އިންޑިއާގެ ކަލާސް ޓީވީ ޗެނަލުން އޮކްޓޯބަރު މަހުގެ 1 ވަނަ ދުވަހު ފެށި "ބިގްބޮސް11" ވަނަ ސީޒަން ނިންމާލާނެކަމަށް ސަލްމާން އަނެއްކާވެސް ބުނެފިއެވެ.
ސަލްމާން އަކީ "ބިގްބޮސް11" ގެ ހޮސްޓެވެ. އޭނާ ވަނީ މިދިޔަ ހަފްތާގެ "ބިގްބޮސް" ޝޯ ކުރިއަށް ގެންދިޔަ ވަގުތުގައި އެ ޝޯއަށް އަލަށް ވަތް ސިންޗަކް ޕޫޖާ ޝޯ ގައި ތައާރަފް ކުރަން ޖެހުމުން ރުޅިގަދަ ވެފައެވެ. ސަލްމާން ވަނީ އެ ޝޯ ދެން ހޮސްޓު ނުކުރާނެކަމަށް ބުނެފައެވެ. ސަލްމާން ވަނީ މީގެ ކުރިންވެސް އޭނާ ހުށައަޅައިދިން "ބިގްބޮސް" ޝޯތަކުގައިވެސް ރުޅިއައިސްގެން އޭނާ ދެން ހޮސްޓެއް ނުކުރާނެކަމަށް ބުނެފައެވެ. އެހެން ނަމަވެސް ރިޕޯޓްތައް ބުނާ ގޮތުގައި ސަލްމާން ޝޯ ހުށައަޅައިދިނުމަށް އާނއެކޭ ކޮންމެ ފަހަރަކު ބުނަނީ އޭނާ އަށް ޝޯ ހުށައަޅައިދިނުމަށް ކިޔާ އަގު ބޮޑުވުމެވެ. "ބިގް ބޮސް 8" އާއި "ބިގް ބޮސް 9" ގައިވެސް ސަލްމާން ވަނީ އޭނާ ޝޯ ހޮސްޓު ނުކުރާނެކަމަށް ބުނެފައެވެ.
މިހާތަނަށް "ބިގްބޮސް"ގެ 10 ޝޯ ވަނީ ދައްކާފައެވެ. މިއީ ސަލްމާން ޚާން "ބިގް ބޮސް" ޝޯ ހުށައަޅައިދޭ 8 ވަނަ ފަހަރެވެ. އޭނާ މިފަހަރުގެ ޝޯ ހުށައަޅައިދެނީ 1.5 މިލިއަންޑޮލަރަށް ކަމަށް އިންޑިއާގެ ނޫސްތަކުގައި ވަނީ ބުނެފައެވެ.
"ބިގް ބޮސް" ޝޯ އަކީ މަޝްހޫރު ފަރާތްތައް ބައިވެރިކޮށްގެން ގެއެއްގެ ތެރޭގައި ދިރިއުޅެން ޖެހޭ ޝޯއެކެވެ. މި ޝޯގައި އެފަރާތްތަކަށް އެކި ޓާސްކްތައް ހަވާލު ކުރެވެއެވެ. އެ ޓާސްކްތައް ފުރިހަމަ ނުކުރެވޭ ފަރާތްތައް އެ ގެއިން ބޭރު ކުރެވޭ ގޮތަށް އޮންނަ މި ޝޯ ގައި އެ ގެތަކުގައި ސަރވައިވް ވާ 3 މީހުންގެ ތެރެއިން އެއްވަނައަށް ދާ ފަރާތްތަކަށް އަގުބޮޑު އިނާމެއް ދެއެވެ. ގެއިން ބޭރު ކުރެވޭނީ އެގޭގައި އުޅޭ މީހުންނާއި އާންމުންގެ ވޯޓުންނެވެ.
