މިޔަންމާގެ ރޮހިންޖާ މުސްލިމުންނާ މެދު ކަންކަންވަމުންދާ ގޮތާ މެދު މިޔަންމާގެ އަސްކަރިއްޔާ އިން ޒިންމާ ނަގަން ޖެހޭ ކަމަށް އެމެރިކާ އިން ބުނެފިއެވެ.
އެމެރިކާގެ ވޮޝިންޓަންގެ ތިންކް ޓޭންކެއް ކަމަށްވާ "ސެންޓާ ފޯ ސްޓްރެޓީޖިކް އެންޑް އިންޓަނޭޝަނަލް ސްޓަޑީޒް" އަށް އެމެރިކާގެ ޚާރިޖީ ވަޒީރު ރެކްސް ޓިލާސަން ވިދާޅުވީ މިޔަންމާގެ ރަކައިން ސްޓޭޓުގައި ހިނގަމުންދާ ޖަރީމާތަކަށް ބައިނަލްއަގްވާމީ ދުނިޔެއިން ބަލަން ނުތިބެވޭނެ ކަމަށެވެ. ރެކްސް ޓިލާސަން ބުދަ ދުވަހު މިމޭރުމުން ވާހަކަފުޅުދެއްކެވިއަސް، އެމެރިކާ އިން މިޔަންމާގެ އަސްކަރިއްޔާ އާ ދެކޮޅަށް އެއްވެސް ކަހަލަ އަސްކަރީ ފިޔަވަޅެއް އަޅާނެ ކަމަށް ޓިލާސަން ވިދާޅެއް ނުވެއެވެ.
ޓިލާސަން ވިދާޅުވީ ހަތިޔާރު އެޅި ގްރޫޕްތަކުގެ ނުރައްކާ މިޔަންމާ އަށް ކުރިމަތިވެފައިވާ ކަން އެގިވަޑައިގަންނަވާ ކަމަށާއި އެހެންނަމަވެސް އަސްކަރިއްޔާ އިން ޑިސިޕްލިން ވާން ޖެހޭނެ ކަމަށެެވެ. އަދި ކަންކަން އޮތް ހާލަތު ވަޒަން ކުރުމަށްޓަކައި އެ ސަރަހައްދަށް ވަންނަން ބޭނުންވާ އޮފިޝަލުންނަށް ވަދެވެން ޖެހޭނެ ކަމަށް ވެސް ޓިލާސަން ވިދާޅުވިއެވެ.
އެމެރިކާގެ ގާނޫނު ހަދާ މަޖިލީހުގެ 43 މެމްބަރަކު ވަނީ މިޔަންމާގެ އަސްކަރިއްޔާގެ ލީޑަރުންނާ ދެކޮޅަށް، އެމެރިކާ އަށް ދަތުރު ނުކުރެވޭ ގޮތަށް ފިޔަވަޅު އެޅުމަށާއި އަދި އިތުރު ދަތިކުރުމުގެ ފިޔަވަޅުތައް އެޅުމައް ރައީސް ޓްރަމްޕްގެ ސަރުކާރަށް ދާދިފަހުން ގޮވާލައްވާފައެވެ.
އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ވަނީ މިޔަންމާގެ ރޮހިންޖާ މުސްލިމުންނާ ދެކޮޅަށް އާ އޮޕަރޭޝަނެއް ފަށާފައެވެ. މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަަތް ފޭރިގަންނަމުންނެވެ. މިޔަންމާގެ އަސްކަރިއްޔާއިން ފަށާފައިވާ އޮޕަރޭޝަނާ ބެހޭ ގޮތުން އދ. އިން ބުނެފައި ވަނީ އެއީ "ނަސްލެއް ނައްތާލުމުގެ" އޮޕަރޭޝަނެއް ކަމަށެވެ. އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ހިންގާ ލާއިންސާނީ އަމަލުތަކުން ސަލާމަތްވުމަށް މިހާތަނަށް 500،000 އަށް ވުރެ ގިނަ ރޮހިންޖާ މުސްލިމުން ބަންގްލަދޭޝްއަށް ހިޖުރަ ކޮށްފައިވެއެވެ.
