ބާރަ ވަނަ ގައުމީ ބާސްކެޓްބޯލް ލީގުގެ ދެވަނަ ޑިވިޝަނުގައި ސްޓިންޖާސް ބީސީއާއި އެލްކިއު ސްޕޯޓްސް ކުޅުނު މެޗުތަކުން އެ ދެ ޓީމު ވެސް މޮޅުވެއްޖެއެވެ.

ރެޑްވިންގްސް ބީސީ އާއި ދެކޮޅަށް ކުޅުނު މެޗުން ސްޓިންޖާސް ބީސީ މޮޅުވެފައި ވަނީ 69 ޕޮއިންޓް 56 ޕޮއިންޓް އިންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ސްޓިންޖާސްގެ ޖާޒީ ނަމްބަރު 13، ސޮފްއަތު ބަދީއުއެވެ. މި މެޗުގައި ސްޓިންޖާސް ބީސީއަށް އެންމެ ގިނަ ޕޮއިންޓް ހޯދައިދިން ކުޅުންތެރިޔަކީ މި މެޗުގެ މޮޅު ކުޅުންތެރިޔަކަށް ހޮވުނު ސޮފްއަތު ބަދީއުއެވެ. އޭނާ ވަނީ މި މެޗުގައި އެ ޓީމަށް 18 ޕޮއިންޓް އެއްކޮށްދީފައެވެ. ރެޑްވިންގްސް ބީސީއަށް 14 ޕޮއިންޓާއެކު އެންމެ ގިނަ ޕޮއިންޓް ހޯދައިދިން ކުޅުންތެރިޔަކީ އެ ޓީމުގެ ޖާޒީ ނަމްބަރު 9، މުހައްމަދު ރިޝްވާންއެވެ.

ކީން ސްޕޯޓްސްއާ ދެކޮޅަށް ކުޅުނު މެޗުން އެލްކިއު ސްޕޯޓްސް މޮޅުވެފައިވަނީ 108 ޕޮއިންޓް 67 ޕޮއިންޓްއިންނެވެ.

މި މުބާރާތުގެ ފުރަތަމަ ބުރުގެ ކުޅުން ނިމި ދެވަނަ ބުރުގެ ކުޅުން ފަށާފައިވާއިރު މުބާރާތުގެ ކުޅުންތެރިންގެ ރޭންކިންގެ ގަދަ ފަހެއްގައި ހިމެނޭ ކުޅުންތެރިންނަކީ އެލްކިއު ސްޕޯޓްސްގެ އަހުމަދު ނާއިފް ރަޝީދާއި އެޗްޑީސީގެ ޝިރުފާން އަހުމަދު އާއި ސްޓިންޖާސް ބީސީގެ މުހައްމަދު ނިޝާން އާއި މުހައްމަދު ޝައުފް މިންތާޒްގެ އިތުރުން މުހައްމަދު ސަބީހް ތައުފީގްއެވެ.

މުބާރާތުގައި ފުރަތަމަ ބުރުގެ ކުޅުން ނިމުނު އިރު ޕޮއިންޓް ތާވަލުގެ އެއްވަނައިގައި އަށް ޕޮއިންޓާއެކު އޮތީ ސްޓިންޖާސް ބީސީއެވެ. ދެވަނައިގައި ހަތް ޕޮއިންޓާއެކު އެޗްޑީސީ އޮތްއިރު ތިންވަނައިގައި ހަ ޕޮއިންޓާއެކު އޮތީ އެލްކިއު ސްޕޯޓްސްއެވެ. ހަތަރު ވަނައިގައި ފަސް ޕޮއިންޓާއެކު ރެޑްވިންގްސް ބީސީ އޮތްއިރު ޕޮއިންޓް ތާވަލުގެ ފުލުގައި ހަތަރު ޕޮއިންޓާއެކު އޮތީ ކީން ސްޕޯޓްސްއެވެ.

ކޮންމެ އަހަރަކު އެއްފަހަރު ބާސްކެޓްބޯލް އެސޯސިއޭޝަނުން އިންތިޒާމުކޮށްގެން ބާއްވާ މި މުބާރާތުގެ ފިރިހެން ދެވަނަ ޑިވިޝަނުގައި މި އަހަރު ބައިވެރިވެފައި ވަނީ ފަސް ޓީމަކުންނެވެ. އެއީ އެލްކިއު ސްޕޯޓްސް، ކީން ސްޕޯޓްސް، ކްލަބް އެޗްޑީސީ، ރެޑްވިންގްސް ބީސީގެ އިތުރުން ސްޓިންޖާސް ބީސީއެވެ.