ޗެމްޕިއަންސް ލީގު: ސިޓީ ގްރޫޕްގެ އެއްވަނައިގައި ހަމަޖެހިލައިފި

ޔުއެފާ ޗެމްޕިއަންސް ލީގުގައި މެންޗެސްޓާ ސިޓީ ކުޅުނު މެޗު ކާމިޔާބުކޮށް ގްރޫޕުގެ އެއްވަނައިގައި އެ ޓީމުން ހަމަޖެހިލައިފިއެވެ.

އަންގާރަ ދުވަހުގެ ރޭ އަމިއްލަ ދަނޑުގައި އިޓަލީގެ ނަޕޯލީގެ މައްޗަށް ސިޓީ ކުރި ހޯދީ ދެ ލަނޑު އެއް ލަނޑުންނެވެ. ދެ ޓީމުގެ ފަރާތުން ވެސް ވާދަވެރި ރީތި ކުޅުމެއް ފެނިގެން ދިޔަ މި މެޗުގައި ފުރަތަމަ ލަނޑުޖަހާ ލީޑު ނަގާފައި ވަނީ ސިޓީއިންނެވެ. އެގޮތުން ފުރަތަމަ ހާފުގެ ނުވަ ވަނަ މިނެޓުގައި ކައިލް ވޯކާ ތަނަވަސް ކޮށްދިން ފުރުސަތެއްގައި އެ ޓީމަށް މި ލަނޑު ޖަހައިދިނީ ރަހީމް ސްޓާލިންއެވެ. ސިޓީގެ ބްރެޒިލް ފޯވާޑް ގެބްރިއެލް ޖީސަސް ވަނީ އޭގެ ހަތަރު މިނެޓު ފަހުން ކެވިން ޑެބްރައިނާގެ އެހީތެރި ކަމާއެކު ލަނޑެއް ޖަހާ އެ ޓީމަށް ލީޑު ފުޅާ ކޮށްދީފައެވެ.

މި ލަނޑަށް ފަހު ވެސް ސިޓީ އިން ވަނީ ގިނަ ވަގުތު ބޯޅަ ގެންގުޅެ ލަނޑު ޖެހުމަށް ފަހި ފުރުސަތުތަކެއް ތަނަވަސް ކޮށްފައެވެ. އެގޮތުން 28 ވަނަ މިނެޓުގައި އޭރިއާ ބޭރުން ޑެބަރައިނާ ފޮނުވާލި ބާރު ހަމަލާ އަމާޒުވެފައި ވަނީ ނަޕޯލީގެ ގޯލުގެ ހުރަސް ދަނޑިއާއެވެ. ނަޕޯލީއަށް ނަތީޖާގެ ފަރަގު ކުޑަކުރަން ލިބުނު ޕެނަލްޓީ އެ ޓީމުގެ ފޯވާޑް ޑްރައިސް މާޓެންސް ބޭކާރު ކޮށްލިއިރު ފުރަތަމަ ހާފު ނިމިފައިވަނީ ދެ ލަނޑު ސުން ލަނޑުން ސިޓީ ކުރީގައި އޮވެގެންނެވެ.

ދެވަނަ ހާފު ފެށިގެން ނަޕޯލީއިން ވަނީ އެ ޓީމުގެ ކުޅުން ރަނގަޅުކޮށް މެޗުގެ ކޮންޓްރޯލް މަޑުމަޑުން ނަގާފައެވެ. އެ ޓީމުން ވަނީ މި ހާފުގައި ލަނޑު ޖެހުމަށް ރަނގަޅު ފުރުސަތުތަކެއް ތަނަވަސް ކޮށްފައެވެ. ނަޕޯލީއަށް މެޗުގެ ނަތީޖާގެ ފަރަގު ކުޑަވެގެން ދިޔައީ އެ ޓީމުގެ އެލަންއަށް ސިޓީގެ އޭރިއާ ތެރެއިން ފަނާންޑީނިއޯ ފައުލް ކުރުމާއި ވިދިގެން 73 ވަނަ މިނެޓުގައި ރެފްރީ ދިން ޕެނަލްޓީ އަމަދޫ ޑިއަވާރާ ގޯލުގެ ތެރެއަށް ވައްދާލައިގެންނެވެ.

މި ގްރޫޕުގައި ދެން ކުޅުނު މެޗުގައި ޔޫކްރެއިންގެ ޝަކްތަރް ޑޮނޭޓްސްކް ވަނީ ރަށުން ބޭރުގައި ދެ ލަނޑު އެއް ލަނޑުން ނެދަލޭންޑްސްގެ ފެޔަނޫދް ބަލިކޮށްފައެވެ. މި މެޗުގެ ފުރަތަމަ ލަނޑު ޖަހާ ލީޑު ނެގީ ފެޔަނޫދްއިންނެވެ. މި ލަނޑު ފުރަތަމަ ހާފުގެ އަށް ވަނަ މިނެޓުގައި އެ ޓީމަށް ޖަހައިދިނީ ސްޓީވެން ބާގުއިސްއެވެ. އެހެނަސް ޝަކްތަރްގެ ބްރެޒްލް މިޑްފީލްޑާ ބަނާޑް ވަނީ 24 ވަނަ މިނެޓުގައި ލަނޑެއް ޖަހާ އެ ޓީމަށް މެޗުގެ ނަތީޖާ ހަމަހަމަ ކޮށްދީފައެވެ. މެޗުގެ 54 ވަނަ މިނެޓުގައި ޝަކްތަރްއަށް ލީޑު ނަގައިދިނީވެސް ބަނާޑްއެވެ.

މި މޮޅާއެކު ސިޓީއިން ވަނީ ކުޅުނު ތިން މެޗުވެސް ކާމިޔާބު ކޮށް 9 ޕޮއިންޓް ހޯދައި މި ގްރޫޕުގެ އެއްވަނައިގައި ހަމަޖެހިލާފައެވެ. މި ގްރުޕޫގެ ދެވަނައިގައި 6 ޕޮއިންޓާއެކު ޝަކްތަރް އޮތްއިރު ތިންވަނައިގައި ތިން ޕޮއިންޓާއެކު އޮތީ ސިޓީ އަތުން ބަލިވި ނަޕޯލީއެވެ. އަދި ތާވަލުގެ ފުލުގައި އެއްވެސް ޕޮއިންޓެއް ނުލިބި އޮތީ ފެޔަނޫދްއެވެ.