ވޯލްޑް ކަޕްގައި ވާދަކުރާ އެންމެ ކުޑަ ޤައުމަކަށް އައިސްލެންޑް

ފީފާ ވޯލްޑް ކަޕުން ޖާގަ ހޯދި އެންމެ ކުޑަ ޤައުމުގެ ޝަރަފް އައިސްލެންޑުން ހޯދައިފި އެވެ.

ފީފާ ވޯލްޑް ކަޕުން އައިސްލެންޑުން ޖާގަ ހޯދީ، ހޯމަ ދުވަހުގެރޭ ކުޅުނު ޔޫރޯ ޒޯންގެ ކޮލިފިކޭޝަންގެ ގްރޫޕް ސްޓޭޖްގެ ފަހު މެޗުގައި ކޮސޯވޯގެ މައްޗަށް ކުރި ހޯދައިގެންނެވެ.

ޔޫރޯ ޒޯންގެ ކޮލިފިކޭޝަން ގްރޫޕް އައިގައި ރޭ ކޮސޯވޯގެ މައްޗަށް ކުރި ހޯދީ ދެ ލަނޑު، ސުން ލަނޑުންނެވެ. މިމެޗުގައި އައިސްލެންޑްގެ ލަނޑުތައް ޖަހައިދިނީ އެވަޓަންގެ ގިލްފީ ސިގާޑްސަން އަދި ބާންލީގެ ޖޮހާން ގުޑްމުންޑްސަން އެވެ.

ޔޫރޯ ޒޯންގެ ކޮލިފިކޭޝަންގައި އެންމެ ވާދަވެރި އެއް ގްރޫޕް ކަމަށްވާ ގްރޫޕް އައިގެ ކުޅުން ނިމުނުއިރު، އައިސްލެންޑް މިގްރޫޕްގެ އެއްވަނަ ހޯދީ 10 މެޗުން ހަތް މެޗު ކާމިޔާބުކޮށް، 22 ޕޮއިންޓް ހަމަކޮށްގެންނެވެ. 20 ޕޮއިންޓާއެކު މިގްރޫޕުން ޕްލޭއޯފްގެ ޖާގަ ލިބިފައިވަނީ ކްރޮއޭޝިއާ އަށެވެ. މިގްރޫޕުން ވޯލްޑް ކަޕްގެ ޖާގަ ނުލިބުނު ބޮޑެތި ޓީމްތަކުގެ ތެރޭގައި ޔޫކްރެއިން އަދި ތުރުކީ ހިމެނެ އެވެ.

މިދިޔަ އަހަރު ފްރާންސްގައި ބޭއްވި ޔޫރޯ 2016ގެ ދެވަނަ ބުރުގައި އިނގިރޭސިވިލާތް ބަލިކޮށް އެމުބާރާތުގެ ކުއާޓަރ ފައިނަލްގައި ވާދަކުރި އައިސްލެންޑްގެ އާބާދީ އަކީ ތިން ލައްކަ ތިރީސް ފަސް ހާހެވެ.

ގްރޫޕް އައިގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ގްރޫޕްގެ ދެވަނަ މަގާމް ހޯދައިގެން ޕްލޭއޯފްގެ ޖާގަ ކަށަވަރު ކުރުމަށް ނިކުތް ޔޫކްރެއިން އަދި ކްރޮއޭޝިއާގެ ކުރިމަތިލުން ނިމުނީ ކްރޮއޭޝިއާގެ މައްޗަށް ބުރަ ވެގެންނެވެ. ދެލަނޑު ސުން ލަނޑުން ކްރޮއޭޝިއާ މޮޅުވި މިމެޗުގައި އެޓީމުގެ ދެލަނޑުވެސް ޖަހައިދިނީ އަންދްރޭ ކްރަމަރިޗެވެ. މިމެޗުން ޔޫކްރެއިން މޮޅުވިނަމަ، ޕްލޭއޯފްގެ ޖާގަ ލިބޭނީ ޔޫކްރެއިން އަށެވެ.

މިގްރޫޕްގައި ރޭ ފިންލެންޑާއި ތުރުކީ ބައްދަލުކުރި މެޗު ނިމުނީ ދެ ލަނޑު، ދެ ލަނޑުން އެއްވަރު ވެގެންނެވެ. މިމެޗުގައި ތުރުކީގެ ދެ ލަނޑުވެސް ޖަހައިދިނީ ސެންކް ޓޯސުން އެވެ. ފިންލެންޑްގެ ލަނޑުތައް ޖަހައިދިނީ ޕައުލުސް އަރަޖޫރީ އަދި ޖޮއެލް ޕޮއްޖަންޕަލޯ އެވެ.

ގްރޫޕް އައިގެ ކުޅުން ނިމުނުއިރު، 17 ޕޮއިންޓާއެކު ގްރޫޕް ތިންވަނާގައި ވަނީ ޔޫކްރެއިން އެވެ. ހަތަރުވަނާގައިވާ ތުރުކީ އަށް 15 ޕޮއިންޓް ލިބިފައިވާއިރު، ފިންލެންޑަށް ނުވަ ޕޮއިންޓް، އަދި ގްރޫޕްގެ ފުލުގައިވާ ކޮސޯވޯ އަށް ލިބިފައިވަނީ އެންމެ ޕޮއިންޓެކެވެ.