ރަޝިއާގެ މަނަވަރަކަށް ޔޫކްރެއިންގެ ޑްރޯން ހަމަލާއެއް، ގެއްލުމުގެ ތަފުސީލެއް ނޭނގޭ!
14 ނޮވެމްބަރު 2026 | ހޮނިހިރު 08:44ފިންލެންޑް ކަނޑުގައި އޮތް ރަޝިއާގެ 'ނާރޯ-ފޮމިންސްކް' މަނަވަރަށް ޔޫކްރެއިނުން ދިން ޑްރޯން ހަމަލާއެއްގައި އެ އުޅަނދަށް ބޮޑެތި ގެއްލުންތަކެއް ލިބިފައިވާ ކަމަށް ރިޕޯޓުތައް ބުނެފި. މި ހަމަލާއާ ގުޅިގެން މަނަވަރުން ދުން އަރަމުންދަނިކޮށް ފެނިފައިވާއިރު، މި ހާދިސާއާއެކު ބޯލްޓިކް ކަނޑުގެ ސަލާމަތާއި ކަނޑުއަޑީގެ ކޭބަލްތަކުގެ ރައްކާތެރިކަމާ މެދު ވަނީ ކަންބޮޑުވުން އުފެދިފައި
![ރަޝިއާގެ އަސްކަރިއްޔާގެ 'ނާރޯ-ފޮމިންސްކް' ނަން ކިޔާ މަނަވަރު [ފައިލް]](https://dyncz33htw1ec.cloudfront.net/posts/fe626553-29b4-49d0-ac97-0e95dfc40552.webp)
ރަޝިއާގެ އަސްކަރިއްޔާގެ 'ނާރޯ-ފޮމިންސްކް' ނަން ކިޔާ މަނަވަރު [ފައިލް] | ރަޝިޔާ ޑިފެންސް މިނިސްޓްރީ
ފިންލެންޑް ކަނޑުގައި އޮތް ރަޝިއާގެ އަސްކަރީ މަނަވަރަކަށް ނޮވެންބަރު 11 ވީ ބުދަ ދުވަހު ޔޫކްރެއިނުން ޑްރޯން ހަމަލާއެއް ދީފި ކަމަށް ފިންލެންޑްގެ އޮފިޝަލުން ކަށަވަރުކޮށްދެއްވައިފި އެވެ. ބޯލްޓިކް ކަނޑުގެ އާންމު ވިޔަފާރި ދަތުރުފަތުރަށް ހުޅުވިފައިވާ ސަރަހައްދެއްގައި އޮތް ރަޝިއާގެ އުޅަނދަކަށް ޔޫކްރެއިންގެ ޑްރޯންތަކުން ހަމަލާދިން މިއީ ފުރަތަމަ ފަހަރު ކަމަށް ބެލެވެ އެވެ. މިއާއެކު، ޔޫކްރެއިނުން އެ ސަރަހައްދުގައި ދެމުންގެންދާ އަސްކަރީ ހަމަލާތައް އިތުރަށް ފުޅާކޮށްފާނެކަމާ މެދު ވަނީ ސުވާލު އުފެދިފަ އެވެ.
މި ހަމަލާއާ ގުޅޭ މާ ގިނަ ތަފުސީލުތަކެއް އަދި ހާމަވެފައި ނުވި ނަމަވެސް، ޔޫކްރެއިންގެ ސެކިއުރިޓީ ސާވިސްއިން (އެސްބީޔޫ) ބުނީ އެ އިދާރާގެ އަމާޒަކަށް ވީ ރަޝިއާގެ 'ނާރޯ-ފޮމިންސްކް' ނަމަކަށް ކިޔާ މަނަވަރު ކަމަށެވެ. ބޯލްޓިކް ކަނޑުގެ އައްސޭރީގައި އޮންނަ ރަޝިއާގެ އުސްތު-ލޫގާ ތެޔޮ ބޭރުކުރާ ބަނދަރަށް އަމާޒުކޮށް ހިންގި ޑްރޯން އޮޕަރޭޝަނެއްގެ ތެރެއިން މި މަނަވަރަށް ހަމަލާދީފައިވާ ކަމަށް އެ އިދާރާއިން ހާމަކުރި އެވެ. 'ކަލިބަރ' އަދި 'އޮނިކްސް' މަރުކާގެ ކްރޫޒް މިސައިލް އުފުލުމުގެ ގާބިލުކަން ލިބިފައިވާ މި އުޅަނދަކީ 'ބުޔާން-އެމް' ކްލާހުގެ ކުޑަ މިސައިލް ކޯވެޓެކެވެ. މީގެ އިތުރުން، މި އޮޕަރޭޝަނުގައި ރަޝިއާގެ އަސްކަރީ ހެލިކޮޕްޓަރުތަކެއް ހަލާކުކޮށްލާފައިވާ ކަމަށް ވެސް ކަށަވަރު ނުވާ ރިޕޯޓުތައް ބުނެ އެވެ.
