ޓްރަމްޕް ސިޑިން އަރާވަޑައިގަންނަވަން ބިރުފުޅުގަންނަވާކަމުގެ އިތުރު ހެކި!

އެމެރިކާގެ ރައީސް ޑޮނާލްޑް ޓްރަމްޕް ސިޑިން އަރާވަޑައިގަންނަވަން ބިރުފުޅުގަންނަވާކަމަށް ބުނެ ވާހަކަ ދެކެވޭތާ މިހާރު މިވަނީ ދުވަސްތަކެއް ވެފައެވެ. އަދި މިކަމަށް ބާރުދޭ ބައެއް މަންޒަރުތައްވެސް އެކި ފަހަރުމަތިން ފެނިގެން ގޮސްފައިވާއިރު، ހޯމަ ދުވަހުގެރޭ މިފަދަ އިތުރު މަންޒަރެއް ވަނީ ފެނިގެން ގޮސްފައެވެ.

ރައީސް ޓްރަމްޕް ސިޑިން އަރާވަޑައިގަންނަވަން ބިރުފުޅުގަންނަވާކަމަށް، ނުވަތަ އެމަނިކުފާނު ބާތްމޮފޯބިއާ ތަޖުރިބާ ކުރައްވާ ކަމަށް ދެކެވޭ ވާހަކަތަކަށް އިތުރު ބާރެއް ލިބިގެން ދިޔައީ ހޯމަ ދުވަހުގެރޭ ވައިޓްހައުސްގެ ރޯސް ގާޑަންގައި ބޭއްވި ނޫސްވެރިންގެ ބައްދަލުވުމެއްގައި ހިނގި ކަންތައްތަކެއްގެ ވީޑިއޯ އާންމުވުމާއި ގުޅިގެންނެވެ.

އާންމު ވެފައިވާ ވީޑިއޯއިން ފެންނަ ގޮތުގައި ސެނެޓުގެ މެޖޯރިޓީ ލީޑަރު، މިޗް މެކްކޮނެލް އާއި އެކު ކުރިއަށް ގެންދެވި ޕްރެސް ކޮންފަރެންސަށްފަހު، އެނބުރި ވައިޓްހައުސްއަށް ވަޑައިގަތުމަށް ދެތިން ހަރުފަތުގެ ސިޑިއަކުން އަރާވަޑައިގަތުމަށް ރައީސް ޓްރަމްޕް ވަނީ މެޖޯރިޓީ ލީޑަރު މިޗްގެ އެހީ ހޯއްދަވާފައެވެ. އެގޮތުން، ސިޑިން އަރާވަޑައިގަތުމަށް މިޗްގެ އަތުގައި ޓްރަމްޕް ހިއްޕަވާ މަންޒަރު ވީޑިއޯއިން ފެނެއެވެ.

ރައީސް ޓްރަމްޕް ސިޑިން އަރާވަޑައިގަންނަވަން ބިރުފުޅުގަންނަވާކަމަށް ބުނެ ފުރަތަމަ ވާހަކަ ދެކެވެން ފެށީ މި އަހަރުގެ މާޗް މަހު އިނގެރޭސިވިލާތުގެ ބޮޑުވަޒީރާ ތެރެސާ މޭ ވައިޓްހައުސްއަށް ކުރެއްވި ޒިޔާރަތުގައި ހިނގި ހާދިސާއަކާއި ގުޅިގެންނެވެ. އެފަހަރު ދެބޭފުޅުން ވައިޓްހައުސްގެ ބޭރު ކޮރިޑޯގައި ހިންގަވާފައި ވަޑައިގެން ހަރުފަތަކާއި ހަމައަށް ވަޑައިގެންނެވޭ ހިސާބުން ރައީސް ޓްރަމްޕް ބޮޑުވަޒީރާ މޭގެ އަތްޕުޅުގައި ހިއްޕަވާ މަންޒަރު ފެންނަ ފޮޓޯތަކެއް ވަނީ އާންމުވެފައެވެ.

ނަމަވެސް އެފަހަރު ކަން ވީ ގޮތަކީ ކުއްލިއަކަށް އެ ހަރުފަތާއި އަރައި ހަމަވުމުން، ބޮޑުވަޒީރާ މޭއަށް ގެއްލުމެއް ލިބިވަޑައިގެންފާނެތީ ރައީސް ޓްރަމްޕް އެކަމަނާގެ ރައްކަލަށްޓަކައި އެކަމަނާގެ އަތްޕުޅުގައި ހިއްޕަވީ ކަމަށްބުނެ، އިނގެރޭސިވިލާތުގެ ރަސްމީ ފަރާތްތަކުން ވަނީ އެ ވާހަކަ އޮއްބާލާފައެވެ.