މި ސަރުކާރުން 24 ގަޑިއިރުތެރޭގައި ގާނޫނުތައް ބަދަލުކޮށް ސިޔާސަތު އެބަ ބަދަލުކުރޭ، މިކަން ކުރާނަމަ މި ގައުމު ދެމިނޯންނާނެ: އަމީތު
30 ސެޕްޓެމްބަރު 2026 | ބުދަ 06:55މަޖިލީހުގެ ސުޕަރ މެޖޯރިޓީ ބޭނުންކޮށްގެން އެއްވެސް ދިރާސާއެއް ކުރުމެއް ނެތި ގާނޫނުތަކަށް ބަދަލު ގެނައުމަކީ ގައުމުގެ އިގުތިސާދަށާއި ރައްޔިތުންނަށް އޭގެ ނޭދެވޭ އަސަރު ކުރާނެ ކަމެއް ކަމަށް ކުރީގެ މެންބަރު އަމީތު ވިދާޅުވެއްޖެ. ޑޮލަރު މާރުކުރުމާއި ދުންފަތުގެ ޑިއުޓީ ބޮޑުކުރުން ފަދަ ސިޔާސަތުތައް ކުއްލި ގޮތަކަށް ތަންފީޒު ކުރުމުގެ ސަބަބުން ބޮޑެތި ގޮންޖެހުންތަކެއް ކުރިމަތިވަމުންދާކަން އޭނާ ފާހަގަކުރެއްވި
ރާއްޖެ ޓީވީގެ ފަލަސުރުޚީ ޕްރޮގްރާމްގައި އަމީތު ވާހަކަ ދައްކަވަނީ | ރާއްޖެ އެމްވީ
މި ސަރުކާރުން 24 ގަޑިއިރުގެ ތެރޭގައި އެއްވެސް ދިރާސާއެއް ކުރުމެއް ނެތި ގާނޫނުތަކަށް ބަދަލު ގެނެސް ސިޔާސަތުތައް ތަންފީޒު ކުރަމުންދާ ކަމަށާއި އެކަން އެގޮތަށް ކުރާނަމަ މި ގައުމު، ގައުމެއްގެ ގޮތުގައި ދެމި ނޯންނާނެ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ ކުރީގެ މެންބަރު މުހައްމަދު އަމީތު ވިދާޅުވެއްޖެ އެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން އަމީތު ވިދާޅުވީ، 20 ވަނަ ރައްޔިތުންގެ މަޖިލީހުން ފާސްކޮށްފައިވާ ގިނަ ގާނޫނުތަކަކީ ރަނގަޅު ދިރާސާއެއް ކުރުމެއް ނެތި، ޕީއެންސީ އަށް ލިބިފައިވާ ސުޕަރ މެޖޯރިޓީގެ ބޭނުންކޮށްގެން ފާސްކޮށްފައިވާ ގާނޫނުތަކެއް ކަމަށެވެ. އެގޮތުން މަޖިލީހުގައި މިހާރު އޮތް ސަގާފަތަކީ އެ ސުޕަރ މެޖޯރިޓީ ބޭނުންކޮށްގެން ރައީސް ޑރ. މުހައްމަދު މުއިއްޒު އަންގަވާގޮތަށް ގާނޫނު ފާސްކުރުމުގެ ސަގާފަތް ކަމަށް ވެސް އަމީތު ވިދާޅުވި އެވެ.
މިސާލަކަށް ބައްލަވާ، އަޅުގަނޑުމެންގެ އިގުތިސާދީ ހާލަތު މިހާބޮޑަށް ދަތިވެފައި އޮއްވާ، ޑޮލަރުގެ މައްސަލަ މިހާ ބޮޑުވެފައި އޮއްވާ، އަޅުގަނޑުމެންގެ ރައްޔިތުންގެ އަނގަޔާއި އަތާ ދިމާނުވާ ހާލަތުގައި، ރައްޔިތުން ތިއްބާ، ރައްޔިތުންގެ މަޖިލީހުން ގާނޫނު މި ފާސްކުރަނީ މި ސަރުކާރުން ހަމަ ރައީސް މުއިއްޒު އަންގާ ގޮތަށް އެއްވެސް ދިރާސާއެއް ކުރުމެއް ނެތި. ރިސޯޓުތަކުން، އެ ބޭފުޅުންގެ ލެޔާއި ދާ އޮހޮރައިގެން، އެ ބޭފުޅުން ކޮށްފައި ހުރި އިންވެސްޓްމަންޓަކުން މި ލިބޭ އާމްދަނީ އިން މަޖުބޫރު މިކުރަނީ ބޮޑު އިންސައްތައެއް އެމްއެމްއޭ އަށް މާރުކުރަންމުހައްމަދު އަމީތު
އަމީތު ވިދާޅުވީ ގާނޫނުތަކަށް މި ސަރުކާރުން އިސްލާހުތައް ގެންނައިރު، ގާނޫނު އަސާސީއާ ތައާރަޒުވޭތޯ ނުވަތަ ނުވޭތޯ ވެސް ބެލުމެއް ނެތި ސަރުކާރުން ހިތުހުރި ގޮތަކަށް އެކަން ކުރަމުންދާ ކަމަށެވެ. އަދި އޭގެން ނުކުންނާނެ ނަތީޖާތައް ބިރުވެރި ކަމަށާއި މިހާރު ވެސް ފެންނަމުންދަނީ އެ މަންޒަރު ކަމަށް އޭނާ ވިދާޅުވި އެވެ.