ދަތުރުފަތުރުގެ ރައްކާތެރިކަމާއި ކަނޑުއަޑީގެ ކޭބަލްތަކާ މެދު ކަންބޮޑުވުން
ކީވްއަށް ވިލާތުން އެންމެ ބޮޑަށް އެހީތެރިވާ ގާތް އެއް ބައިވެރިޔާ ކަމަށްވާ ހެލްސިންކީގެ އޮފިޝަލުން ސިފަކުރެއްވި ގޮތުގައި، މި ހާދިސާއަކީ ރަޝިއާއިން ޔޫކްރެއިނާ ދެކޮޅަށް ފަށާފައިވާ ހަނގުރާމައިގެ ސީދާ ނަތީޖާއެކެވެ. ފިންލެންޑްގެ އަސްކަރިއްޔާއިން މި ހާދިސާއާ ބެހޭ މާ ގިނަ މަޢުލޫމާތެއް ދީފައި ނުވި ނަމަވެސް، ހަމަލާ ދީފައި ވަނީ ފިންލެންޑްގެ އައްސޭރިފަށާ ތަންކޮޅެއް ދުރުގައި އޮންނަ ކަނޑުއޮޅީގެ ހަނި ސަރަހައްދެއްގައި ކަމަށް ބެލެވެ އެވެ.
ފިންލެންޑްގެ ޚާރިޖީ ވަޒީރު އެލީނާ ވަލްޓޮނެން ވިދާޅުވީ ބޯލްޓިކް ކަނޑުގެ ހާލަތު އޮތީ ހަމަޖެހިފައި ކަމަށާއި، އެ ސަރަހައްދު އޮތީ ރައްކާތެރިކޮށް ކަމަށެވެ. ހަމަމިއާއެކު، ކަނޑު ދަތުރުފަތުރަށް އެއްވެސް ނުރައްކަލެއް ނެތް ކަމަށް އޭނާ ވިދާޅުވި އެވެ. ނަމަވެސް، ގަލްފް އޮފް ފިންލެންޑް ނުވަތަ ފިނެލްންޑް ކަނޑަކީ ތެޔޮ އުފުލާ ޓޭންކަރުތަކާއި އާންމު ވިޔަފާރި ބޯޓުފަހަރު ދަތުރުކުރާ ނިސްބަތުން ހަނި ކަނޑުއޮޅިއެއް ކަން ފިންލެންޑްގެ ދިފާޢީ އޮފިޝަލުން ކީވްއަށް ހަނދާންކޮށްދެއްވާފައިވާ ކަމަށް ވެ އެވެ. މި ގޮތުން، އެ ސަރަހައްދަކީ މުވާސަލާތީ މަޢުލޫމާތު ފޮނުވާ ކަނޑުއަޑީގެ މުހިންމު ކޭބަލްތައް އަޅާފައިވާ ސަރަހައްދެއް ކަން ވެސް އެ އޮފިޝަލުން ފާހަގަކުރެއްވި އެވެ.
މަނަވަރުން ދުން އަރައި، ސެއިންޓް ޕީޓަރސްބަރގަށް މިސްރާބު ޖެހުން
މި ކަނޑުއޮޅިއާ އިންވެގެން އޮންނަ އެސްޓޯނިއާގެ ދިފާޢީ ވަޒީރު މާޓިން ހެރެމް ވިދާޅުވީ މަނަވަރަށް ހަމަލާ އަމާޒުވީ ބުދަ ދުވަހުގެ ހެނދުނު 5:30 ހާއިރު ކަމަށެވެ. ހަމަލާ ދިނީ ކޮން ގޮތަކަށް ކަމުގެ ތަފުސީލެއް ނުދެއްވައި، އޭނާ ހާމަކުރެއްވި ގޮތުގައި ހަމަލާއަށް ފަހު މަނަވަރުން ދުން އަރަމުން ދިޔަ މަންޒަރު ވަނީ ފެނިފަ އެވެ. "ހަމަލާއަށް ފަހު އެ އުޅަނދުން ދުން އަރަމުން ދިޔަކަން އަޅުގަނޑުމެންނަށް އިނގޭ. އަދި، އުޅަނދު ވަނީ އަނބުރާ ސެއިންޓް ޕީޓަރސްބަރގާ ދިމާއަށް މިސްރާބު ޖަހާފައި،" އޭނާ ވިދާޅުވި އެވެ.
މި ހަމަލާގައި ރަޝިއާގެ މަނަވަރަށް ލިބުނު ގެއްލުމުގެ ކުޑަބޮޑުމިނެއް ނުވަތަ އުޅަނދުގެ ފަޅުވެރިންގެ ތެރެއިން އެއްވެސް މީހަކު މަރުވެ ނުވަތަ ޒަޚަމުވި ކަމެއް އަދި ސާފެއް ނުވެ އެވެ. އަސްކަރީ އުޅަނދުތަކަށް ލިބޭ ގެއްލުންތަކާއި ސިފައިންނަށް ލިބޭ އަނިޔާތަކުގެ މިފަދަ ތަފުސީލުތަކަކީ މޮސްކޯއިން އާންމުކޮށް ހާމަކުރާ މަޢުލޫމާތުތަކެއް ނޫނެވެ.
މަސްދަރު: ބީބީސީ
