާ އެމެރިކާގެ ކަނޑުގެ ސިފައިންގެ ލަޝްކަރުގައި ހިމެނޭ ނިމިޓްޒް ކެރިއަރ ސްޓްރައިކް ގްރޫޕެވެ. މި ލަޝްކަރުގައި ހިމެނެނީ އެމެރިކާގެ ހަނގުރާމަމަތީ މަތިންދާބޯޓު އުފުލާ އެއް މަނަވަރު ކަމަށްވާ ޔޫއެސްއެސް ނިމިޓްޒްގެ އިތުރުން ސްޓްރައިކް ގްރޫޕްގައި ހިމެނޭ ޔޫއެސްއެސް ޕްރިންސްޓަން، ޔޫއެސްއެސް ހޮވަރޑް، ޔޫއެސްއެސް ޝޫޕް، ޔޫއެސްއެސް ޕިކްނީ އަދި ޔޫއެސްއެސް ކިޑްއެވެ.
މިއީ 1985ވަނަ އަހަރުގެ ފަހުން ލަންކާއަށް ބަނދަރުކުރާ ފުރަތަމަ އެއަރކްރާފްޓް ކެރިއަރއެވެ. މި ކެރިއަރ ގްރޫޕް ލަންކާގައި 4 ދުވަސް ހޭދަކުރާއިރު، ލަންކާގެ އިޤްތިޞާދަށް 10 ވަރަކަށް މިލިއަން އެމެރިކާ ޑޮލަރު ވަންނާނެކަމަށް ލަފާ ކުރެވޭކަމަށް ކޮޅުނބުގައި ހުންނަ އެމެރިކާ އެމްބަސީއިން ބުނެއެވެ. އެއީ މަނަވަރުތަކަށް ބޭނުންވާ ސަޕްލައިތައް ގަތުމަށާއި، ލަންކާއަށް ފައިބާ އެތައް ހާސް އެމެރިކާ ސިފައިންގެ އަތުން އިޤްތިޞާދަށް ވަންނާނެ ފައިސާއެވެ. މި ލަޝްކަރު އެއްގަމަށް ފައިބާ، އިޖްތިމާޢީ ބައެއް ކަންކަމުގައި ބައިވެރިވާނެކަމަށް އެމެރިކާ އެމްބަސީއިން ބުނެއެވެ.