މިސާލެއްގެ ގޮތުން ދުންފަތާ ގުޅޭ ކަންކަން ބަދަލުކުރުމަށް ގާނޫނަށް އިސްލާހު ގެނައި އިރު، ސަރުކާރުން އެއްވެސް ވަރަކަށް ގައުމުގެ ހާލަތު ބަލާފައިނުވާ ކަމަށް އަމީތު ވިދާޅުވި އެވެ. ދުންފަތުގެ އިސްތިއުމާލު ކުރުން ހުއްޓުވުމުގެ ނަމުގައި ކަމަށް ބުނެ ދުންފަތުން ނަގާ ޑިއުޓީ ބޮޑުކުރުމުން އޭގެ ސަބަބުން ގައުމުގެ އިގުތިސާދާއި، ރައްޔިތުންނަށް ކުރާނެ އަސަރުގެ އިތުރުން ހަގީގަތުގައި ވެސް ދުންފަތުގެ އިސްތިއުމާލު ކުރުން މަދުވާނެތޯ އެއްވެސް ވަރަކަށް ބަލާފައިނުވާ ކަން އޭނާ ފާހަގަކުރެއްވި އެވެ.
އަމީތު ވިދާޅުވީ އޭގެ ނަތީޖާއަކަށް ވެގެން ދިޔައީ މަގުތަކުގެ ކަންމަތީގައި ޒުވާނުންނަށް ބިޑި އަނބުރަން މަޖުބޫރުވެގެން ދިއުން ކަމަށެވެ. އެހެން ނަމަވެސް ދުންފަތުގެ އިސްތިއުމާލު ކުރުން އެއްގޮތަކަށް ވެސް މަދުނުވާކަން ފާހަގަކުރައްވާ އަމީތު ވިދާޅުވީ އެފަދަ ކަންކަން މަދުކުރުން ނުވަތަ ހުއްޓުވުން ގުޅިފައި ވަނީ އެއިން ނަގާ ޓެކްސްއާ ނޫން ކަމަށެވެ.
ޑިއުޓީ ބޮޑު ކުރި ނަމަވެސް ދުންފަތް އެތެރެކުރަމުންދާ މިންވަރު މަދުނުވާ ކަމަށް އޭނާ ވިދާޅުވި އެވެ. އަދި ސަރުކާރުން ގާނޫނުތަކަށް އިސްލާހު ގެންނަމުން ދިޔަ ނަމަވެސް، ވިސްނާނުލާ، އެއްވެސް އިންތިޒާމެއް ނެތި ގެންނަ އިސްލާހުތަކާއެކު ވެސް ވަގުން އަދި ވެސް ހަމަ ވައްކަން ކުރަމުންދާ ކަމަށް އަމީތު ވިދާޅުވި އެވެ. އެގޮތުން ކަސްޓަމްސްގެ އިސް ފަރާތްތަކާ ގުޅިގެން، ބޮޑެތި ކޮންޓެއިނަރުތަކުގައި ވެސް އެއްޗެހި އެތެރެކުރަމުންދާ ކަމަށް އަމީތު ވިދާޅުވި އެވެ.
އަމީތު ވިދާޅުވީ މި ހުރިހާ ކަމަކުން ވެސް ހާމަވާ އެއް ކަންތައް އެބައޮތް ކަމަށެވެ. އެއީ ރައްޔިތުންގެ މަޖިލީހަށް ލިބިފައިވާ ސުޕަރ މެޖޯރިޓީގެ ނަހަމަ ބޭނުން ހިފައިގެން 24 ގަޑިއިރުގެ ތެރޭގައި ގާނޫނުތަކަށް ބަދަލު ގެނަސް، ސިޔާސަތުތައް ތަންފީޒު ކުރަން ފަށައިފި ނަމަ ގައުމެއް ގައުމެއްގެ ގޮތުގައި ނޯންނާނެ ކަން ކަމަށެވެ. އަދި އޭގެ ބަދަލުގައި އުފެދޭނީ ބޮޑެތި މައްސަލަތައް ކަމަށް ވެސް އޭނާ ވިދާޅުވި އެވެ.
